لماذا يضرب شبابنا عن الزواج
----------------------------------
هل لضيق ذات اليد ....لأن الشباب ياحرام مش لاقي يأكل يبقي هايروح بسلامته يتجوز ومامعاهوش اللي يفتح بيه بيت
. أبداً والله .. اللي عاوز يتجوز هايتجوز حتي لو في بيت أهله وبيقضيها .. ممكن يعمل جمعيات يستلف .. بيتصرف وخلاص
جايز عشان ... البنات مزوداها أوي وطلباتهم تقصم الوسط إشي شبكة بالشيء الفلاني ..وإشي مهر قد فلانة الفلانية ... وإشي فرح في الفندق الفلاني اللي صاحبتي عملت فيه فرحها
لأ برضه ياسيدي مش كل البنات طلباتها مبالغ فيها وفيه ناس طلباتها بسيطة أوي أولها انها تستر البنية وخلاص
طب أيه ياستي ؟؟؟؟
السبب ياأخواننا إن شبابنا ... ربنا يحرسهم نفر نفر... نفسهم يتجوزوا بشبيهات نانسي لأجل تدلعهم أو شبيهة هيفا وجسم هيفا
وطبعاً معروف أن مستوي الجمال في بلادنا ماوصلش لجمال نانسي وجسم هيفا .. مالها مني زكي ولا سعاد حسني برقبتهم ... مايعرفوش أن هيفاء ونانسي وراهم جيش عالي المستوي .. ولا جيش أمريكا في العراق ...عمالين يسنفروا ويبيضوا ويلونوا ويلبسوا ويزوقوا ..
وفيه شباب متواضع ومتساهل في المسألة دي .. وبيقول مش ضروري تبقي البنية شبه نانسي أوي بس المهم تكون خفيفة ولونة ذيها وواخدة كورس في الدلع
طب حرام عليك بقي .. هو أنت أديت البنية فرصة تدلعك وتخاصمك آه وتسيبك لا
وياما يابني كان فيه بنات رزينة وعاقلة وبعد الجواز ربنا فرجها عليعهن وبقوا في دلع ومياصة نانسي
بصوا يابنات لازم تدلعوا شوية مادام الشباب مخهم تربس علي نانسي يبقي أبقوا ذيها وكله بالأدب... ماشي
يعني بلاش التكشيرة اللي علي الوش وفكوها شوية
وألا فيه حاجة أسهل ممكن تعملها البنات تقعد ليل ونهار قدام التليفزيون وتأخد دروس خصوصية في الدلع من فنانين آخر الزمن ... بيلبسوا أزاي بيضحكوا أزاي بيرقصوا أزاي ؟؟؟
والله يرحمك يازمن كان فيه الراجل بيختار البنت علي أساس الأدب والأخلاق والعقل الرزين ومرحباً بك يازمن طغت فيه هيفاء وأخواتها علي عقول الشباب
المشكلة كبيرة ياجدعان وأنا شايفاها بعينيا بس مش عارفة أعمل حاجة
ففي محيطي وحده حوالي 30 بنت مش لاقية عريس وفي نفس المحيط فيه ييجي 20 شاب مضربين عن الجواز كلهم قرايبي
بذمتكم مش ده يبقي حرام ... أنا بجد هاتجنن طب نعمل أيه بس نقفل القنوات اللي بتعرض مقاييس للجمال خيالية ونادرة الوجود عشان شبابنا يرضي بالموجود ولا نسيبهم في أوهامهم منتظريين ومصممييين علي البنات اللي لو اتوجدوا هايبصولهم علي ايه ياحسرة دول لا هما شبه راغب ولا جسم عمرو دياب
و سلامي للجميع وربنا يهدي ويشفي
5 comments:
بقالك كتيير ماكتبتيش حمدالله علي السلامة ابقي زوريني
مممم
مش هتكلم نيابة عن حد
بس كل واحد بيكبر وراسم في ذهنه صورة معينة أو سكة معينة
لو الصورة اتشوشت أو السكة اتقطعت صعب يكملها
خصوصاً إننا نشأنا في مجتمع وتعليم مش بيشجع الواحد علي كده أو يزرع فيه التصميم علي هدف مهما فشل
وكمان في بعض المضربين اللي هما أميل للتدين أو العزلة دول بيرسموا صورة مثالية عن الزوجة ..بيشوفوا الواقع وبيبالغوا في تقديره ومش بيبصوا لنفسهم
بس بيني وبينك
بصراحة
أنا شايف إن أغلب مشاكل العرب ومصر من ضمنها إننا كمجتمع فشل في إخراج نموذج الأم اللي هيا نص المجتمع
مش هكون متشائم وسوداوي وأقول إن مفيش بتاتاً ..ومش هكون مثالي أوي وأدور علي أم مش بتغلط ..بس الصورة العامة بتقول كده ..أغلب الأمهات _ اللي هما المفروض أقرب بالفطرة لأولادهم أكتر من الأب _ فعلاً بتفوتهم حاجات كتير وبيغلبهم المجتمع في تشكيل شخصيات أولادهم وبناتهم
فبالتالي التوافق صعب بين الطرفين لأنهم الأتنين فيهم عيوب + طبعاً عيوب المجتمع وعيوب الأسرة وخلفية متشكلة إني داخل أطلب إيد البنت يبقي داخل يشفوني ويخرجوني لحم علي عضم
واللي داخلة علي جواز أهلها مش عايزين يبقوا أقل من فلان ويضمنوا حقها عشان مش تتبهدل زي فلانة
مع إن المفروض يبذلوا نص الجهد ده في التأكد من شخصية العريس الأول
الموضوع مش بالبساطة دي
ولو حضرتك شايفة إن أغلب الشباب المضرب سبب كده إن مش لاقي دلع ..ما الكباريهات مليانة دلع والعدوي اتنقلت لجامعاتنا وشوارع الحب ياما فيها بنات أساتذة في المجال ده :)
الموضوع أعقد من نانسي وهيفا وأي شاب بيرفض يتجوز واحدة لأن المقاييس الشكلية مش مضبوطة يبقي ميستاهلش إن الواحدة دي تتضايق لأنه مضرب عن الجواز
هو كده عمل خير فيها يعني
أنا سبب إضرابي فهو صعب يتشرح بس أكيد مش للسبب العقيم ده..معشان كده أمريكا احتلت العراق ..لأن حكامنا ربنا يهدهم مسمحوش لأي حد عدل بالظهور
كفاية علينا هيفا..هننهب ؟
وفي النهاية ..بعد الرغي ووجع الدماغ أتمني مكونش أزعجت وحبيت بس أشارك برأيي المتواضع والمطول :)
وشكراً جداً للتعليق الأخير عندي..ده من ذوقك بس والله
سلام
منورين ياجماعة المدونة
رأيك علي عيني ياضياء بس علي فكرة ناس كتير فعلاً بيدوروا علي الشبه وفيه شباب مكتفي بالتليفزيون واغانيه اللي اصبحت اوض نوم متحركة
انا الصراحة بأرصد حالة انا شايفاها بنفسي قدام عيني ومش عارفة اغيرها فبفضفض وطبعاً اكيد في اسباب تانية كتير للاضراب ده
وسلامي
منورة بأصحابها
توضيح بسيط ..الشباب مش مكتفي بالأغاني كأوض نوم متحركة
دي ممكن تعتبريها حاجة إضافية كده بس
فوق البيعة يعني
ومش بإيدنا غير ندعي وكمان بصفتك أم بقي تاخدي بالك من أحمد وأخوه أكيد مش محتاجة وصاية
ههههههههههههههههههه
احنا نجيب جوز صعايدة و نطخ هيفا
و نجلا و نانسى و ميريام
اقوللك
احنا نعلن الحرب ع جميلات لبنان
هههههههههههه
تحياتى يا افندم
Post a Comment