Sunday, April 06, 2008

كيف أضربت أم أحمد.؟؟


عاوزة أتكلم عن الإضراب ... أنا كنت خايفة أتكلم عنه ... أصلي جبانة حبتين ... فعندما قرأت في الجرائد القومية عن التهديدات بالحبس الذي قد يصل لثلاث سنوات لكل من تسووول له نفسه بالتلميح فقط عن موضوع الإضراب .. ومحسوبتكم مالمحتش بس ... لأ دي كتبت موضوع كمان ... وممكن حد أبن حلال يبلغ عني
وولاد الحلال مالييين البلد ...
لكن ياااالا العمر واحد والرب واحد ... وكله بياخد نصيبه
أضربتي إذاي ياأم أحمد ؟؟؟؟
أضربت في بيتنا ... زوجي نزل شغله عااادي وأبني راح مدرسته عاااادي ... أنا إللي أعلنت حالة العصيان ... ولو أنها معلنة من زمااان ... هو أنا هاروح فييين ياحسرة ...
الحاجة إللي أضربت عنها بالفعل هي شراء أي نوع من أنواع البقالة أوالخبز
حتي العيش الفينو بتاع مدرسة أحمد ماأشتريتهوش ... وعملت له بطاطس محمرة تاني يوم الصبح
كله يهووون في سبيل عيون الإضراب
لكن جوزي الخاين حاول يغريني وأتصل بيا من برة وهو راجع من الشغل وسألني ... أشتري جاتوه للغالية أم أحمد
صرخت فيه ....

أوعي .. هارميه ... أنا عاملة إضراب
ماتخافوووش ... ماضعفتش
ولوإني ضعييييفة قدام الجاتوه

لكن ياتري الإضراب نفذ أهدافه ؟
رغم أن الإضراب ذادت حدته في المحلة وتحول إلي أعمال شغب وتقريباً المدينة ولعت ...وناس كتيرة أتصابوا وناس أستشهدوا
والعهدة علي الراوي .. أنا ياجماعة مش باأحب المظاهرات الهمجية بتاعة شعبنا نفسي في مظاهرات هادية ذي اللي باشوفها في التليفزيون ... ناس تقعد علي الأرض تستني الفرج ... مش أحنا بنسوووق فيها ونضرب في بعض
وندمر ممتلكات لناس لا بيها ولا عليها ... أو حتي نضرب في بتوع الأمن المركزي الغلابة ... وناسييين أنهم ولادنا
والغلا ماسابش حد لا إحنا ولا هما كماااااان
لكن أكتر حاجة حسستني بالخوف ... هي نفسها إللي حسستني بالأمل ... عارفين أيه ؟؟
موقف الحكومة من الإضراب والتحذيرات بالحبس ولفها علي المدارس عشان تاخد الغياب وتعاقب المتغيبين في هذا اليوم
يعني الحكومة خافت .. والإحساس ده جديد من نوعه علي الشعب المصري اللاجيء
إللي مخوفني بقي الدعوة الجديدة للإضراب الجديد ... أنا مش معاها الصراحة لأن ميعادها قريب جداً وهو يوم عيد ميلاد سيادته
طب هو أحنا لحقنا ندي للحكومة فرصة عشان تعمل رد فعل للإضراب الأول عشان هوب نجري ونعمل إضراب جديد
الصبر ياجدعاااان ... يعني صبرنا قرووون ... وفوقنا علي حكومتنا كدة مرة واحدة
الرحمة حلوة
وكل إضراب وأنتم طيبين

23 comments:

مشمش said...

وانتي طيبة وعقبال الاضراب الي جاي بس براقو عليكي ازاي قدرتي تصمدي وتقاومي الجاتوووة انا لو منك كنت بعت مصر كلها بتورتاية فواكة كريمة
بس تكون كبيرة عشان دي مصر برضة
بهزر طبعا
سلام وسلميلي علي احمد قوليلي طنطك مشمش

أم أحمد said...

مشمش
==============
هههههههههههههههههههه
مش ممكن علي خفة دمك يامشمشة
بقي عاوزاني أبيع مصر بحتة جاتوه

kafrawy said...

هههههههههههههه

انا ماشى الحيتة يا ام احمد

ربنا يجعل كلامنا خفيف على قلبهم

الباحث عن الحقيقة said...

انتى بتسمي اللى عملتيه ده اضراب
هى ست البيت لما توفر يوم تبقى عملت عمل وطني
عجايب
ايه الهنا ده
عظيمة يا مصر
والجاتوه اعظم
ههههه
انتى اللى باين مكنش ليكى نفس وقتها

Desert cat said...

والله يا ان احمد بحييكى بشدة على موقفك
هو فى حد فى زمانا ده يقدر يقاوم الجاتوة
وكمان احمد يعتبر عمل اضراب ما هو ما اخدش سنتدوتشات المدرسة بوسيه لى بقى
احمد مش ابوه
تحياتى

بطوط حبوب said...

انا لو منه كنت اشتريت لنفسى وسبتك
واضربى براحتك بقى
هههههههههههههههه

رئـــــيسـة حزب الأحلام said...

اية باسوسو تانى المحروق دة خلينا جنب الحيط دة مرشقين الحبايب فى كل حتة
عودنا للعصر الحجرى وسلامى لكى

la3lahakhier said...

هههههههههههه
كدا رحتى بلاش يا ام احمد المهم بقى لما حيتقبض عليكى تحبى جاتوة لابوار ولا ماندرين ولا نقضيها سندوتشات؟
ههههههههه
عجبتينى يا ام احمد
تحياتى

مواطن مصرى نايم said...

الله ينور عليكى يا أم احمد
و لا بحلويات الدنيا
تتخلى عن موقفك
جاتووووه
حت يعمل اضراب عن الجاتوة
و الله العظيم
انا و انتى شفت التغطية بتاعت الاضراب عندى
ممكن كنت سبت البلوج يولع
عشان خاطر الجاتووووووه
يا سلام لو كان من عند لابوار
تبقى كملت
انا ممكن كنت كتبت ضد الاضراب لو من عند لابوار
تحياتى ليكى
ـــــــــــــ
الكلام ده بس
عشا خاطر انا عامل دايت
ربنا ما يكتبة عليكم

Anonymous said...

السلام عليكم
كنتى اكلتى الجاتوةيام احمد وربنا يسترها على مصر واهل مصر
من ماما حميدة

Anonymous said...

وكل عام وانت بخير ياابو احمد بعيد ميلادك

أم أحمد said...

kafrawy
=============
مابقاش ينفع تمشي جنب الحيطة انت تخش جوة الحيطة أحسن في الظروف دي

أم أحمد said...

الباحث عن الحقيقة
=================
هو حد يقووول لأة للجاتوه الا لوكانعقله خفيف
يبقي إضراب ده ولا لأ
انت بتشكك في وطنيتي ليه ؟
كل واحد علي قده ...
تحياتي

أم أحمد said...

Desert cat
==============
من عينيا هابوسهولك من خده بوستين

أم أحمد said...

بطوط حبوب
====================
هو أساساً مش بيحب الجاتوه
يبقي يشتريه ليه مادمت مضربة ؟

أم أحمد said...

رئـــــيسـة حزب الأحلام
=======================
ماقدرتش اشوف المحلة بتولع وماتكلمش
واللي يحصل يحصل
وبعدين كله في السليم
كله خفيف يافندم

أم أحمد said...

la3lahakhier
================
خليها ساندوتشات لحمة .. بس ابعدوا عن لحم الحمير عشان مش بيطلع منها بفتيك

أم أحمد said...

مواطن مصرى نايم
================
ماهو انا برضه مفروض اعمل الدايت ده بس سايبة نفسي لحد ماهبقي بالونة وبرضه هاكل جاتوه

أم أحمد said...

ماما حميدة
====================
وحضرتك طيبة ياماما
اوعديني انتي بس تبقي تبعتيلي عيش وحلاوة ومعاهم الفرشة والمعجون ... عشان سناني المخلعة
منورة

mostafa rayan said...

ماهو لازم كدةفي حموتها ياام احمد

Mafrousa said...

كعادتك يا ام احمد ....اسلوبك رائع .. بالنسبه لى طبعا .. انا ماليش دعوه بحد...و بعدين .. الجاتوه يا ماما مالوش دعوه بالاضراب...الجاتوه ده من الكماليات .. اما الاضراب فعن الاساسيات .. الهم الرز و المعكرونه..و العيش...يعنى انتى حتكونى فى السليم.. ياخساره الجاتوه..بس انتى لو ضامنه جوزك يجبهولك فى يو تانى ماشى الحال ملحوقه...لو كانت اختك .. انا مضمش بعلى.. كنت قلتله هل ت يا حبيبى و ابقى اعمل اضراب لوحدى يوم تانى

أم أحمد said...

mostafarayan
===============
انا ليا تجربة مع الإضراب قبل كدة بس جابت نتايجها مية في المية
عقبال التجربة المصرية بس ياريت من غير دم

أم أحمد said...

واحدة مفروسة
==================
ده انتي عسل ... بقي عاوزة تعملي إضراب ملاكي لواحدك ... في يوم لواحدك
ده ايه الجمال ده ... وهاتطالبي بإيه بقي