- لو طبيت ميت وأنت واقف في طابور العيش الطوييييييييييييل الذي تسبب في طوله عدم وصول الدقيق المدعوم لمخابز المحروسة بفعل الرشوة والمرتشين .... فأنت أكيد شهيد
- لو أتقتلت بإيد يهودي أكل وأتغذي من نار بوتاجاز أتولع بغاز بلدك وبسعر منافس أرخص من الأسعار العالمية ... يبقي أنت شهيد أبن حلال .. بتدفع ثمن غدر المسؤلين بيك وتفريطهم في الغاز لمصلحة عدونا اللدود
- لومت من جوعك لأن أسعار السلع الأساسية في بلدك ليس عليها رقابة صارمة وبتعلي حسب ضمير التجار ... إللي ضميرهم سبقك للشهادة من زمااااان ... من غلبه وقلة حيلته ... ماتخافش هاتحصله علي الجنة ونعيمها
- لو عربية واحد مسنود أتنازلت وقررت تدوس لامؤاخذة علي جتة سيادتك المتواضعة ...وقطعتك حتت حتت ومالحقتش تقووول أي ... برضه هاتكون شهيد ... أهم حاجة ماتعترضش يابني
- لو حصلك الشرف وأنضربت برصاص أمريكاني صديق ...في مياه بلدك الأقليمية ..يعني البيت بيت أبونا ... والأمريكان بيشكمونا .... برضه هاتكون شهيد محظوظ وهاينزلك نعي بالبنط العريض في صحف العم سام بيه
- لو حصل ودخلت تعمل عملية ودكتور التخدير إداك الجرعة غلط وصلتك لحالة غيبوبة قلبت لموت إكلينيكي .. ولا يهمك ياعم الشهادة برضه هاتبقي من نصيبك حتي لوطلع الدكتور منها ذي الشعرة من العجينة
- لو غرقت في عبارة أو أتفحمت في قطر من قطارات بلدك الغالية ... الشهادة هاتوصلك
- لوأكلت لحم حمير وياريتها حمير مدبوحة ...دي حمير ولا مؤاخذة فطسانة .. هاتحتاج غسيل معدة بس ... بس لو مت أبقي أسأل المفتي أنت بقي بمعرفتك الخاصة
- لو أكلت خضار وفاكهة من النوع المسبب للسرطان ... وخضار بلدك النضيف السليم أتصدر لبلاد الفرنجة
ماهي مش هاتفرق معانا ... أحنا عددنا في الليمون ... ويموت ألف يتولد مليون
يابختك ياشعب مصر الحبيب ..أبواب الجنة فاتحالك ذراعيها علي مصراعيها ... أدخل وأنت مطمن
أما بقي لو فكرت تقل عقلك وتشارك في إضراب أوعصيان مدني عشان توصل صوتك للمسؤلين ... ذو الودن العجين والأخري إللي من طين
فنهار أبوك أسود وليلك أنت اللي مطين .. وغير الحبس والسجن والبهدلة في الأقسام هاتشرف جهنم ياخفيف .. حتي لوبتدن في مالطة وماحدش بيسمع لكلامك
فالأعمال بالنيات
انا قلت اللي في ضميري اللي استشهد من خوفه وتعاطفه مع حكومتنا الذكية في مواجهة الحركة المهلبية للإضراب المدني
14 comments:
والله عندك حق
تعددت الاسباب والاسشهاد كتيييييييييييييييييير
تحياتى
برضه نحمد ربنا ان عندنا طرق كتيره للاستشهاد يعنى اللى مالحقش حريقه القطر حصل العباره و اللى ماوقفش فى طابور العيش مات بعربيه ابن معالى الباشا المهم
والله احنا ناس مبيشكروش ربنا على نعمه الجنه اللى قدامنا و بنرفضها
أم أحمد
وحشتينا أختى الحبيبة
انت بقيتى مفتى ولا ايه ؟؟؟
على العموم الشهادة درجات
وربنا يرزقنا الشهادة
أى درجة المهم تكون شهادة
تحياتي
المشكلة في الشعب الذي لا يعرف كيف يعيش
تحت عباءة الحكومة....الحكومة التي تأتي تفصل عباءة...وعلي الشعب ان يعيش تحت العباءة....غير مهم ان كانت العباءة حجمها مناسب او لا...المهم ان فيه عباءة... لماذا التمرد أذن و الشكوي
اليس هذا الشعب بنمرود؟
تحياتي و تقديري
la3lahakhier
====================
ماهو كل ماواحد يموووت يصبروا اهله ويقولوا شهيد ... بيوزعوا الشهادة علي الشعب المصري
كنوع من انواع المسكنات
صيدلانيه طالعه نازله
====================
بكرة الشهادة تتوزع علي البطايق
مجداوية
=============
هو انا اللي بفتي .. اعوذ بالله من اني اكون بألف ... ده المفتي الجاهز لكل مصيبة تحصل في البلد ... هو اللي جاهز بالفتوة اللي تريح البال
ربنا يخليه للحكومة وشعب الحكومة
الربان
===========
احنا شعب مايملاش عنينا إلا التراب
ربنا يهدينا ويخلينا ذي القطة المغمضة عشان خاطر شيوخ الحكومة
السلام عليكم
فكرتينى ياختى باغنية عبد الحليم حافظ
فدائى فدائى فدائى وكفاية اشوف علم العروبة باقى واموت اعيش مايهمنيش
على فكرة الموضوع جرئ اوى حاولى تنشرى ام احمد اكتر من كدة
اولا انتى بتعطرى فى الصور ديه منين
ثانيا انتى بتحبى الحلاوه؟
ثالثا ممكن تكليها حاف من غير عيش؟
رابعا نسيتى شهيد انبوبة البوتاجاز
خامسا......مش فاكره....المهم انك تكونى بتحبى الحلاوة... اصل اختك ساعات بتحب الجبن....مش الجبن سيد الاخلاق.....لأ و كمان الجبن الذى يصنع من اللبن....بس اللبن الكويس..زحسن اموت شهيييييييييده
واحدة مفروسة
===================
للأسف النت بتاعي مابيسعفنيش عشان ادور علي صور من جذورها فباخدها من مدونات تانية ... وياريت يسامحوني
حاولت أدور بنفسي علي صور مش لاقية ...
انا بس اسناني ضعيفة بعيد عنك فعشان كدة لازم لما آكل الحاجات الحلوة اتبعها بالفرشة علي طوووول
وفي الحبس اعتقد مافيش فرش اسنان
حتى فى ردودك على التعليقات دمك خفيف .. ده انتى حكايه..
نسيتى حاجة يا أم احمد
لو قريت البوست ده وحد من اولاد الحلال بلغ عنك يبقى اكيد هتموت شهيد
بوست يجنن
تحياتى
Post a Comment