أم أحـــــــــمـــــــــد

حلمي في الدنيا

2009-04-13T15:46:00.000-07:00

نفسي اصحي من النوم ألاقي نفسي بأعرف أقول نكت ومش بس أقولها ...لأ فشرررررررررررررررر

أألفها كمان

والموضوع دا والله اعلم محتاج زرع مخ لأني بأعترف بكل شجاعة أن إلقاء نكت أو تأليفها محتاج ذكاء فظيع

وأنا باين عليا من سلالة المتخلفين في الأرض

وإلي أن تنجح تجاربي في الدخول إلي عالم النكت

عيش أحلي مافي النكتة

واحد مسطول ماشي في صالة بيتهم خبط في مامته قالتله يابني انت مش شايفني قام قالها اه شفتك بس مش فاكر فين قبل كدة

واحد مسطول شاف شيخ فبيسأله أنت رايح فين ياعم الشيخ رد الشيخ رايح أحلل بول قم قالله مش حرام عليك ياعم

الشيخ تحلل البول وتحرم الخمرة

مرة واحد مسطول قطع راس اخوه وهو نايم ، وقال وهو بيضحك هيجنن لما يصحى الصبح وميلقهاش

مبروك أوباما

2008-11-05T01:17:00.001-08:00

مبروك أوباما
ولا صاحبتك السلامة يابوش ياأسوأ رئيس عرفه العالم
نجح الأمريكان بعد ثمان سنوات من العذاب في إختيار رئيساً جديداً من الحزب الديموقراطي الحزب الذي يعتبر دواءاً للمجتمع الأمريكي فهو الأقدر علي الحكم
وهذه الإنتخابات التي تابعها العالم بجميع فئاته بشغف أسفرت ولله الحمد عن نجاح أوباما المتنوع الثقافات فهو كيني تعلم في مدرسة إسلامية مما يجعله رجلاً واعياً أن الإسلام لا يقترن بأي حال من الأحوال بما زُعم عنه من إرهاب
مبروك باراك ولا تنتظروا ياعرب أن بيديه عصا سحرية ليحل مشاكلكم ولكن يكفينا أن يحل مشاكل أمريكا الاقتصادية الدولة العظيمة التي سقطت وأسقطت معها إقتصاديات العالم علي يد المرحوم بوش
مبروك لأمريكا رئيسها الأسود وأطال الله عمره حتي يستطيع أن يخرج بأمريكا من مشاكلها الكثيرة التي كادت تحطم الأمبراطورية الامريكية العظيمة

مبروك علي الأمريكان الرجل الكاريزما الذي كانت تحتاجه أمريكا لكي يعيد لها حب العالم فتكفي ابتسامته الساحرة التي أسر بها الأعداء قبل الأصدقاء
مبروك نهاية عصور العنصرية الامريكية فاختيار هذا الرجل يدل علي ان الامريكان قد نضجوا سياسياً
وشكراً ياأخ بوش فلولا سوء إدارتك لما نجح رجلاً كأوباما في الوصول للسلطة

مدد ياحكومة مدد

2008-07-29T04:23:00.000-07:00

مدد ياحكومة مدد
مدّد ياحكومة مدّد ولادنا ماتوا النهاردة من ظلم كتير في البلد
كانت هذه هي الهتافات التي أطلقها أهالي ضحايا العبارة المنكوبة السلام 98
والذين أكدوا أن الناجين من العبارة قد تم أختطافهم لكي لا يدلون بشهادتهم أمام القضاء
فالمخطيء ليس مستثمراً صغيراً بل هو شخص مسنود... والمسنود في بلدنا لا يُدان مهما أرتكب من مصائب... يارب أسندنا ووقعهم

وحادث العبارة السلام 98 لمن لا يعلم هو أكبر مأساة إنسانية في مصر فقد راح ضحيتها 1033 شخصاً غرقاً في فبراير 2006م وكانت النيابة قد وجهت أصابع الإتهام نحو 10 أشخاص في القضية منهم 4 أشخاص أنتهت الدعوي القضائية ضدهم بسبب الوفاة .
والحكم في قضية العبارة ليس حكماً قضائياً بل هو حكم سياسي نظراً لنفوذ مالك العبارة ونجله وقربهما من دوائر عُليا في السلطة
ولاد المحظوظة متمرمغين في القرع بالكوسة
حتي يوم الحادث كان الشعب ملخوم في ماتشات الكورة والناس في الشارع مبسوطة
ولكن وبعد قرار القضاء الذي أدان كبش فداء ليترك الجاني الأساسي يرتع ويخرج منها كما الشعر في العجينة،الآن فقط ذهبت دماء الضحايا هدراً ووُضع خنجراً مسموماً في قلوب أسرالضحايا

بس حتي القيطان اللي أتاخد كبش فدا وهايروح في كلابوش مظلوم الغلط كله يلبسه المواطن اللي ركب السفينة من غير مايعمل ليها كشف علي السلامة ماهو في البلد العجيبة دي كل واحد لازم يشيل في جيبه أجهزة كشف وتدقيق

أسكت منك ليه ياشعب ماعندوش نظر

ورحم الله بلد يخرج منها أصحاب العبارة وأصحاب شركة هايدلينا براءة وسلملي علي المترو من غير ماتاخده بالحضن
لينا رب أسمه كريم

بركاتك باعادل

2008-07-11T11:41:00.000-07:00

في أحد السينمات الصيفية ذهبت لأشاهد فيلم حسن ومرقص
وأنا في الواقع لست من هواة الأفلام العربية ودائماً ماأفضل عليها الأفلام الأجنبية بجميع أنواعها
ولكن هذا الفيلم شدني كما لم يشدني فيلم من قبل أومن بعد
الفيلم كوميدي خفيف من تأليف الكاتب المبدع العظيم الرائع يوسف معاطي وبطولة الأمبراطور الذي يستحق هذا اللقب عن جدارة لجرأته في عرض هذا الفيلم الذي يناقش قضية شائكة غاية في الأهمية
وهي التعصب الديني في مصر هذا التعصب الأعمي المستحدث علي مجتمعنا المسالم
وقد لفت نظري كم الصراحة والوضوح الذي نوقشت به تلك القضية ... تكلم الفيلم عما يحدث بالفعل بين قطبي الأمة من مسلمين ومسيحيين ... تكلم عن رأي المسيحيين في الإضطهاد المزعوم وان المسيحيين مظلومون ومهضوم حقهم في السلطة وفي بناء كنائسهم او تجديدها الا بخطاب رسمي من الحكومة وملاحقة المسلمون لهم ببناء مسجد مجاور وأكبر لكنائسهم
أما عن المسلمون الذين يرفضون هذا الزعم وحجتهم هي عدم وجود شحات مسيحي علي أرض الوطن كما أن أغني أغنياء البلد من المسيحيين ... وأن المسيحين متكاتفين هذا الحوار الذي دار بالفعل بين كل من القطبين بلا مواربة

حوار واقعي وغير مفتعل

وتكلم عن تفضيل المسيحين للتعامل مع المسيحين وليس المسلمين في البيع والشراء وعن الأسعار المميزة التي يحظي بها المسيحين عند بيع الذهب كمثل ... لان معظم تجار الذهب مسيحيين

كما تحدث الفيلم عن قصة الحب المحرمة التي قد تنشأ بين مسلمة ومسيحي ... عمركم شفتم فيلم تكلم بصراحة عن هذه القضية بصراحة وكسر تابوه المحرمات المصري ...

وفي ختام الفيلم قام المؤلف العبقري بوضع الأسرتين المسلمة والمسيحية في نفس البيت كناية عن مصر ... هذا البيت الذي تعرض للحرق بفعل الفتنة التي حدثت في الشارع وتأذي بسببها البيت الذي يجمع الأسرتين ولم يجد رب الأسرتين المتناحرتين غير جاره المختلف عنه في الدين لكي ينجد أسرته ويسترها

وقد ختم الفيلم بمشهد معبر للأسرتين يخرجون في الشارع متكاتفين ومتماسكين وفي خلال تلاحمهم تعرض كلا رب الأسرة للجرح

كناية عن أن الفتن الطائفية ستجرح المسيحي والمسلم علي حد سواء بنفس الكيفية وان الفتنة ماهي الا افتتان فهي ليست فتنة متأصلة في مصر بل هي مستحدثة علي هذا المجتمع الذي استوعب الكثير والكثير من الأختلاف

فالمجتمع المصري من يومه ذو طابع مختلف عن اي دولة عربية أخري

فمصر قبل ان تكون مسلمة فهي قبطية وقد أستقبل أقباط مصر عمرو ابن العاص الفاتح المسلم العظيم بكل الحب والترحاب

فماالذي سبب هذا التناحر العقيم بين دفتي المركب

وفي الختام لعن الله موقظ الفتنة النائمة

وشكرا ألف شكر للمبدع عادل إمام الذي شد رأس النعامة من تحت التراب رغماً عنها بجرأة لا يقدر عليها غيره ولا نتقبلها نحن الا منه

وأحب أرفع لعادل إمام القبعة بكل حب عن أفلامه الأخيرة التي تناقش مشاكلنا الجديدة

هل هي حقيقة مرة أم إشاعة أمر ؟

2008-07-04T16:11:00.000-07:00

من أسبوع كدة ... بنت البواب كتر خيرها حبت تنبهني قامت رعبتني

برضه كتر خيرها

وهي كانت جابت حاجة من جيبها ... كله علي عينك ياتاجر

فقد بلغتني أنه كان فيه واحد راكب موتوسيكل خطف شنطة واحدة ست ماشية في الشارع في أمان الله لا بيها ولا عليها ... وقد حاول بوابون المنطقة ملاحقته لكنهم فشلوا في الإمساك به ولاذ بالفرار بعد أن جردها من الشنطة ومحتوياتها الثمينة

وحدوتة الموتوسيكل دي مش جديدة عليا فقد حدثت لأبن صديقة من صديقاتي وأبنها عمره حوالي أثني عشرة عاماً فقط وحدث ذلك وهو في طريقه لبيته بعد أنتهائه من تدريبات السباحة بالمدرسة

الولد بخير ولله الحمد لكن حبه للأستقلال تقهقر به لعشر سنين للخلف

هو آه كان مستفز بموبايله الحديث ذو الكاميرا

لكنه لا يستحق لهذه الصدمة التي تعرض لها

للأسف هذه هي الحقائق التي أقسم علي إنها قد حدثت في غياب الأمن الغافل عن دوره في حفظ الأمان في شوارعنا .... مع تورم حالة الغلاء التي نعيشها ولا تلاحقها مرتباتنا الهزيلة

الموضوع التاني الذي لا أملك عليه دليل وأتمني ألا يخرج عن كونه إشاعة سخيفة

أطلقها بعض مروجي الإشاعات السخفاء وذلك من فرط رعبها

فقد كنا في السينما عندما أبتعد أبني الصغير عن يدي مسافة ربع متر

فتوقفت سيدة شديدة الزوق ونبهتني إلي خطورة أبتعاد أبني عني لهذه المسافة الصغيرة وذلك لوجود عصابة تختطف الأطفال من أحضان ذويهم لتتاجر في أعضائهم وتبيعها للأثرياء وأنهم بالفعل وجدوا جثتان لفتاتان أنتزعت أعضائهم الداخلية وحل محلها القطن

ياللهول ألهذه الدرجة قد تتقلص أخلاقنا لتصل بنا للحضيض

سواء أكانت هذه الرواية إشاعة مغرضة أو حقيقة مفزعة

خواطر زوجية

2008-06-14T04:46:00.000-07:00

من وحي الحياة الزوجية أكتب لكم

ـــــــــــــــــــــــــــــــــــــــــــــــــــــــــــــ

آه منهم .... آآآآآآآآآآآآآآآآآه

رجالة آخر زمن

من برة جنتل مان ومن جوة يعلم الله

بأحس ساعات أن الراجل الزوج بياخد زوجته وكأنها أمر مُسلم به وأنه من حقه أن يعاملها كما يتراءي له

فتجده قد يستفزها أو يستخدم صوته العالي معها أمام الغرباء

دون مراعاة لمشاعرها ودون وجود أي أثر للجنتل مان لديه ... لأنها بالطبع زوجته

ومن حقه عليها الشخط والنطر وطول اللسان

وقد نجد نفس الرجل يتعامل بمنتهي الهدوء والأدب مع سيدات وفتيات لا تمتن له بأي صلة

سوي أنهن فتيات غريبات عنه

ليه بقي ... ياسيدي الفاضل

ماهي زوجتك ست .. وشبه أي ست تانية ... وممكن تبقي جنتل مان معاها

وكل الستات تتشابه في أحلامها بوجود رجل يحتويها بعطفه ويحترمها في السر والعلن

أمام الناس الغريبة ومن خلفهم

مش بين الناس تبوس أيديها وبينك وبينها تدوس عليها

يارجال العالم أرحموا الستات من الكيل بمكيالين

برة البيت وجواه

هي كانت خوخــــــــــــة بس

2008-05-26T01:19:00.000-07:00

أبو أحمد يعشق حاجة أسمها خوخ

أنا عمري ماحبيت الخوخ ده ... أصله بيبهدلني ويقعد ينقط عليا ... وبيبقع في الهدوم وأسألوا عمورة أبني

المهم رفيق عمري أشتري كيلو خوخ .. وأنا بنية صافية غسلته

زمان كانوا قالوا الخوخ والمشمش يتغسلوا بخل وعملتها مرتين تلاتة ولما لاقيت الدار أمان بطلت أغسل الفاكهة بالخل

وقلت ربنا يسترها علينا ويحمينا من عنده

المهم قعد جوزي يتسلي علي الخوخ ... وواحدة تجر واحدة لحد ماخلص الكيلو كله

الليل يهل وتلاقي جوزي ياعيني يصحي من النوم جري علي الحمام وهوفي الحمام أسمع صوته وهو شغال قيء

صعب عليا ده برضه عشرة العمر

وعمري ماشفته في الحالة دي

قلتله تعالي تاخد حقنة في الصيدلية أتاريه بيخاف من الحقن فرفض رفضاً تاماً

وقعد يزعق فيا وكأني طلبت منه يدبح نفسه بالسكينة

والقيء برضه ماخلصش وكان خلاص الراجل أتصفي

قلتله نروح الطواريء نشوف بيجرالك أيه ؟؟ برضه لأ

قعدنا أنا وهو تاني يوم نراجع مع بعض كدة المنيو بتاع اليوم اللي كان عنده فيه تسمم

مالقيناش حاجة

وبعدين أفتكرنا الخوخ

هو الخوخ مافيش حاجة أكلها جوزي أمبارح لوحده غير الخوخ وإلا كان هايبقي تسمم جماعي

لا قدر الله

يرضيكوا كدة ياأخواننا

بقي الواحد ياكل خوخ ويجيله تسمم ... أتاري أيه ؟؟؟ الخوخ اللي بناكله في مصر بيبقي مرشوش مبيدات سامة

والفاكهة النضيفة بتاعتنا بتتصدر لبلاد برة عشان تدخل عملة صعبة للبلد

ياحسرة علينا ياولاد

البني آدم مننا مالوش تمن في بلده

يعني الواحد مننا لازم يفارق بلده عشان يبقاله تمن وياكل اكل نضيف

من اللي بيتصدر لبلاد برة

قدمتها لكم أم أحمد بعد ليلة عذاب طويلة

إللي متغطي بيها عرياااااااااااااااان

2008-05-21T16:25:00.000-07:00

منتهي العجرفة ... والغرور ... من مييييييييييييين ياأم أحمد ؟

تفتكرو من مين ... أكيد من إللي ماتتسمي أمريكا

آدي ياأخواننا أخرة المتكل علي أمريكا ورئيسها ... ريسنا أتهان ياميييييييينز

اللهم لا شماتة ... بس برضه أنا مقموصاله ... ده برضه الريس بتاعنا ... وإللي يزعله يزعلنا ... بس بصراحة مش مقموصة أوي ... يعني حتة شيكولاتة تنسيني المسألة كلها ... عادي ... بسيطة وهو يعني كان أتهزت له شعرة وغازنا بيتصدر برخص التراب لحبيبة القلب ... وفي نفس الوقت مستخسر فينا شوية غاز نضيف يظبط هواء البلد شوية ..والغاز إللي بيتصدر رخيص بيتباع غالي لأهل البلد

ماعلينا ... الله لا ................ولا بلاش ... الطيب أحسن

إللي حصل في مؤتمر دافوس بإختصار أن السيد المحترم بوش أبن الناس المتأصلة أتلكك وغاب عن حضور خطاب حبيبنا مبارك.... خلينا متفائلين .... مش جايز الراجل كان عنده إسهال وخاف يتحرج قدام وفود الدول اللي جاية تشوف سيادته .... هو الراجل مش بني آدم وممكن يعيا برضه وبعدين جايز سمع كلام الست شيرين وحب يدوق من نيلها وماكانش يعرف إللي فيها

يعني الراجل البسكوتة معذور ياأخواننا ... مش واخد مناعة من ميتنا ذينا

يقوووووووووم أيه ... الريس بتاعنا يردهاله ويمشي قبل خطاب بوش ... أحسن برضه تستاهل يابوش أو أبو وشين

أنت أصلك ماعندكش دم .. بقي الراجل سايب الطابور بتاع العيش وجاي مخصوص عشان يبسطك ويراضيك وانت ماتحضرش خطبته

بقي ده كلام يانااااااااس ؟؟؟

وألا أحنا مانشبهش ولا يمكن مانشبهش ... وألا عشان علمنا مش لونه أبيض وفي وسطيه نجمة داووود

يبقي نتعامل بالشكل المهين ده

كدة كله تمااااااااااام .... واحدة بواحدة والبادي أظلم

كلمة في ودنك ياسي بوش ... أنت مش عارف بتكلم مين ؟؟؟

أنت واحد خارج من الحكم عن قريب لكن أحنا ريسنا .. طويييييل العمر ... قاعد فيها

ربنا يزيد ويبارك

وإللي ذاد وغطي لما بوش نطق ... نطق كفراً والعياذ بالله .. قال العرب حكامهم في القصر والمعارضين في السجون

الراجل بيلقح بالكلام ياجدعان ... ومين إللي بيقول بوش بذات نفسه ماأخيب من ستي إلا سيدي

طب وأنت مال أهلك ... أحنا راضييييين خليك في بلدك ياخرونج ... يابتاع العراق ياغشيم

شفت ياحبيبي أنا بأشتم بوش علشان خاطر عيونك

ده أنت إللي فيهم وبوش سلطة ... قال مقهورين قال أحنا مقهوريييين ... قطع لسانه

... ماتقهرش نفسك أنت بس يجيلك الضغط يارااااااااااااجل وأحنا لسة عاوزينك

بس أحنا قلنا ولسة بنقول إن كل ريس من رؤساء العرب يحط في دماغه أنه مش هايكون أعز عند أمريكا من إسرائيل

ومهما عملتم وهنيتم إسرائيل بالعيد الستين ... جاتها ستين داهية تشيلها من وسطينا ... ووزعتم علي إسرائيل من خيرات بلدنا مش هاتبقوا في خُمس معزتها في قلب الراعي الرسمي لها

ولكم في راس الحاج صدام أُسوة حسنة

الشر برة وبعيد

مين السبب في الخراب ؟

2008-05-19T05:05:00.000-07:00

جافاني النوم في ليلة وقلت أفكر في حال البلد

ليه مصر مش عاوزة تاخد خطوات كبيرة نحو التقدم ؟؟؟

ليه كل ماعجلها يجري تيجي حاجة تشدها وتقول لها عندك مكانك ؟؟؟

ليه بلدنا بقت كدة ؟

لـــــــــــــــــــــــــــــــــــيـــــــــــــــــــــــــــه ؟

قعدت أجيبها كدة .. أجيبها كدة

ياتري أيه إللي ممكن يشد بلد الحضارة سنين للخلف

مافيش غير حاجة واحدة بتتفرع منها حاجات كتيرة مشتقة منها

وهو إنعدام الضمير إللي خرجت منه سياسة أسمها سياسة الدورج المفتوح

أو ببساطة وبدون رتوش الرشوة والعمولة

وعلي فكرة بقي في حالة مصر وإللي حصل فيها فالرشوة هي العمولة

بلاش نحاول نحلل حاجة .. مادامت بتخرب الدنيا ... أكيد هي حرام

البلد أتباعت في نظير العمولات التي يتلقاها المنتفعين من هذه البيعة

وبعد مالبلد أتباعت إكتشفت حكومتنا المصونة أن مصادر دخلها نقصت

والتاجر لما يفلس يعمل أيه ؟؟؟

يدور في جيوب شعبه و ينفض الباقي

ومادام الشعب مهاود ومابيتكلمش يبقي النهب فيه حلال

وقووووووووووول ياباسط

حملة لا لنكسة الغاز

2008-05-13T10:33:00.000-07:00

لا لنكسة الغاز

لا لنكسة الغاز .....الحملة الشعبية لوقف تصدير الغاز الطبيعى المصرى

عندما تُستحل مواردنا الطبيعية ، وتهدر ثرواتنا على مرئ و مسمع من الجميع و يصرخ كل شريف بالرفض و تتعالى الاصوات من ممثلى الشعب بالاحتجاج لوقف هذا النزيف و تزرف الصحافة دمعها فى محاولة لدرء هذه الكارثة ثم تذهب كل هذه الجهود سدى و يبدأ ضخ الغاز الطبيعى المصرى لاسرائيل .بعد كل هذه الاحاديث عن الامن القومى و التوازن الاقليمى و الانعكاس الاقتصادى و حقوق الشعب الفلسطينى و الاحتياج المحلى للطاقة و مستقبل التنمية فهذه هى النكسة الحقيقية. نكسة لا مرد منها وموارد تكونت عبر ملايين السنين لن نجدها لكى نحاول استردادها بعد ان اجتمعت كل القوى الوطنية على عدم شرعية تصدير الغاز الطبيعى لاسرائيل انتكست الحكومة وبدأت العملية ضاربة عرض الحائط بارادة الشعب و اعتبرت نفسها الوحيدة التى تتكلم بلسان الشعب و تعرف صالحه و الحقيقة انها لا تعرف الا تنفيذ مصالح البعض .فهذه اللحظة هى موعد الشعب الحقيقى لكى يقول كلمته لكل من يريد نكسة اخرى ... لكل من يسرق الحلم بمستقبل أفضل.... هذا هو موعد الشعب لكى يقول لا لنكسة الغاز أوقفوا تصدير الغاز الطبيعى المصرى أوقفوا نزيف مواردنا الطبيعية

زوروا موقع الحملة هنا .لا لنكسة الغاز

جايز يكون لصراخنا صدي وحد من إللي نايمين علي ودانهم يصحوا ويفوقوا بقي

ويعرفوا أن مصر أولي بغازها من عدوها اللدود الذي سيظل كما هو عدوها بالرغم من محاولات التطبيع

وسحقاً للمنتفعين الذين يضعون مصلحة البلد تحت أقدامهم في نظير حفنة من الدولارات أصبحت وقوداً لحرق دم المصريين ... المالكين الحقيقين لهذا الغاز ... فبأي حق تضرب بإرادته عرض الحائط

مش عاوزينك ياعلاوة

2008-05-05T22:08:00.000-07:00

لو كانت العلاوة هاتيجي علينا بحرقة الدم إللي أحنا فيها دي يبقي ألغيها ياريس ... مش عاوزينها

والباب إللي يجيلك منه الريح سده وأستريح ... أنا ماشفتش شعب بيكره الذيادة في مرتباته قدنا

هو حد شريكنا ... مش عاوزينها

إذا كانت العلاوة هاتخلي الشعب كله محدود دخل يبقي تغوووووووووووور في ستين داهية ... فقد سبق أن قال ريسنا الحبيب أنا بأحب محدودي الدخل ... محدودي الدخل في القلب من جوة عايشين متربعين .... حبهم ياسيدي بس ماتحكمش علي الشعب كله يبقي حبيبك وتحوله بعلاواتك إلي محدووووووووود

أكرهنا ياريس ... والنبي لتكرهنا ... صدق إللي قال حبني وخدللك ظعبوط قال هي المحبة بالنبوت

أسمع ياأخ محدووووود أنت وهو

أسعار البنزين والسولار ذادت علي حس العلاوة ... ربنا ياخدك ياعلاوة .... هوبالعافية مش عاوزينك

في نفس الوقت الذي مازالت أسعار الغاز المصد رة للعزيزة إسرائيل كما كانت ... أصل إسرائيل إللي بتنقض عهدها مع طوب الأرض برضه ليه أحترامها وماينفعش نرجع في كلامنا عشان مانطلعش عيال قدامها ... يعني حرام علينا نتهني بغاز بلدنا ... انا إللي أفهم فيه أن اللي يعوزه البيت يحرم الجامع ... يعني محدود الدخل المصري أولي برعاية الريس من محدود الدخل الإسرائيلي .... إللي ماشاء الله أمريكا منغنغاه

نفسي ريسنا يبذل مع الشعب المصري الشقيق ... نصف المجهود الذي يُبذل مع أخواننا البُعدة

حسبي الله ونعم الوكيل

الله يخرب بيتها العلاوة لغت الإعفاءات الضريبية علي المدارس الخاصة واللغات

قال عشان الناس إللي دخلت ولادها لغات ناس متريشة ومعاها علي قلبها قد كدة ... ولازم ناخد منها ... مايعرفش أن معظم الناس اللي بتدخل ولادها مدارس لغات مزنوقة ياولداه في جمعيات وسلفيات عشان تعدي السنة بالعافية

وحجتهم المقبولة هي سوء حال التعليم في المدارس الحكومية

أنت بتاخد من الناس المستورين نسبياً عشان تعريهم ... اللهم عرينا وأكسيك

ماعندك طبقة حيتان الحزب الوطني ولا دول عاملين حجاب محبة .. وأسمها الحركي طبقة المحتكرون الجدد ... فهؤلاء يسيطرون علي إنتاج وتوزيع وجني أرباح معظم السلع الأساسية ... بحسدكم ياولاد المحظوظة

ويابخت من كان الرئيس من حزبه

حلم يراودني عن نفسه .... نفسي بعد عمر طويل يتولي الحكم واحد شرقاوي من اللي عزموا القطر علي كوكاكولا

أخيراً

بحبك يامصر بصرف النظر عن حكومتك ... مصر مش الحكومة ...مصر هي مصر ... أحترت في حبي ليكي

وسخطي عل تصرفات بعض أفرادك مش هاينسيني عشقي ليكي

بحبك بحبك

أنا جاية أهدي النفووووووس

2008-05-01T05:48:00.000-07:00

قرأت في مجلة نسائية هذا الموضوع الذي أحببت أن أسجله هنا للزمن ... وبالمرة أسجل تجربتي معاه كمان

ياأيتها البشرية المُعذبة ... صحصحوا معايا

المقال عنوانه القنبلة بيقووووووول

تعلّمي كشف زوجك الخائن من حركاته

إن الرجل الخائن لديه أفعال معينة يمكنك عن طريقها أن تكتشفي خيانته، إليك بعض من هذه الأفعال والحركات

راقبي انفعالات وحركات جسم زوجك، بمعنى آخر ما يطلق عليه علماء النفس باسم -لغة الجسد الانفعالية-، عندها ستدركين أولاً بأول مدى إخلاص وحب زوجك من عدمه
كان غيركم أشطر
وملخص نظرية لغة الجسد تقول: -إن الكذب والخداع عادة ما يسببان ضغطاً عصبياً لا يستطيع أن يحتويه الجسم البشري، لذلك تظهر حركات لا إرادية كرد فعل مضاد لذلك الضغط العصبي-وتتفق أحدث دراسات علم النفس على ذلك، وتؤكد نشوء نوع من الصراع الداخلي بين مشاعر الكذب، وصوت الضمير من جهة أخرى، فيظهر هذا الصراع على شكل إيماءات وحركات جسدية تكون بمثابة إشارات لغوية يعبر بها الجسد عن حالة الاضطراب الداخلي وتكون أيضاً دليلا على حالة الكذب والخداع

اليك بعض النصائح الذهبية التي ترشدك كزوجة في كشف خداع زوجك، أهمها الملاحظة الدقيقة للإيماءات والحركات العفوية التي تصدر عن الزوج أثناء حديثه معها

: العين مفتاح اللغز: العين هي مفتاح النفس، حيث تعبر بصدق عن ما يجيش بأعماق صاحبها لذلك هي مؤشر واضح عن حالة الكذب أو الصدق، فعندما يكون الزوج صادقاً، فإن عينه تتحرك تلقائياً ناحية اليمين، لأن الجانب الأيسر من المخ هو الذي يتعامل مع الحقائق، وهو الذي يتحكم في الجانب الأيمن من الجسد، والعكس صحيح، حيث تتحرك العين ناحية اليسار كلما كذب الإنسان، لأن الجانب الأيمن من المخ يتعامل مع الأشياء الخيالية وغير الحقيقية، ويتحكم في الجانب الأيسر من الجسد

أنا جربت البحلقة في عين زوجي ... لاقيت النيني واقف في النص ... قلت جايز ظالماه قلتله ... أكذب عليا كدة وريني ... قاللي بحبك ... قلت لا أكذب كذبة كبيرة ... قاللي برضه بحبك

وعينيه مابتتحركش ..ولا بيتهزله جفن وأنا أبحلق وأبحلق لحد ماجاني حول

ويتحاشى الكذّاب دائماً النظر في عين الطرف المستقبل، فنراه تارة يغلق عينيه أثناء الحديث، وتارة أخرى ينظر إلى أسفل خوفاً من أن يفتضح أمره

ويجب أن تحتاط الزوجة عندما يكون الزوج حاذقاً لدرجة كبيرة بحيث يكون قادراً على خداعها وهو ينظر في عينيها بكل براءة، ويطلقون على هذا النوع من الرجال لقب -كذاب وعينه قويّة-

، فهو يحاول أن يؤكد صدق حديثه وإقناع زوجته بشتى الطرق لمنع زوجته حتى من مجرد الشك في صدق كلامه

راقبي مفرداته اللغوية: يلجأ المخادع دائماً إلى سرد قصص وحكايات قد تبدو منطقية ومقبولة جداً، يذكر فيها أين ذهب وماذا فعل،

لكن يجب أن تنتبهي يا سيدتي إلى ما يستخدمه من جمل وعبارات، حيث يستخدم جملاً قصيرة من دون توضيح كاف، ويتجنب ذكر أي تفاصيل، ويعاني من تلعثم شديد في نطق الكلمات والحروف، وأخطاء لغوية عديدة، ويميل دائماً إلى استخدام أقل عدد من الكلمات مثل الإجابة بنعم أو لا، وأحياناً الاكتفاء بهز رأسه عند الموافقة أو هز كتفيه عند الرفض

واضح أن النظرية دي مانفعتش معايا ... وباين علي جوزي طلع حويط ومش سهل ... ماحدش يقول أنه جايز مش بيكذب .. عشان مافيش راجل مابيكذبش

أحترس المصرييين أهما

2008-04-28T05:35:00.001-07:00

أستيقظ المصريون من ثباتهم الطويييييييل

وخرجت من بينهم فتاة رقيقة أسمها إسراء من يراها لا يتوقع ان تكون ثورية

أتسجنت إسراء ... وقررت أعتزال السياسة أوالإشارة عنها ... وقررت أن تتنازل عن مقولتها الغير عادية

خليك بالبيت

ولكن مالا يعلمه ساجنوها هو أن الشعب قد فاق والجيل القادم لن يسكت ... لن يهاود

وسيترك صومعته وينادي بحقوقه

اذا ماتجرأ المتجرئون علي سلبه إياها

أصبحت إسراء رمز الصحوة والإنتفاضة

فمالذي يجعلنا نحتاج إسراء وغيرها لننادي بحقوقنا ؟؟

فلو كانت حقوقنا مُحافظ عليها لما تكونت هذه النوعية الجديدة من يوار الإنترنت

فبعد أن أصبحت حكومتنا حكومة زكية

أحب أنوه ان شعب الحكومة الذكية اصبح زكياً هو الآخر

ومافيش حد أحسن من حد

هاتتزاكي ياحكومة هانتزاكي أحنا كماان

كتبته لكم واحدة قلبها علي حكومتها المسكينة

تااااااااااااااااااااااااج

2008-04-19T19:29:00.000-07:00

التاج ده من الأخت الغالية بنت الدقهلية صبرني يارب

وأسألته صعبة أوي ... محتاجة علبة مناديل عشان هانعرق كتير النهاردة

أولا : اذكر عشرة اشياء عن نفسك
ثانيا : اختر خمس اشخاص تهدى لهم التاج
ثالثا : لا تهدى التاج لمن اهداه اليك
رابعا : عرف اللى بعتلك التاج انك نزلته عندك

عشرة بحالهم ياظلمة .... كتير أوي

هو فيه حد في الدنيا يعرف نفسه أوي كدة

أول هام .... بيقولوا عليا طيبة ...وأنا بقول عليا طيبة بحدود ... يعني أنا عندي قوة تحمل مش بطالة ..بس بتخلص مع الإستخدام

وماحبش حد يستغلني ممكن أوافق في الأول بس بعد كدة بأفوق

تاني هام ..... رقيقة أوي زمان ورقيقة ساعات دلوقتي

تالت هام ... عندي ولدين ... وماادراك يعني أيه واحدة رقيقة تربي صبيان ... بتبقي ذيهم

رابع هام .. ... أحب الونس ... حتي لوكان الونس ده دمه تقيل وبينكد عليا ساعات .. ماأحبش الوحدة أبداً

خامس هام ... متفائلة ساعات ...ولو أن الحالة ماتسرش

سادس هام ... مدبرة ... بس تدبيري ده مابينولش الرضا المطلوب

سابع هام .... باحب التدوين ... عشان بفضفض فيه بإللي جوايا ... وبما أني اعتبر قديمة حبتين في التدوين فأنا زعلانة أوي

من طريقة الحوار الجديدة التي لم يكن لها وجودمن قبل ... عاوز تقول رأيك قول بس مش لازم تجرح في غيرك

الدنيا واسعة وتحتمل الإختلاف تامن هام .... أفضل الزيارات العائلية عن الخروجات الأخري وزوجي يفضل العكس

تاسع هام .... أحب أغسل المواعين علي الإضاءة الخافتة ... في جو رومانسي

عاشر هام .... أعشق أغاني أم كلثوم وصوتي ييجي منه في أغانيها ... أحب أسمعها وأنا بأمسح الشقة ... يعني لما جيراني يسمعوا أم كلثوم خارج من شقتي يبقي النهاردة يوم التنضيف

خمس ضحايا جداد هما كالآتي

رئـــــيسـة حزب الأحلام... واحدة مفروسة.... Eno.... lyssandra..... حياتي قنبلة ذرية

قريباً .. بالأسواق ... مدونات مصرية للجيب

2008-04-16T01:40:00.000-07:00

فكرة الحلم ببساطة بدأت من أربع سنين

والحلم كان إن الشعب يسمع لبعضه

الفكره كانت ان اللى يطلع يتكلم عن مشاكل رغيف العيش والمواطن المطحون ميكونش واحد عنده عربيه مكيفه وبينزل يقعد فى الاستوديو المكيف ويتصور جنب مذيعه بتقوله سيادتك ومعاليك

.. الحلم كان ان اللى يطلع يتكلم عن الشعب يبقى عايش وسط الشعب ... مش حقد على الناس اللى قاعده فى الابراج لأ

اطلاقا ولكن لأن اللى قاعد فى البرج دا شغلته كاتب شغلته انه يطلع فى التليفزيون ويتكلم لكن مش دايما بيكون حاسس

بيهم ...ومجتمع المدونات بيوفر الكاتب اللى عايش وسط الناس ومرتبط بيهم لكنه مش كاتب واحد دا عدد غير معروف

من الكتاب ...ومن هنا ابتدأ الحلم الجديدالحلم هو عمل سلسلة كتب تصدر بشكل دورى تجمع افضل كتابات المدونين فى كل

الاتجاهات على ان يتم تصنيفها حسب نوعها هل هى ادبيه ولا اجتماعيه ولا مقالات حره وسياسيه ويتم عمل كتاب لكل

نوع ... الحلم كان صعب لكنه اصبح حقيقه ... من فتره وانا واحمد بنفكر فى الموضوع دا من بداية نشاطنا التدوينى

وبفضل الله الفكره اصبحت رسميه وقدرنا نتفق على تفاصيل النشر ... طبعا سلسة الكتب دى واللى هتصدر بشكل

دورى معموله اساساً عشان القارئ المصرى يقرأ لكاتب مصرى عايش حياته ممكن يكون مدون جاره ممكن يكون

مدون فى الصعيد او الدلتا لكنه عايش نفس اهتماماتهشروط الانضمام للكتاب ايهمفيش شروط ... اه مفيش شروط غير

انك تكون عايز تقدم فكركطب القيود ايهمفيش قيود غير ان الكتابات متحملش تجريح او اساءه لأى شخص حتى لو كان

يستحق الاساءه وإن المقالات ذات الطابع السياسى تكون بناءه يعنى مش شتيمه وخلاص لأ لازم تكون بتقدم وجهة

نظرالمطلوب ايه عشان تنزل اعمالك فى الكتابالمطلوب حاجتين الاولى تبعتلنا ايميل والتانيه تنشر الفكره بين زمايلك

عشان متبقاش انانى وعشان منحجبش فكر او وجهة نظر اى واحد مصرى ممكن تكون رؤيته مهمه بالنسبه لحد

تانىالحلم دا حلمنا كلنا ان يكون فى ايد كل مصرى مجموعه من المدونات ماشى بيها فى كتابان اللى مش بيدخل نت

وميعرفش حاجه عنه ويدوبك بيعرف يقرأ يقدر يتابع اهتمامات بلده وابناء بلدهالسلسله هتكونسلسله ادبيه - سلسله

اجتماعيه وسلوكيه - سلسلة مقالات حرهحقوق الملكيه الفكريه محفوظه والفكره مسجلهتوصلنا ازىعلى رقم التلفون دا لأى استفسار كل يوم من الساعه تسعه للساعه عشره مساءً0115659038او على ايميلاتنا

ااحمد البوهى ahmed.elbohy@yahoo.com

أحمد مهنى

ahmed_mahana_me@yahoo.com

الجرووب على الفيس بوك مدونات مصريه للجيب من هناابعت

الرساله وعنوانها عمل ادبى او اجتماعى او حراى نوع من الاعمال خواطر كانت او اشعار او ازجال او قصص او مقالات او اى شئ وأتبعتلنا عنوان مدونتك ورقم التلفون والمحافظه فى مصر ورؤيتك او مقترحاتك اختار البانر اللى يعجبك واعلن عن الفكره

أنا عجبتني الفكرة وقلت أقولكم عليها

والمقالة منقولة من مدونة أنا وصاحبي

http://sneen.blogspot.com/

من أصغر معلق في مصر .. رأساً إليكم

2008-04-09T07:31:00.000-07:00

معلقنا قد تجد علي ملابسه روائح لجميع ماأكله في الأسبوع ... تاريخ مسجل بالريحة

وقد ندخله ليستحم بعد كل أكلة وبرضه مافيش فايدة

وعندما يكون تحت الدُش تجده يشاور بيديه ملوحاً بيها ليختفي الأكل من علي جسده القصير

فيقووول

هش ... هش يارز ... هش يالحمة ... هش ياملوخية

إفيييه ... عمورة ريحته موقرف

عمورة حوط برفان .. عشان خََده ريحته موقرف

عمورة قليلة أدب كسر الكوباية تش .. ماما أضربه بالعصاية طاخ

وقد يمسك بيديه كتاب فأسأله عنه قائلة ... تحب تذاكر ياعمر

لأ ماما .. عمورة أقري بس .. عمورة مش ذاكر

يعني الولد بيأكد عليا أنه ماعندوش إلتزام وكله بمزاجه وحسب رغباته

أما عمورة بقي لما يحب يتفرج علي ماتش فهو مشجع أهلاوي متعصب

لايعلم في الكورة إلا .. أبو تريكة .. وأرقص ياحضري .. وهو أصغر معلق قد تجده علي وجه مصر

فهومصمم علي أن يحكي لي الماتش بنفسه فتجده يشوش علي المعلقين في التليفزيون ليعلق بطريقته وحسبما يري من وجهة نظره الخاصة فالكرة تعتبر شديدة الخطورة وقد تدخل جون حتي لوكانت في وسط الملعب

أبو تريكة شوط كورة .. قليلة الأدب كابتن ماجد وقع أبو تريكة

شووووووووووووط .. شوووووووووط

جوووووووووووووون .. الكورة طلع فوووق

ألعب ولد

توف .. توف

فأنهره قائلة ... عيب ياعمورة مانقولش توف

مش عيييب ماما ... هو ألعب غلط

أحسن حاجة ممكن تحصل يوم الماتشات أن عمورة يكون نايم ... لأنه لو صاحي ممكن نسيب الماتش ونقعد نتفرج عليه هو

كيف أضربت أم أحمد.؟؟

2008-04-06T23:53:00.000-07:00

عاوزة أتكلم عن الإضراب ... أنا كنت خايفة أتكلم عنه ... أصلي جبانة حبتين ... فعندما قرأت في الجرائد القومية عن التهديدات بالحبس الذي قد يصل لثلاث سنوات لكل من تسووول له نفسه بالتلميح فقط عن موضوع الإضراب .. ومحسوبتكم مالمحتش بس ... لأ دي كتبت موضوع كمان ... وممكن حد أبن حلال يبلغ عني

وولاد الحلال مالييين البلد ...
لكن ياااالا العمر واحد والرب واحد ... وكله بياخد نصيبه
أضربتي إذاي ياأم أحمد ؟؟؟؟
أضربت في بيتنا ... زوجي نزل شغله عااادي وأبني راح مدرسته عاااادي ... أنا إللي أعلنت حالة العصيان ... ولو أنها معلنة من زمااان ... هو أنا هاروح فييين ياحسرة ...
الحاجة إللي أضربت عنها بالفعل هي شراء أي نوع من أنواع البقالة أوالخبز
حتي العيش الفينو بتاع مدرسة أحمد ماأشتريتهوش ... وعملت له بطاطس محمرة تاني يوم الصبح
كله يهووون في سبيل عيون الإضراب
لكن جوزي الخاين حاول يغريني وأتصل بيا من برة وهو راجع من الشغل وسألني ... أشتري جاتوه للغالية أم أحمد
صرخت فيه ....

أوعي .. هارميه ... أنا عاملة إضراب
ماتخافوووش ... ماضعفتش

ولوإني ضعييييفة قدام الجاتوه

لكن ياتري الإضراب نفذ أهدافه ؟

رغم أن الإضراب ذادت حدته في المحلة وتحول إلي أعمال شغب وتقريباً المدينة ولعت ...وناس كتيرة أتصابوا وناس أستشهدوا

والعهدة علي الراوي .. أنا ياجماعة مش باأحب المظاهرات الهمجية بتاعة شعبنا نفسي في مظاهرات هادية ذي اللي باشوفها في التليفزيون ... ناس تقعد علي الأرض تستني الفرج ... مش أحنا بنسوووق فيها ونضرب في بعض

وندمر ممتلكات لناس لا بيها ولا عليها ... أو حتي نضرب في بتوع الأمن المركزي الغلابة ... وناسييين أنهم ولادنا

والغلا ماسابش حد لا إحنا ولا هما كماااااان

لكن أكتر حاجة حسستني بالخوف ... هي نفسها إللي حسستني بالأمل ... عارفين أيه ؟؟

موقف الحكومة من الإضراب والتحذيرات بالحبس ولفها علي المدارس عشان تاخد الغياب وتعاقب المتغيبين في هذا اليوم

يعني الحكومة خافت .. والإحساس ده جديد من نوعه علي الشعب المصري اللاجيء

إللي مخوفني بقي الدعوة الجديدة للإضراب الجديد ... أنا مش معاها الصراحة لأن ميعادها قريب جداً وهو يوم عيد ميلاد سيادته

طب هو أحنا لحقنا ندي للحكومة فرصة عشان تعمل رد فعل للإضراب الأول عشان هوب نجري ونعمل إضراب جديد

الصبر ياجدعاااان ... يعني صبرنا قرووون ... وفوقنا علي حكومتنا كدة مرة واحدة

الرحمة حلوة
وكل إضراب وأنتم طيبين

هاتمووووت شهيد .... ياولداه

2008-04-06T08:37:00.000-07:00

لو طبيت ميت وأنت واقف في طابور العيش الطوييييييييييييل الذي تسبب في طوله عدم وصول الدقيق المدعوم لمخابز المحروسة بفعل الرشوة والمرتشين .... فأنت أكيد شهيد

لو أتقتلت بإيد يهودي أكل وأتغذي من نار بوتاجاز أتولع بغاز بلدك وبسعر منافس أرخص من الأسعار العالمية ... يبقي أنت شهيد أبن حلال .. بتدفع ثمن غدر المسؤلين بيك وتفريطهم في الغاز لمصلحة عدونا اللدود

لومت من جوعك لأن أسعار السلع الأساسية في بلدك ليس عليها رقابة صارمة وبتعلي حسب ضمير التجار ... إللي ضميرهم سبقك للشهادة من زمااااان ... من غلبه وقلة حيلته ... ماتخافش هاتحصله علي الجنة ونعيمها

لو عربية واحد مسنود أتنازلت وقررت تدوس لامؤاخذة علي جتة سيادتك المتواضعة ...وقطعتك حتت حتت ومالحقتش تقووول أي ... برضه هاتكون شهيد ... أهم حاجة ماتعترضش يابني

لو حصلك الشرف وأنضربت برصاص أمريكاني صديق ...في مياه بلدك الأقليمية ..يعني البيت بيت أبونا ... والأمريكان بيشكمونا .... برضه هاتكون شهيد محظوظ وهاينزلك نعي بالبنط العريض في صحف العم سام بيه

لو حصل ودخلت تعمل عملية ودكتور التخدير إداك الجرعة غلط وصلتك لحالة غيبوبة قلبت لموت إكلينيكي .. ولا يهمك ياعم الشهادة برضه هاتبقي من نصيبك حتي لوطلع الدكتور منها ذي الشعرة من العجينة

لو غرقت في عبارة أو أتفحمت في قطر من قطارات بلدك الغالية ... الشهادة هاتوصلك
لوأكلت لحم حمير وياريتها حمير مدبوحة ...دي حمير ولا مؤاخذة فطسانة .. هاتحتاج غسيل معدة بس ... بس لو مت أبقي أسأل المفتي أنت بقي بمعرفتك الخاصة
لو أكلت خضار وفاكهة من النوع المسبب للسرطان ... وخضار بلدك النضيف السليم أتصدر لبلاد الفرنجة

ماهي مش هاتفرق معانا ... أحنا عددنا في الليمون ... ويموت ألف يتولد مليون

يابختك ياشعب مصر الحبيب ..أبواب الجنة فاتحالك ذراعيها علي مصراعيها ... أدخل وأنت مطمن

أما بقي لو فكرت تقل عقلك وتشارك في إضراب أوعصيان مدني عشان توصل صوتك للمسؤلين ... ذو الودن العجين والأخري إللي من طين

فنهار أبوك أسود وليلك أنت اللي مطين .. وغير الحبس والسجن والبهدلة في الأقسام هاتشرف جهنم ياخفيف .. حتي لوبتدن في مالطة وماحدش بيسمع لكلامك

فالأعمال بالنيات

انا قلت اللي في ضميري اللي استشهد من خوفه وتعاطفه مع حكومتنا الذكية في مواجهة الحركة المهلبية للإضراب المدني

أضرب مُضرب بعد ماأنضرب علي قلبه

2008-03-29T19:15:00.000-07:00

عزيـــزي المواطن إللي نايم علي ودانـــــه ... قررنا نحن شعب مصر المطحون عمل إضراب جماعي يشارك فيه جميع فئات المجتمع للأعتراض علي إرتفاع الأسعار المبالغ فيه ... وذلك في يوم السادس من إبريل القادم
شدوا حيلكم معانا ياأخواننا وماحدش يشتري أيتها حاجة في اليوم ده .. ولا حتي العيش وكله يبلغ البوابين والناس إللي مالهاش في القراية عن اليوم ده ... لازم نتكاتف وناخد موقف
أحسن قفانا ورم من الضرب عليه بسوط الغلاء
ولنا في أهل السعودية أُسوة حسنة ... فقد ذاد عندهم سعر البيض حبابة صغيرة ... فأضربت جميع فئات الشعب عن أكله ... وتم إختيار فصل الصيف للإضراب ... نشنوا صح في إضرابهم ... فالبيض مشش وأسعاره نزلت غصب عن عين التخين ...

وأحنا مش أقل من إخوانا السعودييين ... ولازماُ ولابد نثبت للحكومة أننا ممكن ننفجر ونقوم بثورة
ثورة للجياع أو ثورة للي هايبقوا جياع
جايز تخاف الحكومة مننا مادامت طلعت مابتختشيش
وصدقوني في حكومات مابتجيش غير بالعين الحمرا
كله يدعك عينيه معايا
وربنا علي الظالم والمفتري

آه ... وآه ..من تنابلة السلطاااااان

2008-03-22T19:18:00.000-07:00

ياجماعة منظرنا بقي وحش أوي قدام العالم النامي

وبقينا في وضع مايعلم بيه إلا ربنا

مشكلة العيش وطوابير العيش خلت رقبتنا ذي السمسمة قدام فقراء العالم

مش عارفة أودي وشي منهم فين .؟ ... أنا بفكر جدياً إني أغير خانة الجنسية في بطاقتي وأكتب فيها صومالية

أنا عن نفسي بطلت أكل عيش من بتاااع الحكومة من زماااااااااااان

بس الصراحة نفسي بتهفني عليه كل كام يوم

أمال أيه ؟ ... ده أنا لحم كتافي وكتاف ولادي من خيره

وعلي رأي المثل ....العيش الحاااف بيربي الأكتاف

حالياً أنا مش لاقياه

وماليش في وقفة الطوابير ... لا أنا ولا زوجي

لدرجة أننا كنا في مرة ماشيين بالعربية فلمحت بعيني الأتنين راجل ماسك في أيده عشر ترغفة عيش لسة بنار الفرن ... المنظر كان يجري الريق

... كنت هاأقايس وأطلبهم منه إن شالله بسعر السوق السودة

بس لقيته متبت فيهم بكل قوته ...وكأنه ماسك في آخر ذاده

قلت بلاها ... لما أطلب من زوجي يقف ويشتري بنفسه

وأهو كله كفاااح من أجل لقمة العيش ... و يبقي أسم علي مُسمي

راح زوجي عشان يشتري العيش ... أحسن يكون وحم ولا حاجة

لكنه ذي مارااااح ذي ماجه .. أيده فاضية

سألته عن العيش .. رد : الدنيا هناك زحمة موووت والناس طوابير مالهاش أول من آخر .. لونفسك فيه أقف في الطابووور ... بس مش هاأرجع

قلتله : بلاش هو أنا لاقياك علي باب الجامع

وماأكلتش العيش

حد يبعتلي رغيفين وهادفعله بالعملة الصعبة

انا أيدي سايبة ومايهمنيش

المشكلة دي بقي وصلت لحد ريسنا وبكرة توصل للعالم كله

وهاتبقي فضيحتنا بجلاجل وصاجاااات

والريس بذات نفسيته أتدخل وقال حلوا المشكلة وألغوا الطوابير ... في الغالب مش عشان صعبانين عليه بس أكيد خايف تقوم عليه ثورة الجياع ويروحوا يقاسموه في العيش البيتي بتاع طنطتنا سوزي

إللي حازز في نفسي بقي وحارق دمي قوي

هي البلد دي مافيهاش حد ليه سلطة يحل مشاكلنا غير الريس

ريسنا آه علي عيننا وعلي راسنا

بس فين الوزرا ورؤساء الأحياء

كل حاجة لازم الريس يتدخل أمال الباقي بيعمل أيه لا مؤاخذة

شغلتهم تنابلة السلطان... يسقفواله ويهللوله

وينفذوا تعليمات وتوجيهات سيادته

هي المشكلة دي محتاجة توجيهات من سعادته

يعني لوفكروا يحلوها من نفسهم ... كان هايجري أيه ؟

أمريكا .... ياويكا

2008-03-19T18:44:00.000-07:00

بما أن رئيس أمريكا هو الحاكم المعلن لكل بلاد العالم

وبإيده يقوم حرب ويقعدها حسب مزاج سيادته الشخصي

يعني ممكن يقول

البلد دي مش بتعامل الناس كويس ... أضرب يابتنجان

البلد دي عندها سلاح نووي ... أدبح ناسها ياجون

البلد دي دمها خفيف علي قلبي ... أديها دولارز بالهبل وبالعبط

فمن هذا المنطلق

أطالب وبشدة جعل الإنتخابات الأمريكية إنتخابات عالمية

يعني أنا العابدة لله أنتخب وأنت تنتخب وكل من هب ودب ينتخب

مش معقولة واحد ممكن يأثر في لقمة عيشي وفي أمن بلادي وشايف انه من حقه يتدخل في بلدي وأمن بلدي ... جات كسر حُقه

وفي الآخر ماأنتخبش الأنسب من وجهة نظري

لأ بقي .. ذي مالريس لأمريكي ليه رأي في السلاح اللي في بيتي يبقي أنا كمان ليا رأي فيه كله علي بعضه

وذي مالريس الأمريكاني بيستعبط الشعوب وعامل عليها وصاية مع أن شعبه ولا مؤاخذة من أجهل شعوب الأرض

وذي ماهو بيحجر علي رأينا وأختيارنا لحكامنا نُحجر أحنا كمان علي شعبه وننتخب بدالهم ... بلاش ننتخب بدالهم أحنا ناس موومش طماعين ... معاهم كويس

وكل واحد عاوز يرشح نفسه لرئاسة أمريكا ييجي لحد بيتي ويقنعني بجدوله الأنتخابي وخططه لخدمة شعوب الأرض

وأنا أحط رٍجل علي رٍجل وأختار بمزاجي

أخــــــــــتــــــــــــي رئيـــــــــــــســــــــــة لحـــــــزب الأحلام

2008-03-17T18:33:00.000-07:00

سعيدة وفخورة بسلوي رئيسة حزب الأحلام

فقد أنشأت حزباً جديدً .... هو آه للأحلام ... لكن بجد مش عارفة هي جابت الفكرة دي منين

لم أكن أتخيل أن هذه الفتاة الرقيقة تستطيع أن تكتب كل هذا

فوجئت بمعني كلمة فوجئت

أنا عارفة أن دمها خفيف بس ماأعرفش أنها مبدعة خلاقة لهذه الدرجة

فيازواري الأعزاء هلموا وأنضموا لحزبها

ماتتأخروش عشان تاخدوا كارنيه الرواد

كابووووووووووووووس

2008-03-15T22:39:00.001-07:00

مساهمة مني في حملة غير حياتك ... أوقف المخدرات ... التي تأخرت كثيراً .. أكتب لكم

فقد باتت هذه الظاهرة من أخطر الظواهر الدخيلة علي مجتمعنا والتي قد تدمر جيلاً بكامله

فالمتابع منا للحركة التدوينية في مصر يلاحظ دخووول عدد غير محدود من الشباب المخدرين

فإذا كان هذا هو حال المدونون ... صفوة المجتمع ... إذا سمحتم لي طبعاً بوصفهم هكذا ... فما بالك ببقية الشباب

الحالة خطيرة ومؤلمة .. وتحتاج إلي وقفة

وربنا يستر علي ولادنا

أنا عارفة أن حالة البلد صعبة والعيشة مُرة ومحتاجة إلي وسيلة للهروب ... نهرب آه .. نضيع لأة

المخدرات ضياع للعقل

مش قادرة أستوعب كيف أن شاب مثقف يعلم بخطورة المخدرات ومع ذلك يختارها كصديق يرافق حياته ... ويدمر مستقبله

ففي كُليتي التي تخرجت فيها كانت هناك مجموعة معروفة من الشباب المخدر ... كنا نسميهم شلة الفساد

كنا نعرفهم من توهان نظرة عيونهم وميل رؤسهم ... وكنا ننبذهم ونخاف منهم ...ومع ذلك عندما أتذكرهم أتسائل .. لماذا لم يتحرك أحد أساتذتنا ويحاورهم ويحاول جاهداً مساعدتهم

فحالتهم كانت واضحة وضوح الشمس

لدرجة أن واحدة مثلي لاحظت هذا وأنا لم أكن أعرف معني كلمة مخدرات من أساسه

أين دور المجتمع ؟ أين العلاج ؟

من أجل غد أفضل للجميع يجب القضاء علي مروجي جميع أنواع المواد المخدرة

وأعدامهم في ميدان عام حتي يتعظ من تسول له نفسه بقتل عقول شبابنا

وتدمير جيل كامل أصبح لا يُعتمد عليه ... لا في حرب ولا سلم

تخيلوا معي أإذا قامت حرب لا قدر الله

هل يستطيع هذا الشاب المخدر المُغيب عقله أن يمسك سلاح ويدافع به عن أرضه وعرضه

أعتقد أنه ممكن يبيع سلاحه في سبيل شمة واحدة أو قطعة حشيش تعدل مزاجه

لمصلحة من هذا التوهان ؟

لمصلحة من هذه الغيمة الكثيفة من المخدرات ؟

السكر غاااااالي ... وأنا أحلي منين ؟

2008-03-09T19:14:00.000-07:00

هو السكر بس إللي غااااالي ... كله غاااااالي ... ياريت تيجي علي السكر بس ... كانت هاتبقي بسيطة

لكن الفول ... وقود البطون المصرية سعره ولع هو كمان

كل حاجة غليت إلا قيمة الإنسان

... أنا بقي من الشعب ولازم أتكلم براحتي ... وماحدش يقوللي تلت التلاتة كاااام؟

هو أنا حيلتي إلا لسان ومدونة صغنونة كدة فوق السطوح باتكلم فيها براحتي

ياحسرة .. لا أنا هاقدر أنزل في مظاهرة ... أودي الولاد فييين يعني ؟؟؟ ... حجة البليد مسح السبورة ... لو سمعتم عن مظاهرة جنبها حضانة أبقوا بلغوني ... وأنا مش هاأروح علي طول ... الجُبن سيد الأخلاق ... أحسن أخدلي روصية كدة ... ولا بونية كدة ... أروح فيها وأنا بسكوتة خااالص وبحب ألزق في الحيط لزق

من كام يوم كان معايا قرشين وقلت أروح البوستة ألقحهم هناك بدال مايتصرفوا في البيت ...

قوووم أييييييييييه ..... ماأروحش غير في يوم صرف المعاشات ... أُممم ... أُممم .. وطابوووووووووووووور طويييييييييييل مالهوش آخر .. والناس واقفة بتتخانق...

يانااااس حرااااام عليكم دي تالت مرة نيييجي وتقولوا مافيش فلوس .. عربية الفلوس لسة ماجاتش ... طب نصرف منين بس يعني نسرق ... حراام عليكم ... الدنيا بقت غلا .. وأحنا بنستلف فلوس آخر الشهر وبنردها أول الشهر .. ربنا يزلكم ذي مازلتونا وخلتونا نمد أيدينا للي يسوي واللي مايسواش

أنا شفت كدة قمت سألت واحدة واقفة في الصف ...

ماعلهش ياحاجة ...هو الطابووور ده بتاع أيه ؟ هي البوستة دي بتدوخ الناس كدة لحد ماتديهم فلوسهم

ردت الست بغُلب يقطع القلب .. لأ .. يابنتي الطابووور ده بتاع المعاشااات .. وفتحت في الحكي والدموع تسبق كلماتها ... أنا جوزي مات و ساب لي أربع عيال وخمسة وسبعين جنيه معاش في الشهر

الصراحة أنا ماصدقتهاش إلا لما قبضت بالفعل وعديت الفلوس في أيديها .. ماهي أصلها لما قبضيتهم قعدت تعدهم قدام الناس كدة عيني عينك من غير خوف ... هما هايسرقوا أيه ياحسرة ؟

... خمسة وسبعين جنيه حتة واحدة الحكومة بتبعزق يارجاااالة

ولازم نُحجر عليها

ياتري الست دي عايشة بيهم إزاي ؟

أكيد الأروبة عندها آلة زمن بتروح تشتري بيها طلباتها من عصر الجنيه الجبس وترجع تاني

...

أنا شفت المناظر دي ونفسي أتسدت عن الدنيا وقعدت علي الجنب أحسبها

لأ ... ياعم ..مش حاسبة دي حسبة برمة أسهل منها

مالهاش حل

غير

أن الناس دي ترفض تاخد المعاش وتسيبه عند الحكومة وهي تصرف عليهم بقي بمعرفتها وأبقوا وروني أن ماكانتش تشحت عليهم ... ولا بلاش أحسن الحكومة دي مالهاش أمان وبتخطف مال النبي

خمسة وسبعين جنيه ؟؟؟؟؟؟؟؟؟؟؟؟؟؟؟؟؟؟؟؟؟؟؟

يعملوا أيه دول في الزمن الأخبر ده ؟

ويشتكوا لمين الناس الغلابة دي

وعلي أيه ؟ الشكوي لغير الله مزلة

فحكومتنا ماتت من زمااان

الله يفحمها ماطرح ماراحت

....

كل سنة وأنا طيبة

2008-03-03T16:28:00.000-08:00

أنا قلت أسبق الكل وأقول لحضرتي .... كل سنة وأنتي طيبة .. وعقبااااااااااااااا ل مائة سنة بالتمام والكمال

زمااان وأنا صغيرة في إبتدائي .. كنت أجيب صاحباتي من المدرسة وأروح علي البيت ، وأحط مامتي أمام الأمر الواقع وأقولها .. ياااالا ياماما أعملي التورتة لحد ماألعب أنا وصحابي شوية .. وكانت الست ياعيني غلبانة .. ومابتتكلمش ولا بتعترض علي عزوماتي المفاجئة ..

وطبعاً عيد الميلاد إللي بيبقي بعد المدرسة ده بيبقي قرديحي من غير هدايا .. ولا مؤاخذة .. ومع ذلك كنت بأبقي طايرة من السعادة أن فيه حد عبرني وقاللي كل سنة وأنتي طيبة وطفي معايا الشمعة إللي عمرها ماذادت عن شمعة واحدة

ولما كبرت شوية وأتنقلت من مدرستي .. وغيرت صديقاتي الغالييين .. طبعاً ماحدش من صاحباتي الجداد أفتكر يوم عيد ميلادي رغم أني مفكراهم بيه قبلها بشهر

وحصل عندي صدمة فيهم .. وكان يوم عيد ميلادي مناحة فركنت راسي علي التختة وقعدت أبكي .. وهما يسألوني .. فيه أيه يابنتي ؟ أيه بس إللي حصل .. طب قولي

ورغم أن حيرتهم صعبت عليا ... لكن كرامتي لم تسمح لي بمعاتبتهم علي نسيانهم لكل سنة وأنتي طيبة

ولم أنسي لهم هذا الموقف بالرغم من تذكرهم لعيد ميلادي بعدها بيومين .. قال أيه عشان ماكانوش جابولي هدية وأتكسفوا يقولو كل سنة وأنتي طيبة كدة حاااف

للأسف ماكانوش يعرفوني كويس ..

وتمر السنين .. بحلوها ومرها .. ويقولوا الناس أحتفالات عيد الميلاد دي حرام .. وأنا ثابتة علي مبدأي .. أني واحدة تستاهل الدنيا كلها تحتفل بيها .. أنا جيت الدنيا وخليتها أحلي

ولسة باعمل عيد ميلاد وبطفي الشمعة .. .. وبقطع التورتة .. آه بقيت أنا إللي باشيل الليلة كلها .مش مامتي ذي زماااان ... بس كله يهون مادام باأجمع أهلي عندي وأشوفهم وأطمن عليهم وطبعاًبأتكسف أعزم صديقاتي حتي لا أكلفهم هدية ... فالبشر لما بيكبروا بيفتكروا أن الهدية بس هي إللي بتجمعهم

الوحيد إللي باأبقي عاوزاه يجيب لي هدية وتكون حلوة كمان هو زوجي .. باحس أن هديته بتعبر عن تقديره لجهدي معه وتحملي له

وبتبقي فرصة طبعاً أنه يعبرلي عن حبه بطريقة مادية لا أطلبها منه

أما الأستبن بتاعي إللي باتعكز علي كلمتها الحلوة .. وعمرها مانسيت يوم عيد ميلادي .. فهي بنت عمتي زينا .. دلع زينب كما يحلو لها .. في عيلتنا كله مدلع نفسه

فإذا منعتها ظروفها ولم تتواجد بنفسها ، كانت تبعث لي بخطابات بعلم الوصول لأفتحها وأجد فيها أرق الكلمات وأجمل الكروت

وكانت تلك هي المرات الوحيدة التي يصلني فيها خطابات بأسمي .. ربنا يسعدها كما أسعدتني

ويرزقها بالزوج الصالح إللي يقدرها ويعرف قيمتها

ففي مرات كثيرة كانت هي الوحيدة من خارج أسرتي الصغيرة التي تتذكرني وتحتفل بي أجمل أحتفال

ومازلت ضعيفة أمام من يتذكر يوم عيد ميلادي

وتحسباً للظروووف .. والزهايمر ... بيقولو شغال الله ينور اليومين دول أقول

كل سنة وأنتي طيبة يانفسي

غزة ... تااااني

2008-02-26T16:40:00.001-08:00

من واقع زياراتي ولفي علي المدونات الصديقة تبين لي مدي التضليل الذي يعانيه بعض المدونون ...وتأكدت من أن المصريين شعب عاطفي بالدرجة الأولي يتحرك وينفعل ويتفاعل بدافع من قلبه المرهف الطيب .. وهذا شيء يسعدني بالرغم من توابع تلك العواطف الجياشة

ولقد كنت مثلكم جميعاً حتي تبين لي مدي الضلال الذي كنت أحياه .. أنا عارفة أن كلامي ده هايزعل مني ناس كتييير وجايز يخاصموني ويقاطعوني ، لكن الأختلاف في الرأي لا يفسد للود قضية ، هكذا تعودت داخل المجتمع التدويني في رحلة دامت أكثر من سنة بينكم ومنكم ومعكم

لقد قامت المظاهرات ولم تنتهي من أجل جمع تبرعات لأخواننا الفلسطينيين ومساعدتهم في التغلب علي حصارهم الإقتصادي ولكن ألم نسأل أنفسنا من سيجمع لنا التبرعات لتعيننا علي تقشفنا الإقتصادي ... الفلسطينيون ياجماعة لا يحتاجون إلينا لنجمع أموال لهم ، فهم ملوك وعباقرة في جمع التبرعات
مالذي غيرني ؟؟ مالذي جعلني أتنحي عن مساندتهم ، والشفقة عليهم .. فإتجاهي هذا ماهو إلا رد فعل لما قرأته عن كونهم بدأوا حربهم الأهلية فكيف بالله عليكم أن أكون ملكية أكثر من الملك .. فبقتلهم لبعضهم البعض خسروا تعاطف الكثيرين معهم
يالقسوتي وبرودة أعصابي .. لم تعد تحركني وتؤثر بي صور القتل والوحشية التي يتعرضون لها فصور قتلهم علي أيدي اليهود خيراً لهم ألف مرة من صور قتلهم بأيدي أخوانهم
دخلوا مصر ؟؟ نعم دخلوها .. وأدخلوا معهم كذلك الأسلحة و الدولارات المزيفة
طلبوا منا حق اللجوء .؟؟ يلجأون ثم يشترون أراضينا فهم أقدر منا علي الشراء بحكم أنهم أغني وأكثر مالاً .. وأنا بقي دقة قديمة ولسة بعشق تراب بلدي وأخاف عليه من أي طامع عربي أو أجنبي علي حد سواء .. حد فيكم زار طابا .. جنة علي الأرض .. زرتها وكم تمنيت أن أعيش بها
أعذروني مرة تانية لأني مختلفة .. غصباً عني .. فدماء ضحايانا من رجال الأمن المساكين علي الحدود تعذبني .. لم يقتلون بأيدي يهودية فقط بل يقتلون بأيدي أخواتنا الفلسطينيين كذلك لمجرد أنهم ينفذون أوامر لم يضعونها بأنفسهم بل يسجنون لعدم تنفيذها
إذا أردت أن تختلف فمرحباً بك ولكن بدون تطاول
مع تحيات أم أحمد

سبع سنين بتنعي

2008-02-24T23:35:00.001-08:00

سؤال طرأ علي فكري ... ماذا يحدث للأزواج في السنة السابعة ... ليه كدة؟؟

الحب بيروح فين .. قديماً قرأت عن أزمة السنة السابعة في حياة كل زوجين وكيف أنها قد تطيح بعشرة العمر .. وللحق لم أصدق ماكتب حتي لمسته بنفسي .. فلست وحدي من مرت بهذه الأزمة بل جميع صديقاتي بلا إستثناء

يؤلمني ويحز بنفسي أن أري صديقاتي يعانين من تلك الأزمة ، ويؤلمني أكثر عدم قدرتي علي تقديم المساعدة .. بل حاجتي لها

كيف نعبر جميعاً تلك الفترة الحرجة في عمر الزواج ؟؟

لن أجاوب فأنا في وضع لا يسمح لي بإسداء نصائح فقد شرفتني السنة السابعة

ربنا يستر وتعدي هي وتوابعها

أرقص ياحضري ..فلسع . ياحضري.

2008-02-22T22:15:00.000-08:00

أنا زعلانة .. أنا مقموصة .. فيه حد يعمل كدة .. في عز الفرحة تنكد علينا ... يارااااجل

بقي ده أسمه كلام

ياحضري

حرااام عليك .. ده أحنا غلابة ولما صدقنا نفرح

طب هاتكسب أيه؟؟ فلوس

هو أنت ناقصك فلووووس

اللهم مالا حسد

أحنا اللي ناقصنا فرحة

ياشيخ حرام عليك ........بقي تهرب من بلدك كدة من غير مقدماات

إحتراف .. عاوز تحترف أحترف ... بس مش بالطريقة المهينة دي ويكون في نادي يستاهل عشانه تسيب أمجادك

وبطولاتك وجماهيرك الحبيبة .. بتفلسع ياحضري .؟؟

بقي يامعلم ... تسيب نادي البطولات وتهاجر لنادي درجة عاشرة وتضيع تاريخك في بلدك كدة بجرة غباء

وعلي رأي المثل

جات الحزينة تفرح مالقتلاهاش مطرح

فلتسقط نانسي وهيفا

2008-02-10T11:33:00.000-08:00

لماذا يضرب شبابنا عن الزواج

----------------------------------

هل لضيق ذات اليد ....لأن الشباب ياحرام مش لاقي يأكل يبقي هايروح بسلامته يتجوز ومامعاهوش اللي يفتح بيه بيت

. أبداً والله .. اللي عاوز يتجوز هايتجوز حتي لو في بيت أهله وبيقضيها .. ممكن يعمل جمعيات يستلف .. بيتصرف وخلاص

جايز عشان ... البنات مزوداها أوي وطلباتهم تقصم الوسط إشي شبكة بالشيء الفلاني ..وإشي مهر قد فلانة الفلانية ... وإشي فرح في الفندق الفلاني اللي صاحبتي عملت فيه فرحها

لأ برضه ياسيدي مش كل البنات طلباتها مبالغ فيها وفيه ناس طلباتها بسيطة أوي أولها انها تستر البنية وخلاص

طب أيه ياستي ؟؟؟؟

السبب ياأخواننا إن شبابنا ... ربنا يحرسهم نفر نفر... نفسهم يتجوزوا بشبيهات نانسي لأجل تدلعهم أو شبيهة هيفا وجسم هيفا

وطبعاً معروف أن مستوي الجمال في بلادنا ماوصلش لجمال نانسي وجسم هيفا .. مالها مني زكي ولا سعاد حسني برقبتهم ... مايعرفوش أن هيفاء ونانسي وراهم جيش عالي المستوي .. ولا جيش أمريكا في العراق ...عمالين يسنفروا ويبيضوا ويلونوا ويلبسوا ويزوقوا ..

وفيه شباب متواضع ومتساهل في المسألة دي .. وبيقول مش ضروري تبقي البنية شبه نانسي أوي بس المهم تكون خفيفة ولونة ذيها وواخدة كورس في الدلع

طب حرام عليك بقي .. هو أنت أديت البنية فرصة تدلعك وتخاصمك آه وتسيبك لا

وياما يابني كان فيه بنات رزينة وعاقلة وبعد الجواز ربنا فرجها عليعهن وبقوا في دلع ومياصة نانسي

بصوا يابنات لازم تدلعوا شوية مادام الشباب مخهم تربس علي نانسي يبقي أبقوا ذيها وكله بالأدب... ماشي

يعني بلاش التكشيرة اللي علي الوش وفكوها شوية

وألا فيه حاجة أسهل ممكن تعملها البنات تقعد ليل ونهار قدام التليفزيون وتأخد دروس خصوصية في الدلع من فنانين آخر الزمن ... بيلبسوا أزاي بيضحكوا أزاي بيرقصوا أزاي ؟؟؟

والله يرحمك يازمن كان فيه الراجل بيختار البنت علي أساس الأدب والأخلاق والعقل الرزين ومرحباً بك يازمن طغت فيه هيفاء وأخواتها علي عقول الشباب

المشكلة كبيرة ياجدعان وأنا شايفاها بعينيا بس مش عارفة أعمل حاجة

ففي محيطي وحده حوالي 30 بنت مش لاقية عريس وفي نفس المحيط فيه ييجي 20 شاب مضربين عن الجواز كلهم قرايبي

بذمتكم مش ده يبقي حرام ... أنا بجد هاتجنن طب نعمل أيه بس نقفل القنوات اللي بتعرض مقاييس للجمال خيالية ونادرة الوجود عشان شبابنا يرضي بالموجود ولا نسيبهم في أوهامهم منتظريين ومصممييين علي البنات اللي لو اتوجدوا هايبصولهم علي ايه ياحسرة دول لا هما شبه راغب ولا جسم عمرو دياب

و سلامي للجميع وربنا يهدي ويشفي

ياعالم ياظلمة

2007-05-19T12:05:00.000-07:00

كنت في فرح ..ولسة راجعة العروسة بنت ذي الفل عندها في حدود 30 او 35 بالكتير

اما العريس فهو ارمل من تلات سنين وقد قرر اخيراً ان ينسي حب شبابه ويتزوج مرة اخري

مش دي القضية

القضية انه بياخد معاش الله يرحمها مراته الي الان وهذا المعاش لن يلغي بجوازه من أخري

في حين ان الست اي ست لو جوزها مات وتزوجت يلغي المعاش

يشمعني بقي حتي المعاش فيه خيار وفاقوس

رغم حاجة المرأة للمعاش اكتر من الراجل التي قد تكون لا تعمل في معظم الأحيان

يبقي عشان ايه المعاش يتلغي وتتحرم منه لمجرد انها عملت بشرع ربنا واتجوزت

يعني مثلاً .. عندي جارة جوزها مات وسابها وماكانش عندها ولاد وتزوجت في الاول عرفي عشان المعاش مايتلغيش

وبعدين حولته لرسمي عندما حاصرتها الالسنة والغي المعاش رغم انها مازالت في حاجة اليه

بقي ده اسمه كلام ده

بييييييييييييييييييب

2007-04-03T12:31:00.000-07:00

بــــيييــــب بـــييــب أنابيــــب

-----------------------
لأني قليلة البخت وقليل البخت يلاقي العظم في الكرشة فقد حدث معي الموقف الآتي مش مرة واحدة
ولا مرتان بل ثلاثة
سمعتم جميعاً عن مشكلة الأنابيب المنفسة اللي بتفرقع الشر برة وبعيد مجرد سمع أما أنا ولأني جربت
ولمست وعشت كل مشاكل البلد دي فكان لازم أجرب بنفسي أمال أيه ؟ هو أنا شوية في البلد الخربانة دي
فالقصة بكل بساطة تتلخص في الآتي
فقد أشتريت أنبوبة غاز للبوتاجاز من بائع علي عجلة من الشارع ذي كل الناس ورحت عملت نفسي فلحوسة وقلت أعتمد علي نفسي وأغيرها ومش لازم أستني زوجي العزيز عشان يغيرهالي وفكيت الأنبوبة القديمة
ـ واللهي ييجي مني بت مخي نضيف ـ وركبت جلدة جديدة ـ مش بقولكم واعية ومدقدقة ـ وركبت المنظم في الأنبوبة الجديدة ـ الجديدة دي لونها أخضر مجرب أكل عليها الزمن وشرب ـ وثبته بكل قوتي بالمفتاح الإنجليزي
ـأهوه عملت اللي عليا لا ملامة بقي ـ وفتحت الأنبوبة وقلت أجربها ثم وأه من ثم أشعلت عود ثقاب وقربته من فوهة الأنبوبة لقيتها خير اللهم أجعله خير مولعة ولأن محسوبتكم غشيمة في مسألة الحرايق دي قعدت أنفخ بكل ماأوتيت من قوي هففففففففففف هففففففففففف هفففففففففففففففففففففففففففففففففففففففففف
مافيش فايدة قلت أرش مية فتحت الحنفية ولاني محظوظة بجد فتحت المية السخنة بدل الباردة وغرفت منها بيدي غرفة واحدة ـ لم أكررها طبعاً فقد حرقت يداي ـ ورميتها علي النار المشتعلة ولم تنطفيء نسيت أقولكم أن النار كانت كبيرة شويتين فأحضرت فوطة مطبخ وبللتها بالماء ووضعتها علي فوهة الأنبوبة فأنطفأت وربنا ستر
لكني مازلت أعاني من توابع الخضة وبقي عندي هسهس من الأنابيب بشكل غريب وبقيت أغير طريقي في الشارع لمجرد مرور أي بائع أنابيب بالصدفة في الشارع الذي أقصده

هذا الموقف تكرر معي ثلاث مرات وفي كل مرة أحاول أن أغير الأنبوبة المنفسة بأخري فيرفض البائع أن يغيرها الا بعد دفع ثمن لأنبوبة جديدة ـ سلامات يابتوع حماية المستهلك وهأ و أو أو ـ

ده كله بيحصل مع منتجات شركات البترول فاحشة الثراء ـ اللهم لا حسد وقر ونق ـ اللي مستخسرة تغير أنابيب الغاز التي تتسبب في العديد من الكوارث والحوادث التي نقرأ عنها كل يوم في الصحف اليومية وكأنها مقرر علينا وفي نفس الوقت نجد الباشمهندس وزير البترول ـ اللهي مايفرقع أنبوبة بيتهم بووووووووووووم ـ
يتبرع بالملاييين للاعبي الكورة الشراب والكورة الأرضية وعلي رأي المثل أقرع ونزهي
أو مليونير وأنابيبه منفسة
ولع ولع ياعم الحاج
ولا بلاش هفففففففففففففففففففففف

مبروك علينا الدستور

2007-04-01T09:44:00.000-07:00

رغم كم التشاؤم الذي حاصر الإقتراع علي الدستور بس انا متفائلة تسألني ليه ؟ أقول ماأعرفش
بس جايز لأنها كانت أول مرة أدخل فيها لجنة إنتخابية في حياتي زحمة بشكل تقولش بيوزعوا لحمة !!!0
فقد تم شحن الناس إليها بوعد صريح ومباشر بمكافآت اذا تم المراد من رب العباد وتم التصويت بموافقون بإذن واحد أحد وعلي مايبدو فقد كان كل من دخل هذه اللجنة أمي مكتوب علي جبهته حمار بالبنط العريض لا يراها إلا مراقب اللجنة وحده ربنا يقوي بصيرته قادر ياكريم
ويعلي مراتبه وسرايرة ودواليبه كمان فكان يشاور بأصبعه للمنتخب كي يختار الموافقة ولا يعطيه فرصة لكي يقرأ نصوص الدستور التي يقترع عليها وطبعاً محسوبتكم ماتحبش حد يمليها تكتب أيه فأخذت ذيلي في سناني وقلت يافكيك ولا أقترعت ولا حاجة بس مافي مشاكل المرة دي عتبت اللجنة برجلي والمرة الجاية مش هاأعتبها تاني ابداُ
وياسلام علي الديموقراطية يامحلاها والدنيا ربيع والجو بديع وعشان أبقي عملت اللي عليا ياريت ياأخواننا نعمل في صمت وياابن الحلال انت وهو كفاية مظاهلرات بقي مامنوش فايدة مش أنا اللي بقول ده جدو سعد زغلول الله يرحمه ويبشبش الطوبة اللي تحت راسه هو اللي بيقول عيشوا عيشة أهاليكم بقي وبلاش التطلعات الدستورية الوهمية دي مافيش إمكانية أن اللي أتوافق عليه يتغير يعني هو الحكومة يطول عمرها ربي فاضية كل شوية عشان تراضي الشعب النمرود ده ، أيه يعني لما السلطة تبقي في أيد رجال الشرطة الشرفاء الأتقياء اللي الواحد فيهم مابيسبش السبحة من أيده

وأيه يعني لما نبعد القضاة عن الإشراف علي الإنتخابات هما فاضيين للتفاهات دي وبعدين كل واحد عنده ضميره يشرف عليه بدل مايجييب حد من برة يعطله

وأيه يعني لما الريس يحل مجلس الشعب وقت مايحب وحسب الظروف وانت هاتفهم أكتر من الريس ياصعلوك

وعشان ماأروحش في داهية والعياذ بالله أقر أنا الموقع أدناه أننا شعب ولاد ستين في سبعين مابيملاش عينينا إلا التراب

ملحوظة صغنونة

-----------

الصورة دي مش من إنتخاباتنا بس أحنا برضه بنلطش أيدينا بالحبر الأحمر ومافيش حد أحسن من حد

أبجني تجدني

2007-02-16T06:56:00.000-08:00

بالذوق بالعافية هاتدفع

من منا لم يدفع رشوة في حياته ؟؟

فبرغم علمنا أن الراشي والمرتشي في النار وبئس المصير إلا إننا جميعاً وقعنا في فخ دفع الرشوة رغماً عنا

وسأسوق إليكم عدة أمثلة مما رأيته بأم عيني وأبوها كمان

- فعندما كنت أستقل سيارة أجرة أستوقفنا عسكري للمرور موجهاً كلامه لسائق التاكسي : أنت مش رابط الحزام ليه ؟؟ هات الرخص وأبقي خدها من المرور

السائق مرتعباً : يابيه أنا واحد علي باب الله وده رزقي ورزق عيالي، ووضع في يد العسكري ورقة بعشرة جنيهات

فردها العسكري متأففاً .. فقلت في سري لسة فيه ناس عندها ضمير ومابتقبلش الرشوة .. ولكنه أتبعها بقوله العشرة جنيه دي تجيب بيها كيس لب تقزقزه أنت والعيال أنا مابأخدش أقل من ثلاثين أهيف ، فدفعها السائق رغماً عنه فمجبر أخاك لا بطل

أظن موضوع رشاوي المرور ده منتشر أوي وياسلام بقي لو كنت آخر الشهر ومامعاكش تدفع الرشوة يبقي راحت عليك ياجميل الرخصة وهاتدوخ عليها السبع دوخات لحد ماترجعها تاني

المثل التاني

واحدة بنت حلال عاوزة تشتغل في شركة بترول سألت وأستفسرت عن كيفية التحاقها بهذا العمل المجزي دلوها ولاد الحلال عن التسعيرة وهي عشرين ألف جنيه كل جنيه ينطح جنيه تدفعهم بالتي هي أحسن للمسؤلين عن تعيينها

ودفعت الفلوس بعد أن عرفت أنها لكي تلتحق بأي عمل حكومي يجب عليها الدفع أولاً وبنفس راضية دفعت الفلوس وهي الأن علي وشك التعييين أدعولها بقي تتعين ومايتنصبش عليها

المثل الثالث

عاوز تهرب من التجنيد عاوز تفلسع وتريح وتدلدل رجليك دورلك علي ضابط يستحسن لواء يكون ضميره ميت وشبعان موت وأعرض عليه رشوة وفاصل معاه لحد 3الاف حنيه وأضمن أنك لا هاتشتغل مراسلة ولا هاتنضرب علي القفي ولا هاتضيع سنه أو ثلاث سنوات في تجنيد لا بيقدم ولا بيأخر

دي بلادنا بلد العز والفلوس الكتييييييير

حيرت قلبي معــــــــــــاك

2006-11-30T14:10:00.000-08:00

ماذا يريد الرجل؟
هذا الكائن الغريب أحترت معه وداب معه خزيني من الصبر
فالرجل قبل الزواج انسان شاعري لذيذ ومؤدب يعشق الكلام مع المرأة ويتمني لها الرضا حتي ترضي
ولو يوم بكت نزلت دموعها علي صدره كلهيب مشتعل ، ولا يهنأ له بال حتي يسعد محبوبته ويطيب بخاطرها ، ودائماً يلتمس لها الأعذار ولا يضغط عليها بطلباته وكأنها قطعة من الملبن الطري الذي يأبي بنفسه أن تقسو عليها أو كأنها ملاك منزل من السماء لا تحتمل عيش البشر

أما بعد الزواج فإن سي السيد الكامن في مخبئه يظهر بقدرة قادر ويخرج من قمقمه ليهين ويؤلم محبوبته ويتناسي كم كان يعشقها ويتحمل من أجل عينيها تحكمات أهلها وطلباتهم وكأن هذه المحبوبة قد أستبدلت ماأعرفش إذاي بأخري جارية ؟ ونزلت من مصاف الملائكة إلي دنيا البشر التعيسة فكلام الرجل ....عفواً ...أقصد كلام سي السيد قد أصبح أوامر عسكرية أو فرمانات واجبة التنفيذ
وابتسامته التي كانت تنير وجهه كلما رأي عينيها المبتسمتين قد أختفت وحل محلها عبوس نحت علي جبهته الرقم 111 والرومانسية أصبحت ذكري تتباكي عليها زوجته وتحيا علي ذكراها والمعاملة الخمس نجوم تحولت إلي نجمة واحدة مصدية وكأنه يعامل عم عبده البواب ، واللسان الذي كان بينقط عسل أصبح سليطاً ذو مفردات غريبة لم تعتاد عليها محبوبته ، ولم تعد دموعها تهز كيانه كما كانت من قبل بل أصبح يتركها تنام باكية شاكية لله وحده حالها وضعفها

فعلاً.... تحولت المرأة من حبيبة إلي جارية ومن ملكة متوجة علي عرش قلب حبيبها إلي مجرد زوجة

نحن معشر النساء نفضل الحب عن الخبز والمعاملة الطيبة عن معاملة الخادمات ويستطيع أي رجل ذكي أن يكسب محبوبته بكلمة طيبة تخرج من فمه ويستطيع أيضاً أن يكسب جارية وخادمة ومحبوبة في نفس الوقت دون أن يشعرها بذلك بل سيجدها أسيرة لكلماته ورغباته وستتحين هي الفرصة لتثبت له أنها تستحق حبه وحنانه وطيبة قلبه

بس خلااااااااااااااااااااااص

حيطان بندهن أبواب نسنفر شبابيك نبيض

2006-11-30T14:07:00.000-08:00

أخدت كورس في النقاشة والزخرفة .. تصدقوا بجد لاقيت نفسي .. وأكتشفت أني فنانة وييجي مني بس للأسف أنا واحدة ست وعندي برد .. قصدي عندي ولاد.. ياسلام لو كنت ولد .. كان زماني دلوقت أسطي نقاش .. كسيب قد الدنيا

ليه الشباب اللي قاعدين علي القهاوي مايقلدوش الأسطي أم أحمد

من مدونة صديقة

2006-11-11T10:37:00.000-08:00

أنواع
ينقسم الرجال فى مجتمعنا الى أربعة فئات وفقا لنظرتهم الى المرأة… وهذا التقسيم لم تقم به منظمة الأمم المتحدة أو لجنة حقوق الأنسان أو مؤتمر المرأة العربية… وأنما هذا مجرد رأى صوتها

الفئة الأولى:

الرجال فى هذه الفئة ينظرون للمرأة على أنها مخلوق (من لحم ودم) تماما مثلهم, لها الحق فى الحياة والمشاركة فيها, وأن دورها لايقل أهمية عن دورهم, ولهذا السبب يجب احترمها ومعاملتها ك "أنسان" اخر

الفئة الثانية:

الرجال فى هذه الفئة ينظرون للمرأة على أنها مخلوق (من لحم ودم) تماما مثلهم, لها الحق فى…… حسنا! أنا لا أكرر نفس الكلام ولكن رجال الفئة الثانية يتماثلون مع رجال الفئة الأولى, الفارق الوحيد هو أنهم يقولون ما لا يفعلون! فتجد الرجل منهم يتشدق بعبارات لنصرة المرأة والدفاع عن حقوقها.. ولكن عندما يأتى وقت الفعل تجده يعامل المرأة على أنها "شئ" اخر

الفئة الثالثة:

رجال هذه الفئة يعترفون بوجود المرأة كأنسان… ولكن ليس كأنسان مفكر! فهم يؤمنون بدور المرأة فى المجتمع ولكن لا يؤمنون بأهمية هذا الدور, ويعملون على الاستخفاف به دائما

الفئة الرابعة

-------------:

وهم أدنى أنواع الرجال. فهم ينظرون للمرأة على أنها مخلوق وجد لأشباع حاجتهم الجنسية … مخلوق لا يفكر ولا يشعر
واذا سألتونى عن رأيى, فسأقول أن أقبح فئة من وجهة نظرى هى الثانية! لأن رجال الفئات الأخرى يفعلون ما يفعلون على اقتناع.. اذا فالحوار معهم جائز واقناعهم ممكن. ولكن رجال الفئة الثانية مقتنعون تماما بأهمية المرأة ولكن عند وقت الفعل يعودون الى غرائزهم الأساسية… فهم لا يريدون التخلى عن غرائز الأنسان البدائى والتحلى بصفات الأنسان المتحضر. والغريب فعلا أنهم يشكلون نسبة كبيرة من الرجال فى مجتمعنا.. حيث تجد الرجل منهم فى العمل والشارع يعامل النساء بكل احترام وتقدير ولكن فى المنزل يعاملعها كأنها جارية أو أدني من ذلك…… فى انتظار ارائكم

هذا الموضوع قرأته في مدونةصوتها وعجبني جداً لأنه بيعبر عن حال الرجال في مجتمعنا

حاول تقول حاجة تفرح

2006-11-10T05:14:00.000-08:00

أعتذر لكل من زارني في مدونتي أو ترك تعليقاً ولم ارد عليه فلم أستطع ان اكتب لظروف خارجة عن ارادتي فكمبيوتري العزيز كانت صحته تعبانة اوي اليومين اللي فاته دول و
شكراً لزيارتكم
أنا كنت هاكتب في موضوع بس لقيته مستفز شويتين فأجلته لبعدين أما الان فعاوزاكم تقولوا لي أي خبر حلو ان كان عام او خاص، زهقت بقي من جو الكآبة ونفسي في حاجة تفرح عندكم حاجة تفرح !!!ها
أم أحمد

تحــــــت الـــــــسحابة السودة ياوهيـــــبــــــة

2006-10-20T06:53:00.000-07:00

تحت السحابة السودة ياوهيــــــــــبـــــــة

يلا معايا نكح كحة كبيييرة تخرج من نخاشيش قلب الشعب الغلبان

خرج كل الدخان إللي جواك ماتتكسفش ، ولا يهمك كلنا في السحابة السودة سواء كح كمان أيييوة كدة

كل سنة تعدي علينا يقولوا لنا السنة دي هاتبقي آخر الأحزان والسنة الجاية هنكون خلصنا من السحابة الهباب دي ، وتمر السنين علينا ومافيش فايدة والسحابة طابقة علي صدرنا وشكلها مش ناوية تهوينا ولا تفارقنا ، طب بذمتكم تفارقنا إذاي والبلد لسة مليانة بالجهلة مش جهل قراية وكتابة لكن جهل بيئي مستفحل والحق يقال وزارة البيئة حاولت توعيهم بخطورة التصرفات الغير مسؤولة ولكن لا حياة ولا حياء لمن تنادي ، فالمواطن عامل ودن من طين والتانية من عجين وهاتك ياحرق زبالة وحرق قش ارز ، ولا العربيات إللي عاملة ذي المداخن المتحركة ياأخي العربية من دول بتبقي ماشية ووراها سحابتها السودة الخصوصي

طبعاً كل مشاكلنا ممكن تتحل لو حكومتنا المصونة عملت شوية رقابة ، معلش أحنا شعب محتاج وصاية ورقابة حتي يتحرك الضمير الراقد تحت الأنقاض وياحبذا لو زرعت جناين أكتر حتي يحدث إتزان بين الدخان والنباتات وياريتها تمنع سير العربيات اللي بتخرج دخان ، ولحد مالحكومة تلاقي حل ياريت لو مافيهاش غلاسة توزع علينا كمامات نحمي بيها جهازنا التنفسي إللي بقي صوته مثل الشكمان المخروم

سؤال أخير محيرني ومطير النوم من عيني :ـ

ياتري ياهل تري ممكن نلاقي حل جذري مريح لمشاكلنا البيئية ؟ أنا قريت في كتب التاريخ أن نابليون لما دخل مصر أعدم العديد من المصريين لرميهم القمامة في الشوارع ورغم قسوة هذا العقاب إلا أنه حكم عادل وحتي لا أتهم بالقسوة وإنعدام الرحمة فيكفي الحبس كعقاب لكل من تسول له نفسه علي تلويث البيئة والإضرار بالمواطنين الآمنين الغلبانين

وألا أقول لكم حل أسهل وأظرف أحنا ممكن نستورد شعب صيني وحكومة صينية ننضف بيها البلد ونتخلص من السحابة الهباب دي !!!!ة

هنــــــــــــــيالـــــــــــــك يا مـــــــــــواطـــــــــــن

2006-10-13T14:33:00.000-07:00

هنيــــــــــــــالــــــــــك يـــــــــــافــــــــــــاعـــــــل الـــــــــخيــــــــــر والــــــــــثواب
تبرعوا لنجدة حكومة لا تستطيع حل مشاكل شعبها .....ه
حكومة محتاجة حد ياخد بإيديها ورجليها كمان .....ه
حكومة محتاجة لمتبرع لينشيء لها المستشفيات ويعول لها الأيتام ويرعي المحتاجين .....ه
حكومة إعلانات جرائدها القومية تفتتح بجملة تبرعوا من أجل المريض الفقير ....ه
حكومة تهوي الشحاتة علي صفحات الجرائد والتلفيزيون .....ه
حكومة ليست فقيرة ولكن من أولوياتها إنشاء المشاريع والمباني التي يتم تكهينها بعد قليل ....ه
حكومة تماثيلها أهم من بني آدمينها الأحياء....ه

حكومة دراعها طايلة ومفترية علي الغلابة بس .....ه
وعشان الصدقة تجوز ولا يشوبها شبهة الرياء فلن اذكر أسم النبي حارسها والحدق يفهم بقي
فإذا رق قلبك وفرت دمعتك
تبرع علي حساب رقم0000حكومتنا 00000

إتبرع ولو بجنيه ... إتبرع بإللي تقدر عليه

for the others

2006-10-03T17:10:00.000-07:00

حرصاً مني علي توضيح وجهات نظرنا في الغرب ومحاولة مني لمحاورة الآخر أكتب هذا البوست باللغة العالمية حتي يقرؤها كل من تطء عيناه مدونتي ولو عن طريق الخطأ

.....................................................................................

Do you want to know about our Islam ?
Read about it with an open minde , don't ever take Ausamah Ibn Laden as our symbole , just look at your self , don't you have terrorists like him even more savage ?
Don't deny that you have ones , who destroy & hate every body regardless their color , religion & race , for example, Hitlar, Airish army ,etc.

You are insulting our great prophet Mohammed , and we respect yours , not because we are afraid of you , but because our religion orders us to respect your religions.
Could you dare to insult the Jewish prophet Moses ?
it is impossible .

If you fairly think about our Islamic instructions you will find how it is useful in solving ethic's problems ,
Our Islam orders us not to attack innocent people, but to defend ourselves against enemy like our prophet who was harmed by unbelievers for 14 years before he took his rights .

To be fair I don't totally blame you for not being biased for us , I blame most of your movies which gave you a false image about how we look like
I have two examples from your movies that strengthen my own idea .

1st film: the father of the bride , I had enjoyed watching this film until they represented the rich Muslim man who wanted to buy the house of this father , he treated his wife so roughly ,he was a man of no heart didn't appreciate human feeling
2nd film : the independence day , Have you seen how they represented the Jewish smart man who saved the world while the Muslims were still living in the Mamluk ages with no sign of civilization
By the way our civilization is the root of yours when we were true Muslims .

You really need to know the others from a trusted source than movies'.

My greetings
Um Ahmed

يابني الواسطة دي ماتنفعش هنا !!! ه

2006-10-01T08:33:00.000-07:00

عماد هو ابن متفوق لسائق تاكسي مجتهد ومحترم
ألتحق عماد بكلية الحقوق رغم حصوله علي مجموع كبير يدخله كلية مما يطلق عليها كليات القمة

وعندما سأله والده لماذا كلية الحقوق ؟ه
قال :حتي أعرف حقوقي كاملة وأحافظ عليها
وبالفعل تفوق عماد في كلية الحقوق وحصل علي تقدير أمتياز في جميع المراحل
وعندما أعلنت وزارة العدل عن حاجتها لشغل وظائف وكلاء نيابة فتح بشرط حصول المتقدم لشغل الوظيفة علي تقدير جيد فما فوق ،زف إليه أصدقائه هذا الخبر وهم علي ثقة بجدارة زميلهم لهذا المنصب بناءاً علي تفوقه وحسن مظهره وأخلاقه العالية

فتقدم عماد لشغل هذا المنصب وفي المقابلة الشخصية سأله الممتحن : أنت فعلاً ممتاز وتقديرك هايل بس ياتري واسطتك أيه ؟ه

رد عماد بكل ثقة ويقين : وسطتي ربنا

الممتحن : ونعم بالله يابني بس الواسطة دي ماتمشيش عندنا

هذا ماحدث في وزارة العدل ، يااااااااظلمة

وخرج الشاب كهلاً من هذا الإمتحان وهو يلعن هذا البلد الفاسد

وذهب إلي بيته تسبقه مرارة الظلم الواقع عليه ليتقاسمها مع أبيه وأمه الكادحان الحالمان بتغيير الواقع الحالي ولكن هيهااات خدوها اولاد الكوسة وطاروا ويابخت من كان النائب خاله

وفي الجهة الأخري ، كنت بأحد الأيام في نادي وجلست بجواري سيدة وهاتك يارغي قعدت تتفشخر بجوزها المستشار الذي ورث المهنة عن والده وحكت لي عن حلمها برؤية أبنائها في مهنة والدهم فقلت لها ممازحة : كوسة يعني !!ه

فردت بهيستيريا غير مبررة : لأ ده حقه ، يعني أبوه يبقي مستشار قد الدنيا وإبنه يطلع مايلاقيش شغل !!!ه

وحكت لي عن صديق زوجها الذي أجبرابنه علي تحويل أوراق ألتحاقه من كلية الطب إلي كلية الحقوق حتي يضمن له عملاً مؤكداً بعد التخرج ، فسكت ولم أعلق علي كلامها حتي لاينالني منها إتهاماً بالحقد علي أرباب الكوسة

وهكذا أتوقع أن يغرق هذا البلد في بئر من الفساد الذي حفرناه بأنفسنا فشباب الكوسة غالباً مايكونون غير أكفاء

وفشلة وكسالي وكل مميزاتهم أنهم مسنودين -واللي ليه ضهر ماينضربش علي بطنه - وعلي الجانب الآخر يتجه الشباب المكافح إلي الإنتقام من بلده التي ظلم بها عن طريق إتجاهه للحرام أو الإرهاب أو قد يسافر إلي الخارج ويعمل في غسل الصحون ويدفن تفوقه في التراب وقد يبيع نفسه وعلمه لمن يدفع أكثر حتي لو لصالح الأعداء

هذه هي مصر بفئتيها الظالمة والمظلومة فالواسطة والمحسوبية أصبحت قانوناً ملزماً وحق مكتسب لا جدال فيه وبعد كدة نشتكي أن الريس عاوز يورث أبنه الحكم فإذا كانت جميع المهن تورث فما بالك بالرئاسة ؟؟؟مش بذمتكم يبقي حرام لما ابن الريس مايلاقيش شغل وهو أبوه ريس مش كدة ولا أيه ؟؟

تنويه مهم

----------

المدونة دي زوروها وهاتدعوولي

http://khaledelsawy.blogspot.com

أكتشفت مدونة راااااااائعة للفنان الرائع خالد الصاوي ياريت تزوروها

تخيلوا خالد العظيم ده عامل بلوجر كدة ذي حالاتنا وبيكتب شعر وخواطر ماحصلتش

انا عارفة ان مدونته مش محتاجة دعاية بس انا عاملة التنويه ده عشان خاطركم صدقوني هايعجبكم ..ه

2006-09-27T17:11:00.000-07:00

حدث في مثل هذا اليوم
في مثل هذا اليوم حصلت علي لقب زوجة ينبض بين جنباتها قلب فتاة صغيرة
في مثل هذا اليوم تركت بيت أبي وحضن أمي لأعيش مع رجل غريب عني –وقتها طبعاً – والغريبة
إني كنت طايرة من الفرح وسعيدة بهذا الأختطاف فيصبح هذا الغريب هو ولي أمري
الجديد بعد معرفة دامت سبعة شهور فقط
في مثل هذا اليوم لبست الفستان الأبيض والطرحة وجلست في الكوشة بجوار عريسي

ليتفرج علينا أمة لاإله إلا الله ورغم عدم أقتناعي بمدي جدوي هذه الأفراح فقد كنت سعيدة لسعادة عريسي

في مثل هذا اليوم تنازلت عن سرير عمري لأختي الأصغر مني فقد أصبحت في غني عنه بعد أن حصلت
علي آخر أكبر في منزل الزوجية ورغم ذلك مازلت أشتاق لنومي الهانيء عليه الممتليء
بالأحلام الوردية الطفولية .... تصدقوا عمري ماشفت عليه كابوس واحد ... سبحان الله
في مثل هذا اليوم تحولت ساعة الدردشة التي كنت أقضيها مع ست الحبايب إلي ساعة فراغ لم يستطع غيرها ملئها رغم مهاتفتي إياها يومياً

في مثل هذا اليوم تبدلت أحلامي فبعد أن كنت أحلم لنفسي بمهنة مناسبة وزوج

يسعدني أصبحت أحلم لغيري لزوجي وأبنائي بمعني أصح
في مثل هذا اليوم أمتزجا عالمان بعيدان كل البعد ليكونا جزيرة جديدة يتلاقيا عليها بمفاهيمها الخاصة وأحلامها المتفردة وبيئة جديدة خاصة بهما

اليوم عيد جوازنا مرت علينا خمس سنوات فيها السعادة والشقاء فيها الحب والبغضاء فيها الصفاء والإهتمام وفيها أيضاً الإهمال واللا مبالاة فهذه هي الحياة مش كلها عسل لازم يتخللها ساعات بصل برضه
كل سنة وأحنا طيبين ويارب أجعل أيامنا كلها حب

2006-09-25T13:49:00.000-07:00

آن الأوان ....أن نعلن توبتنا ...ونجدد إيماننا
ماذا ننتظر ؟
صحيح....متي نتوب إن لم يكن في شهر التوبة ؟؟؟
ومتي نستغفر إن لم يكن في شهر الغفران .؟؟؟
آن الأوان أن نلبي نداء الرحمن " وتوبوا إلي جميعاً أيها المؤمنون لعلكم تفلحون " النور31
التوبة بابها مفتوح .. وخيرها ممنوح حتي تخرج منا الروح
اللهم أرزقني قبل الموت توبة
اللهم صلي علي سيدنا محمد وعلي آل سيدنا محمد كما صليت علي سيدنا إبراهيم وعلي آل سيدنا إبراهيم ،
اللهم بارك علي سيدنا محمد وعلي آل سيدنا محمد كما باركت علي سيدنا إبراهيم وعلي آل سيدنا إبراهيم ،إنك حميد مجيد ..

لا إله إلا أنت سبحانك إني كنت من الظالمين ..
"اللهم إني أبوء لك بنعمتك علي وأبوء لك بذنبي فأغفر لي فإنه لا يغفر الذنوب إلا أنت"
رب أغفر لي وأرحمني فأنت خير الراحمين
"ربنا إن تعذبنا فإنا عبادك ، وإن تغفر لنا فإنك أنت العزيز الحكيم"

"ربنا لا تؤاخذنا إن نسينا أو أخطأنا ، ربنا ولا تحمل علينا إصراً كما حملته علي الذين من قبلنا ، ربنا ولا تحملنا مالا طاقة لنا به ، وأعف عنا وأغفر لنا وأرحمنا ، أنت مولانا فأنصرنا علي القوم الكافرين "

"ربنا آتنا في الدنيا حسنة وفي الآخرة حسنة وقنا عذاب النار"

"ياحي ياقيوم برحمتك أستغيث أصلح لي شأني كله ولا تكلني إلي نفسي طرفة عين وخذ بيدك ناصيتي إلي طاعتك ووفقني لما تحبه وترضاه من صالح القول والأفعال" .

"اللهم إني أعوذ بك من قلب لايخشع ، ونفس لا تشبع ، ودعاء لا يستجاب له "

اللهم إنك عفو تحب العفو فأعف عني ..
" رب أجعلني مقيم الصلاة ومن ذريتي ربنا وتقبل الدعاء "
رب أغفر لي ولوالدي وللمؤمنين جميعاً
وسلام علي المرسلين والحمد لله رب العالمين

مع تحيات دعوات أم أحمد الرمضانية

فوازير أم أحمد الرمضانية

2006-09-19T22:45:00.000-07:00

فوازير أم أحمد الرمضانية

كل سنة وكلكم كدة علي بعضكم طيبين ولإني بعزكم وماأقدرش أخيب ظنكم أنا جيت ومعايا

كام فزورة كدة واللي يجاوب عليها هاديله مصاصة بلبان من بتاعة الواد أحمد

الفزورة الأولي

------------

أختار الاسم المناسب ؟ خيم رمضانية أم خيم شيطانية ؟

من الواضح إن الشيطان شاطر أوي حيث تمكن من أن ينفذ إلي نفوسنا ويجري في دمائنا ويحتل كل ذرة من كياننا فهو ورغم عدم تواجده في رمضان فقد أستطاع أن يسخر من الباطن أفراداً من بني البشر لكي تحل محله وقت غيابه ،عندك مثلاً اللي بيحصل في الخيم الرمضانية التي ترتكب فيها كافة الموبقات وأصبحت صورة مصغرة لكباريهات شارع الهرم التي قد تغلق أبوابها أو تتحول إلي خيم رمضانية تقدم فيها الشيش وتغني فيها الراقصات شوف إزاي؟
الفزورة التانية

------------

هل تعتقد أن عدد حسناتك تتزايد كلما شاهدت مسلسلات تليفزيونية أكثر ؟

الواحد مننا ربط رمضان بالمسلسلات وأصبح قيام الليل يتوقف علي موعد متابعة آخر مسلسل وماأعرفش ليه ياأخي بيكربسوا المسلسلات في شهر رمضان بالذات ولسان حالهم يقول المسلسلات عبادة فأحرص عليها!! وكمان بقوا يعملوا فوازير وراء كل حلقة يشوفوك مركز ولا لأ أحسن تكون غلطت وقمت تصلي فرض ربنا ولا حاجة وتفوتك لقطة وياسلام سلم علي الفساتين اللي مابتلبسهاش الفنانات وكم العري اللي بيزيد في مسلسلات رمضان والألفاظ البذيئة التي أصبحت شيء عادي في مسلسلاتنا وأغانينا وعندك كمان عدد الممثلات اللاتي هجرهن الجمهور في السينما فنطولنا بقدرة قادر في التليفزيون ، وماقولكش علي البرامج ، ياخراااااااابي علي البرامج، اللي بيعرضوها وقت صلاة التراويح بالذات ، بيجذبوك ليهم ياسيدنا الأفندي بالعافية، اللهي يسامحهم ربنا

الفزورة التالتة

-----------

هل تعتقد من كتر إعلانات الزيت والسمنة ان بلدنا بقت مدهننة ومزيتة وفي حاجة ملحة لإعلانات الصابون عشان تنضف الدهننة دي ؟

طب كانت فين الإعلانات دي طول السنة بتروح فين ،أنا عندي الواد أحمد والواد عمر بيموتوا فيها ، لأ دول بيتكيفوا بعرضها في رمضان، آل يعني مش كفاية مدة عرض المسلسل لازم يذلوك قدام الإعلانات بالساعات عشان الحبكة الدرامية وتضييع الوقت ولأجل المسلسلات تتسقي الإعلانات اللي بتجيب للواحد تخلف من كترتها

الفزورة الرابعة

------------

هل يصح الصيام بدون فطار عشرين نجمة وطبق ؟ وهل يعتبر عدم شراء ياميش ومكسرات رمضان في غير رمضان حرام شرعا وفعل فاضح يعاقب عليه القانون ؟ ياسيدي في رمضان لازم ناكل ونشبع لحد مانقول يابس، كل ... كل ياعم ولا يهمك ده أنت ياحبة عين أمك هفتان وشقيان ونايم علي الكنبة قدام التليفزيون طول النهار يبقي ماتاكلش ازاي، ياخواتي صااايم، ودايماً بننسي حديث رسولنا" ثلث لطعامك وثلث لشرابك وثلث لنفسك"لأ ياعم كل، وكل كل حاجة عشان بعد الأكل تقعد ذي الفسيخة متنح قدام التلفزيون

الفزورة الخامسة

--------------

هل تعتقد أن حالتنا المادية تحتمل كل هذا التبذير في ظل الظروف الحالية وتزامن رمضان مع دخول المدارس ؟

ياعم كبرالجمجمة ماالأشية معدن ولما تزنق أوي معانا آخر الشهر نبقي نروح ندبها في أيتها مائدة رحمن ويبقوا يروحونا البيت علي نقالة عشان نلحق المسلسلات ويجعل بيت المحسنين عمار

الفزورة السادسة

--------------

هل تكون الشوارع ليها طعم بحق وحقيقي بدون شحاتين وخصوصاً في رمضان؟

وأنتم كمان عاوزين تقطعوا رزق الغلابة دول اللي بيظهروا كدة بقدرة قادر في رمضان أحنا هاننهب الناس مابتفتقرش غير في رمضان ماهما دول اللي خلصوا فلوسهم علي الياميش وعاوزين يكملوا بقية الشهر ربنا مايوريك ياابني، دي الحوجة وحشة وزي الطين، ولله يامحسنين لله

يااااااااربي نسيت ومن حنيتي و طيبة قلبي حليت الفوازير يلا كله هاياخد مصاصة بس لما الواد أحمد ينام
أخواني .......أعزائي رمضان ليس شهر الأكل والفسح والتليفزيون رمضان شهر عبادة بييجي في شهر واحد من السنة الطويلةوقال رسولنا الكريم صلي الله عليه وسلم فيما معناه لو علمتم مابشهر رمضان من خير لتمنيتم أن تكون كل شهور السنة رمضان ياجماعة ده شهر مايتعوضش لكن الأكل والفسح والتليفزيون ممكن تتعوض ياتري ياهل تري أحنا ضامنين نعيش لرمضان الجاي أنا ماأضمنش

مع تحياااااااااات فوازير الست أم أحمد

ساعد في إ خراج الأسئلة الحاج أبو أحمد في ساعة صفا

أنجلا.....فتاة مسلمة

2006-09-17T17:37:00.000-07:00

أنجلا ........فتاة مسلمة
ـــــــــــــــــــــــــــــــــــــ
أنجلا ...... أحتفظت بأسمها بعد إسلامها وأكدت علي تمسكها بهذاالأسم لأنه الأسم الذي
أختارته لها أمها الحبيبة عند ولادتها
أنجلا ........فتاة أمريكية رائعة الجمال أطلت علي شاشة التليفزيون في برنامج أمريكي
بحجابها الجميل وإبتسامتها الرقيقة وسعادتها الواضحة
وكانت هذه أول مرة بالنسبة لشخصي المتواضع التي أري فيها فقرة عن الإسلام كدين
معتدل بعد أحداث 11سبتمبر
ولم يكتفي البرنامج بلقائه مع أنجلا بل تقابل مع أسرتها أيضاً وسأل المحاور والدها عن
رأيه في أعتناق أنجلا لهذا الدين رغم أعتناقها إياه قبل أحداث سبتمبر الإرهابية مباشرة
وعبر والدها عن إحترامه لأختيارات إبنته وثقته في نضوجها لتختار ماتشاء
أما والدتها فقد أخبرت البرنامج عن كون أنجلا قد أصبحت أكثر سعادة ومرحاً بعد
إعتناقها للإسلام – يعني مش لازم يبقي البوز شبرين عشان نقول ده مسلم فديننا
دين سماحة وسعادة -0
هذا وقد سأل المحاور أنجلا عن شاب آخر قد أسلم ولكن علي طريقة ابن لادن وثكلتك
أمك الذي صرح بأنه يجب أن يفجر نفسه لكي يكون مسلماً علي حق- ببغان فقط فأبدت-
أنجلا إستيائها وغيظها من تصريحاته المستفزة التي تشوه صورة الدين الإسلامي في
جميع أنحاء العالم- قال يعني ناقصينه ده كمان –وأن الإسلام بريء منه ومن أمثاله 0
هذه أنجلا الصورة المشرقة التي يجب أن نحترمها ونفتخر بوجودها بيننا - ثبت الله إيمانها-
فإذا أردت أن تنصر الإسلام فعليك بإتباع تعاليمه التي حثنا عليها ومنها إحترام الأديان
الأخري وخصوصاً المسيحية فهم أقرب للذين آمنوا فنحن الآن في حرب أدخلنا فيها رغماً عن إرادتنا أعداء أنفسهم الإرهابيون

وختاماً
رحم الله البابا يوحنا بابا الفاتيكان الراحل الذي كان رمزاً متسامحاً للدين المسيحي والذي
كان داعياً عظيماً للسلام وأدعو إلي الله أن يلهمنا الصبر علي البابا بينديكت السادس عشربابا الفاتيكان
الحالي -اللي ولعها نار- فهو ورغم مركزه الديني بشراً يخطيء ويصيب
مع تحيات الست أم أحمد
_____________

إدبست تاني

2006-09-15T15:49:00.000-07:00

أنا إدبست يارجالة في تاج تاني ، هاااااااااااااااااا مادايم إلا وجه الله
الأخ العزيز وعد العيون دبسني ولأني ماأقدرش أرفض طلبه
فهاجاوب يعني هاجاوب
هل انت عقلانى اكثر ام عاطفى؟
انا عاطفية وكلي حنية
صف شخصيتك فى خمس كلمات؟
حساسة ، جبانة ، ساذجة وعلي نياتي ، حشرية ، قلبي أسود
اذا كان لكل انسان شبيه من الحيوانات,أى حيوان يشبهك؟
كابتن !! ينفع من الطيور ،البطة في طيبتها وهبلها
ما هو لونك المفضل؟
المحمحي المائل للزرقان
هل أنت أجتماعى اكثر ام منعزل؟
إجتماعي أوي أميل للرغي
ماذا يشكل أصدقائك بالنسبه لك؟
مكتب للفضفضة مفتوح 24 ساعة
هل أنت مرتبط بعائلتك؟
آه عند حضرتك مانع .0
هل أنت عصبى أكثر أم هادئ؟
هادىء منقط بالعصبية
هل تفضل فصل الشتاء أم الصيف؟
أيام ماكنت لسة بدرس كنت بحب الصيف والفضا اللي فيه
دلوقتي صيف شتا راحة يبقي الشتا احلي طبعاً
متى أخر مره بكيت فيها؟ولماذا؟

تصدق بقالي كتير مابكيتش تقريباً والله أعلم بقيت باردة حبتين
بس أنا كانت دمعتي قريبة أوي وكنت زنانة أوي
وآخر مرة فعلاً بكيت فيها لما واحدة عزيزة عليا زعلتني
صعبت عليا العشرة بس أتصالحنا والحمد لله
الضحايا بتوع المرة دي
بس بجد ماتزعلوش مني مجبر أخاك لا بطل
ودي علي فكرة حرية شخصية يعني اللي مش عاوز يجاوب بلاش
عشان كدة هاملاها بقي

جدو العزيز

روبابيكيا

مصرنا

كان وياما كان

REFORMER

kazabaza

WHITE WIZARD

متكاظي

كلبوظة لكن سمباتيك
طيارة ورق
رانيا
ضياء
عبد الله مفتاح
طيارة ورق
وخللي الباقيين في المرة الجاية ومانجيلكوش في حاجة وحشة يارب

خلو حريمها تمسكها...

2006-09-13T12:07:00.000-07:00

خلو حريمها تمسكها...ه
=============
من المعروف في كل بيت بجميع أنحاء العالم إن المرأة هي الأقدر علي ضبط ميزانية المنزل ‘ ولأن الأسرة هي الصورة المصغرة للدولة بأعتبار الدولة أسرة كبيرة حبتين فلماذا لا تمسك وزارة المالية واحدة واعية مدقدقة، مخها نضيف تقدر تحدد البلد عاوزة أيه ، وتقدر ترتب أولوياتها وياحبذا لو تكون أيديها ماسكة شويتين ،بلاش الهبل إللي عمال علي بطال ده وكأن المسؤول عن أمورنا المالية واحد مسطول سطل معتبر مافيش كلام ، وجايز يكون سوء تنسيق بين الجهات المختلفة ، ماأقدرش أحدد بالظبط فين الخلل بس أكيد فيه خلل ماحدش يقدر ينكر ده ...ه

خلونا في الست الوزيرة دلوقت عاوزينها تعمل أيه؟؟؟
مثلاً ما تصرفش فلوس علي رصف شوارع إلا بعد الحفر لمد مواسير المية والغاز والذي منه ماهو مش مال سايب مالوش صاحب لا مؤاخذة دي فلوسنا إللي بنتكلم عليها دلوقت ، شقانا وتعبنا ، وكمان ماتأمرش ببناء أي مبني بدون ماتعمل لجنة فاهمة وواعية تقوم بدراسة مدي أهمية المبني وملائمته للمكان
مش ذي الجراج إللي أتبني في رمسيس وكلفنا ملايين الجنيهات ودلوقت عاوزيين ملايين تانية عشان يهدوه صحيح أصحاب العقول في راحة من زمااااااااان .ه

وكمان ماتبيعش أي من ممتلكات الدولة إلا بعد ماتعمل خطة عمل لإستخدام ثمن هذه الممتلكات ، وكلام في سركم أنا ماأعرفش لحد دلوقت فلوس الخصخصة دي راحت فين ومن حقي الدستوري إني أعرف وألا أقولكم بلاش أحسن خاللي الطابق مستور بلاش فضايح .ه

وممكن كمان تعمل دفتر أولويات تحدد فيه مين أولي أنه يتصرف عليه يعني المواطن المصري الغلبان لازم يتحط علي قائمة هذه الأولويات وتوفر له بقي هواء نضيف، مسكن مناسب ، وأكلة نضيفة غير مسرطنة ماتسببش بلاوي في جتة النفر مننا ، وتوفر مية نقية ماتجيبش للواحد الفشل الكلوي والعياذ بالله ، وتحط في معلومها إن الإنسان أهم بكتير من الحجر حتي لو كان الحجر ده تمثال لملك عظيم مثل رمسيس فمثلاً ليه بدل ماكانوا ينقلوا رمسيس كانوا نقلوا التلوث أسهل ..... مش كدة ولا أيه ؟؟؟

قبل ماأنسي الست دي لازم تبقي واحدة فاضية ماوراهاش لا عيل ولاتيل يعني متفرغة لينا وبس وتكون عندها عربية كدة نص عمر عشان تلف بيها وتشوف البلد ناقصها أيه، ولما تخرج من الوزارة تخرج بدون إمتلاك عربية غيرها وبلاش أمور التربح الوظيفي ماهو لازم تبدأ بنفسها طبعاً ، وربنا يعينها علينا ...ه

قبل ماأنسي البوست ده مكتوب قبل حملة كلنا ليلي ماتبدأ يعني ماحدش ييجي يقوللي سكتناله دخل بحصانه – خليها حصانه عشان خاطري- يعني ماتقولش حملة ليلي بدأت بالفضفضة وقلبت بالإستيلاء علي فلوس الدولة .ه

علي فكرة قبل ماأمشي مدونة كلنا ليلي في الموقع ده للي يحب يزورها
http://laila-eg.blogspot.com

مع تحيات أحلام الست أم أحمد
----------------------------

هنا ليلي وحنفي

2006-09-09T18:24:00.000-07:00

هنا ليلي

جلست ليلي علي سريرها الخاوي تنتحب وتتسائل أهكذا تنتهي حياتي مع الرجل الوحيد الذي أحببته وأخترته زوجاً لي ؟؟؟ أتكون هذه النهاية المهينة تتويجاً لصبري ومساعدتي له؟؟ أيطلقني لذنب لم تقترفه يداي ؟؟
نعم لم أقترف إثماً أو خطيئة أستحق عليها اللقب العار مطلقة ، إنها إرادة الله الذي يقول كن فيكون ..فقد أراد الله أن يرزقني بطفل ثاني رغم أتخاذي لكافة الأحتياطات وإستخدامي للوسيلة الأكثر أماناً من وسائل منع الحمل أهذا ذنبي ؟؟
يخاف أن يكون جنيني أنثي تكبر وتنمو وتصبح كالبنات الغانيات المتساهلات وما أدراه فقد تكون هذه البنت سبباً لدخولنا الجنة بأخلاقها وحسن تربيتها ولكنه وصمها بالعار ورماها بالخطيئة وهي بعد جنيناً
أعادني بسلوكه هذا لعصور الجاهلية ، أراد قتلها ورفضت طلبه خوفاً من غضب ربي فطلقني وتركني وحيدة أبكي حظي بطفلين لا حول لهما ولا قوة ...

هنا حنفي

لن أتزوج إلا فتاة لم يسبق لها أن أحبت أو تكلمت مع شاباً من قبلي خااااااام يعني
تلك هي أمنية حنفي وكل جنس حنفي ... زوجتي يجب أن تكون بكراً في مشاعرها وتجاربها وأكون أنا أول وآخر حب يدق باب قلبها..
ولمن لا يعرف حنفي فهو الواد الجن الفريكيكو الذي عرف بنات بعدد شعر رأسه وأهدر براءة العديدات منهن بحكم إختبار أخلاقهن مع مباركة الست الوالدة له بحكم أنه راجل وأنه بالبلدي كده مش هايشيل عاره فيعمل مابداله ...
ثم يأتي هذا المجتمع الفاسد ويعطي له الحق بأن يختار وينتقي ويفرز كمان ماهي البنات علي قفي مين يشيل
وبالفعل وبحكم خبرته في أصناف البنات يقع أختياره علي الجوهرة المكنونة ست الحسن والجمال التي تنتظر الشاطر حسن ليتزوجها ولا تجرؤ علي معاتبته علي ماضيه الذي يتباهي به أمامها وبالفعل تبدأ توبته بعد وقوع ليلي في براثنه ولكنها تحيا عمرها في شك يطاردها ماضيه المؤسف ...لاحظتم معايا ..يطاردها هي مش هو .

كلنا ليلي

2006-09-09T13:51:00.000-07:00

كل من داسها ظلم الرجل....هي ليلي

كل من نامت ودموعها الحارة تسيل علي وجنتيها.... هي ليلي

كل من شعرت بالظلم لمجرد كونها أمرأة ...هي ليلي

أنا ليلي..... أنتي ليلي .... كلنا ليلي

فلتصرخي ليلي .... صرخة تخرج من قلوبنا لتقهر الظلم الواقع عليكي وعلينا

فلتتحد أرواحنا لتنصر كل ليلي

وسلامي إلي ليلي

إللي ماتتسمي رجعت تاني

2006-09-06T03:04:00.000-07:00

ألحق كلك فرختين طازة
أقبل الشتاء وهلت بشايره وبعد أن كنت أنتظره بفارغ الصبر بجوه المعتدل في شقتي الحارة صرت أتوجس منه خيفة‘ وقد أستعددت له منذ فترة غير قصيرة وذلك عن طريق تناول الفراخ يومياً فأنا عاشقة لأكل كل ماله جناحان وماليش أوي في أكل اللحمة المرهقة مادياً لجيوبنا .

ولقد وصلني نبأ عن إغلاق العديد من محلات الفراخ لظهور حالات لإنفلونزا
الطيوربها .. ربنا يجعل كلامنا خفيف عليها ..

من كام إسبوع كدة قريت في الجرايد خبر عجيب مريب .
خبر أيه ياأم أحمد؟ خير اللهم أجعله خير .
- هاييجي منين الخير بقولك إنفلونزا الطيووور ياابني ‘ الخبر ده عن براء الطيور المهاجرة من نقل هذا المرض الخبيث وأن المرض ده مش جديد كمان ده قديم أوي .
- أقفي عندك هنا أمال أيه ياأخوانا إللي بلانا بالمرض ده ..
- الصبر شوية أنا جاية أهوه في الكلام ‘أكيد أول حاجة الإهمال وإنعدام الرقابة ‘ فلإنفلونزا الطيور مصل تحصن به الفرخة خلال مراحل نموها فيحميها من غزو هذا المرض اللعين ولكن ولأن بلدنا بلد مالهاش صاحب فكل واحد بيعمل إللي في راسه – يشمعني يعني جاد شويري بيعمل إللي في راسه وماحدش بيكلمه هو علي راسه ريشة – ولأن هذا المصل مكلف نسبياً كما أنه يرفع من سعر الفرخة ولهذا أكفي علي الخبر ماجور وقول ياباسط .
وطبعا ًلو كانت هناك رقابة ومتابعة من قبل الدولة لأجبر كل من تسول له نفسه بتربية الدجاج علي إستخدام هذه الأمصال .

عندما دخل هذا المرض مصرنا الغالية قلت ومازلت أقول أنه وصل لبيته ومطرحه وأنه هايشرفنا هنا كتير ومش هايخرخ ولو حتي بالطبل البلدي وهنا سيتحور المرض ويترعرع وجايز كمان نعيد تصديره لبرة .... وعماااااااااااااار يامصر.

يلا ياحكومة جاتلك علي الطبطاب هايموت منا كتير ولا حوجة لوسائل تنظيم الأسرة
كدة أوفر برضه ويجعله عامر .
مع تحيات الست أم أحمد .

التاج وصللي ياحالوللي

2006-09-04T08:45:00.000-07:00

أولاً أحب أشكر الأخ مسافة صغيرة لانه بعتلي التاج ميرسي يازوق هل انت راضى عن المدونة شكلا وموضوعأ؟
مش اوي كان نفسي تبقي احسن من كدة بس لونها عاجبني بيريح عيني
هل تعلم أسرتك الصغيرة بأمر مدونتك؟
انا مابقدرش أخبي حاجة عن جوزي ولو انها اتسببت لنا في خناقة اول ماقولتله عليها بس صالحته والحالة تمام بس طبعاًده مخليني مابكتبش كل اللي انا عاوزاه
هل تجد حرجا فى أن تخبر صديقاً عن مدونتك؟ هل تعتبرها أمراخاصا بك?0

؟بالعكس انا بقول لكل اللي اعرفهم حتي جيراني بس الوحيدة اللي مهتمة بمتابعتها هي دعاء غريب وهي اللي عملتهالي كمان
هل تسببت المدونات بتغير ايجابى لافكارك؟ اعطنى مثال فى حالة الاجابة بنعم؟
انا افكاري ماأتغيرتش اوي لأني تقريباً بتشابه مع أفكار معظم المدونين
هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟
انا بفتح صفحات اللي بيعلقوا عندي الاول وارد عليهم وافتح صفحات اللي بيعلقوا علي اللي بيعلقوا عندي
ماذايعنى لك عداد الزوار.. هل تهتم بوضعه فى مدونتك؟
انا حاطاه فعلاً وببقي سعيدة لما بلاقي ناس بتهتم وتدخل تقرالي
هل حاولت تخيل شكل اصدقائك المدونين؟
الصراحة اه ذي كلبوظة لكن سمبتيك ونفسي اشوفها بجد وزانجولا المضرب عن الكتابةومن خلال كتابتهم ممكن والله اعلم يكونوا تخان بس هما ذي العسل
هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟
في وفي وفي ناس متفاعلين اوي ذي زنجولا اللي كان بيكتب عن الاحداث اول مابتحصل كنت بعرف منه اخبار البلد ربنا يرجعوا بالسلامة
هل ترى فائدة حقيقة للتدوين؟

بالنسبه لي انا بخرج اللي جوايا وبحس ان فيه ناس بتهتم اما بالنسبه للبلد ككل فانا عندي امل ان المدونات دي هايبقي ليها اثر علي المدي البعيد
هل يزعجك وجود نقد بمدونتك؟ ام تشعر انه ظاهرة صحية؟
لو نقد مهذب ومحترم مافيش مشاكا الاختلاف في الرأي لايفسد للود قضية
هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
ابداً اخاف ليه انا بقرالهم بس وساعات بعلق كمان وطبعاً صدمت لاعتقال بعض المدونين ولو اني سمعت انهم كانوا بينظموا مظاهرة بس انا ماليش في المظاهرات لاني شايفة انها لا بتقدم ولا بتاخر وعمري مامشيت في مظاهرة انا دايماًماشية جنب الحيط
هل فكرت فى مصير مدونتك فى حال وفاتك؟
لا مدونتي بتعبر عن أفكاري ولما أموت أفكاري هاتموت معايا
مين اكتر مدونين أثروا فيك؟ وليه؟

كتيييييييييييييييير منهم سوسة المفروسة وزنجولا وجدو بحنيته وطيبته الراجل ده ياجماعة حنين اوي انا نفسي يبقي جدو بتاعي انا

مين من المدونين بتحس انه شبهك؟
في الافكار كتيير بحس اننا كلنا عاوزين نغير حاجة بس مش عارفين
آخر سؤال: تحب تسمع ايه؟أمووووووووت في مطربة اسمها ام كلثوم وياريت سيرة الحب لو سمحت
اكتب اسماء خمسة مدونين ليقوموا بهذا الاستقصاء بعدك
دعاء غريب
moony
عايزة اتجوز
من نفسي

مسؤول لله

2006-09-02T06:35:00.000-07:00

ماحدش يعرف أي مسؤول نص لبة ييجي يسكن في شارعنا ؟
يبقي ياسعدنا ياهنانا لو جه واحد مسؤول ابن حلال وسكن معانا يبقي ربنا بيحبنا بجد ساعتها هاتنضف الشوارع وها تترسف الطرقات وستضاء أعمدة الإنارة وجايز كمان تزهزه معانا ويزرعوا جناين ياسلاااااااااااااااااااااااااااااااام ده يبقي حلم وأتحقق والمية مش هاتقطع ثاني والنور هايبطل زغللة وهايشتغل ذي الألف لأ أنا مش هافتري في أحلامي بلاش يسكن معانا يعدي بموكبه بس علينا بس بشرط يكون كل يوم وإلا اللي هايتبني بالنهار هايتهد بعد تحرك موكب السيد المسؤول .
فليعلم كل مسؤول في هذه البلد أن مرتباته وحوافزه وعلاواته ومصاريف انتقالاته أدفعها أنا وغيري من جيوبنا الخاصة كضرائب ولو كان من حقي رفض دفعها إذا لم أحصل علي ماأتوقعه من خدمات آدمية لرفضت ولكن حكومتنا تستقطعها من مرتباتنا بالقوة الجبرية قبل إستلامنا لها

لا أنام

2006-08-21T19:24:00.000-07:00

لا أنام
مش لأني بحب جديد أو بفكر في حبيب هاجرني لا سمح الله لكن لأني بستني المية تزورني لمدة ساعتين فقط يومياً عند منتصف الفجر ومع هذا كنت حامدة ربي وببوس أيدي وش وضهر ولا عمري أشتكيت ولكن دوام الحال من المحال فمنذ أكثر من أسبوع
أمتنعت المياه عن الوصول لمواسيرنا وتركتنا نتسول المياة من عباد الله ولأني عاوزة حقي من نيل بلدي أتصلت ب125 شكاوي المياة وأنفجرت فيه باكية وشاكية من عدم وصول المياة إلينا وطلبت منه راجية توصيل المياة إلينا لمدة نصف ساعة فقط لنملأ منها لزوم الشرب فرد ببرود(إلهي مية بيتهم تقطع ويحس اللي أحنا فيه) هانوصلها لما الضغط عليها يخف شوية فقلت له :ليه هما اللي عندهم مية بني آدميين وأحنا لأ ،ولا هما بيدفعوا وأحنا عايشين سفلقة عليهم ده أحنا بندفع ألوفات بحكم أننا ساكنين في برج بيلموا فلوس المية فيه حسب عدد الشقق سواء وصلتلنا المية ولا لأ . فرد بأسلوب أبرد متجاهلاً كلامي : حاضر يامدام هانحاول نوصلهالكوا شوية.
ومرت الساعات خلف الساعات ولم تأتي المياة فهداني تفكيري إلي الأتصال ب139 شكاوي برضه وسألته عن كيفية رفعي لدعوي قضائية علي شركة المياةلأني لا أحصل علي خدمة في مقابل نقودي فقال : من حقك يامدام (ماهو مش هايدفع حاجة من جيبه وإن شاء الله توصل المية للورثة غير أني هاصرف دم قلبي ومافيش حاجة مضمونة) .
وعندما وجدت أن الحل القانوني مكلف سألته : هل أستطيع الأتصال بالريس شخصيا ًفبأ مر مباشر منه يتحرك تنابلة السلطان ويعملون المعجزات .
فرد :برضه من حقك أعملي اللي أنتي عاوزاه (يعني أخبط راسي في الحيط)

وضعت سماعة التليفون وأخذت أعقلها في دماغي أتصل ، ماأتصلش وإذا أتصلت بالريس سأتعرض لسين وجيم وتحريات وإن وجدوا في عائلتي مايشيبها فقول علينا يارحمن يارحيم وهنا تذكرت أن أسم جدي الأعظم باشا هو حشيش ودي لوحدها تجيب إعدام
ولهذا قررت أحرم مصر مني وأهاجر منها فيها إلي دولة كلابيز (دولة إصلاح الدولة) وورونا شطارتكم هاتعملوا ايه في المشكلة دي .
ملحوظة مهمة جداً:أنا نويت آكل بشراهة حتي اكون كلبوظة متختخة عشان تقبلوني عندكم

وختاماً أود ان أقدم العزاء لاسر ضحايا القطار وكل قطار وانتم طيبين. .
مع تحيات الست
أم أحمد

عمر ياملك الأختزال

2006-08-16T17:20:00.000-07:00

ملك الأختزال
عمر هو أسم أبني الثاني لمن لا يعلم ذلك.
ما، بو هي كلماته
ما : هي الأختصار الذي ينادينا به جميعاً نحن البشر لماما وبابا وأحمد وتيتي وجدو وعمو وخالتو وخالو .
بو : وهي الأختصار لكلمة بص أنا بعمل أيه ليلفت إليه الأنظار وعلينا أن نرد عليه بكلمة نعم حتي يتوقف عن تكرارها كإسطوانة مشروخة وأحياناً
مايمسك أذنيه ويخرج لسانه ويحرك رأسه يميناً ويساراً ويجب أن نضحك وإلا مايحصلناش كويس .
أما آكو: فهي أختصار لكلمة عاوز آكل ولا يستخدمها إلا عندما يجدني منهمكة في القيام بأي شيء فهو عنده يقين بأنني الفلبينية الخاصة بسعادته والتي يجب أن تكون علي أهبة الأستعداد لتلبية طلباته دائماً
وهو غالباً مايرفض أن يخدمه أحداًغيري ويصرخ عندها قائلاً:آوز ده مشيراً بأصابعه الصغيرة أتجاهي.
وأمبو : يعني عاوز أشرب ويحلو له إستخدامها عندما أجلس أمام شاشة
الكمبيوتر أو أهاتف أحداً تليفونياً ، ماأعرفش بيودي كمية المية اللي بيشربها دي كلها فين .
كاكا : عندما يري أي جزء من جسده عارياً ، كله عنده كاكا.
آمد منادياً عم محمد البواب ومنادياً أخيه أحمد أيضاً .
مين : ويقولها بدلع شديد بعد سماعه لجرس الباب أو إذا سمع جيراننا
يتحاورون من شبابيك المنور .
كوكي : هو دلعه لبابي لما تكون الغزالة رايقة .
زون : عندما يريد أن يدير التليفزيون فأخينا صاحب مزاج عالي.
واوا :كلمة يستخدمها للأبتزاز مشيراً إلي جرح قديم بجبهته.
أما آزز :فيقولها عندما يريد أن يستمع إلي أغنية أنا خلاص هاتجوز لسعد الصغير .
وبطريقة نطقه المفهومة لينا أحنا فقط فإنه يحتاج دائماً إلي مترجم ليتفاعل مع الناس وختاماًأرجو لكل من قرأ هذا البوست أن يدعو لعمر بالشفاء العاجل إن شاء الله . .

براءة عيالها تحت ترابها

2006-08-15T21:12:00.000-07:00

براءة عيالها تحت ترابها
نوع جديد من الحروب
نوع بينزف ثروات بلادنا
تكالبت علينا الأمم

ولا حول لنا ولا قوي
أين نحن ياعرب؟
لو نتحد
سيأتي يوماًونتحد بعد الدمار
ستتحد أطلالنا وشعورنا بالخزي والعار
سنكون عبرة لمن يعتبر
لبنان الأن وفلسطين
وغداًسوريا وإيران
ويالوعة قلبي علي بلدي
عندما يأتي عليها الدور
في البداية جردونا من سلاحنا
لاجل نطاطي
مين جعلهم حكام علينا يأمرونا وينهبونا غير ضعفنا
واه ياأمة متفرقة
براءة عيالها تحت ترابها متمددة
ممكن نحارب من غير سلاح
نضغط عليهم من غير مانقتل
دعوة سلام

من واحدة عاوزة تعيش في سلام

أصبحت هي دفتر يومياتي

2006-08-15T16:54:00.000-07:00

أصبحت هي دفتر يومياتي

قبل معرفتي بها كنت أجلس كل ليلة إلي مفكرتي وأشكو لها حالي أو أسعدها بأسعد لحظاتي
وهكذا كانت تمر حياتي بلا أنيس سوي قلمي وأوراقي ‘ومنذ معرفتي بها هجرت كتابة يومياتي فأصبحت
هي أختي وأبنتي وصديقة رحلتي وهي حبوبي المهدئة ألجأ إليها كلما عصفت بي الأنواء ‘ أتصل بها تليفونياً
كل ليلة لأخبرها عن أحداث يومي كلها فأشعر وكأني أتجاذب أطراف الحديث مع قطعة من نفسي فأفكارنا
تكاد تكون وكأنها نابعة من كيان واحد وبيتها هو بيتي الثاني ألجأ إليه كلما ضاقت بي الدروب ووالدتها هي
أمي الثانية التي أعشقها كعشقي لأمي.
تلك هي أبنة عمي دعاء ، رقيقة نقية لا يسعك إلا أن تدمنها وتعشق خفة دمها حتي الثمالة وهي أعقل من بنات جيلها بمراحل أبدعت والدتها في تربيتها ووهبتها كل ماتحتاجه لتكوين شخصية جذابة .
فبارك لنا فيها يالله

جاءنا البيان التالي

2006-08-15T11:30:00.000-07:00

جاءنا البيان التالي
أستطاع الجيل الحالي أن يغير من خريطة مصر الجغرافية ويحقق مالم تفعله الزلازل والبراكين منذ آلاف السنين من تكوين جبال وهضاب من نوع جديد فمرحي ياهل مصر المحروسة.
وهذه الجبال ليست من حجر فنحن بناة الأهرام سنظل مبدعون للأبد فقد أبدعنا أهرامات جديدة من الزبالة
في كل مكان فيكي يامصر مع الأستعانة هذه المرة بالخبرة الأجنبية المتخصصة في جمع القمامة ورميها في الشوارع وهبر الملايين من جيوب الشعب المساكين ولو إني كنت أتوقع أن يجمع قمامتي واد حليوة بعيون زرق بس ماحصلش للأسف.
فشكراًألف شكر لكل من ساهم في تزبيل مصر وملء بطون قططها وكلابها الضالة التي تجهر بالدعاء ليل نهار للشركة الأجنبية وهيص ياناموس بلدنا وأكبر وأترعرع وطظ فينا أحنا ألف طظ.
فقد أعيت زبالتنا كل من حاول التعامل معها ولم تستطع شركة كل خبرتها كانت مع مستخدمي الشوك والسكاكين ولم يسعدها الحظ من قبل بجمع زبالة آكلي الماحشي والبتنجان.

أبرع فنان

2006-08-15T03:20:00.000-07:00

أبرع فنان
أوهمتني بأنك حبيباً قلما يجود به هذا الزمان
وأنك للحب جنات ذات أفنان
وأن البراءة لك عنوان
فأجدت تجسيد الولهان
أعطيتك جائزة الحب الأولي عن أستحقاق وجدارة
ماأبرعك 00ماأروعك أيها الفنان
حتي أنت صدقت نفسك
وقلت أنا قلب ملئان حباً وحنان
أستحق حبك 00أستحق حسنك
أستحق شفتاك 00وهاتان العينان
حتي أسمي يستحق أن يعيش فوق رأسك
وأن يسكن صدرك ويعشش في الرئتان
أنتهت الرواية وكنت أقلمت نفسي ألا تنتهي
وأمنت من غدر الزمان
هاك أوسكار
أحسنت ياأكذب فنان

بقلم :واحدة لم تذكر أسمها

مين قتلهم ياماما

2006-08-13T06:42:00.000-07:00

سؤال بريء من طفل بريء عنده أربع سنين بس، لما شاف إرهاب إسرائيل في مذبحة الملائكة (قانا)قلت :دي إسرائيل
فقاللي إاسرائيل دي وحشة اوي ياماما أنا مش بحبها ولما أكبر هامسك الدبابه وهاقتلها ذي ماعملت مع العيال دول .
ورغم عدم رغبتي في زرع الكراهية في قلب طفلي ولكن هيهات لقد زرعتها إسرائيل بعدوانها الغاشم ولنا الله.

نامي هنيئاً أمةَ الإسلامِ *** نامي على أرجوحةِ الأوهامِ
لا تفتحي العينينِ أخشى تخسري *** يا أمتي تهويمةَ الأحلامِ
!نامي فقد تعمى العيونُ إذا رأتْ *** أنوارَ فجرٍ ضاحكٍ بسَّامِ
نامي على خَدَرِ الدجى يا أمتي *** ولْيهنِكِ الذلّ المخيِّمُ .. نامي!
يا أمةَ المليار! أضحتْ في الورى *** عارَ الشُّعوبِ وقَصْعةَ الأقوام!
غوصي بكلِّ جهالة ٍ! لا ترتقي *** في عالم الأفكارِ والأَفهامِ!
يا أمةَ الإسلام مالكِ منهجٌ *** إلا الكتابَ وشِرعةَ الإسلامِ
يا أمةَ التوحيدِ هيا وحّدي *** كلَّ الجهودِ لهتْك كلِّ ظلام

منقولِ

أعرفكم بنفسي

2006-08-13T05:40:00.000-07:00

أنا أم مصرية عادية جداً جداً عندي ولدين ورغم حبي للبنات رضيت بقسمتي ونصيبي وأكتفيت بأبنائي

والمهم أن اربيهم تربية كويسة وأعمارهم هي أربع سنين وسنتين ،بتمني أحقق أحلامي فيهم وأراهم أجمل وأشطر طفلين واحد مهندس والتاني دكتور_مثلاً_وأحاول أن أزرع فيهم الطموح لكن أنا مش عاوزاهم شاطرين دراسيا بس بل أجتماعياً ايضاً

فهل أستطيع تحقيق ذلك؟

أحبك

2006-08-12T16:54:00.000-07:00

مع تحيات أم أحمد