عزيـــزي المواطن إللي نايم علي ودانـــــه ... قررنا نحن شعب مصر المطحون عمل إضراب جماعي يشارك فيه جميع فئات المجتمع للأعتراض علي إرتفاع الأسعار المبالغ فيه ... وذلك في يوم السادس من إبريل القادم
شدوا حيلكم معانا ياأخواننا وماحدش يشتري أيتها حاجة في اليوم ده .. ولا حتي العيش وكله يبلغ البوابين والناس إللي مالهاش في القراية عن اليوم ده ... لازم نتكاتف وناخد موقف
أحسن قفانا ورم من الضرب عليه بسوط الغلاء
ولنا في أهل السعودية أُسوة حسنة ... فقد ذاد عندهم سعر البيض حبابة صغيرة ... فأضربت جميع فئات الشعب عن أكله ... وتم إختيار فصل الصيف للإضراب ... نشنوا صح في إضرابهم ... فالبيض مشش وأسعاره نزلت غصب عن عين التخين ...
وأحنا مش أقل من إخوانا السعودييين ... ولازماُ ولابد نثبت للحكومة أننا ممكن ننفجر ونقوم بثورة
ثورة للجياع أو ثورة للي هايبقوا جياع
جايز تخاف الحكومة مننا مادامت طلعت مابتختشيش
وصدقوني في حكومات مابتجيش غير بالعين الحمرا
كله يدعك عينيه معايا
وربنا علي الظالم والمفتري
ثورة للجياع أو ثورة للي هايبقوا جياع
جايز تخاف الحكومة مننا مادامت طلعت مابتختشيش
وصدقوني في حكومات مابتجيش غير بالعين الحمرا
كله يدعك عينيه معايا
وربنا علي الظالم والمفتري
26 comments:
السلام عليكم ورحمة الله وبركاته
ممكن الحكومه تخاف بس احب ااكد لك انها ما تختشيش
هو الاضراب ده له علاقه بكدبة ابريل ؟؟؟
يارب بس ننفذ الاضراب بالفعل
مش يبقى كلام وخلاص
كلنا حنضرب ان شاء الله بس مش كانوا يعملونا الضرب الاول عشان نضرب كويس ويجيب نتيجة مع الحكومة اصل الحكومة دى مش بتحس بعيد عنكوا يارب بعد الدوخة دى يحسوا شوية وربنا معانا بقى
السلام عليكم
انا الصراحة هروح الشغل زى البوبى مانتى عارفة اللى فيها مكفيها م
أنا عن نفسى مش حاروح الشغل بس تعرفى أنا الوحيدة من بين 300 واحد اللى حاتغيب بسبب ده ,, الاضراب ده ممكن يشارك فيه آلاف لكن ملايين حتبوظه وحاتروح الشغل و ان غدا لناظره قريب
الاضراب عن البيض في السعودية نجح لان عندهم قدرة وبدائل
لكن احنا مفيش حاجة عندنا هتنجح ولا حتى الاضراب لاننا مصابين بفيروس نظيف حبيب مبارك ويا جمال المضربين وهما مضروبين
كلنا هنشارك فى الاضراب ان شاء الله
والاضراب كمان يشمل الشراء
مش الشغل وبس
تحياتى
__خمسة فضفضة
===================
أنا عارفة أننا بندن في مالطة ومافيش
حد هايعمل الإضراب
لكن الأكيد أن حكومتنا ممكن يضغط عليها
وعلي رأي المثل .. يافرعون أيه فرعنك مالقيتش حد يلمني
أي حكومة ممكن تنصاع وتستجيب لمطالب شعبها لو فيه حد بيعترض
Desert cat
==================
أنا مش فاهمة ناقص الحكومة تعمل فينا ايه تاني عشاننحس علي دمنا ونتحرك
FaceMoon
================
لازم نحاول ولومانفعش الإضراب ده نشوف حاجة تانية نعملها
رئـــــيسـة حزب الأحلام
========================
للأسف فيه ناس كتييير خايفة العقاب ييجي بأوامر عليا علي المضربين وخصوصاً في المصالح الحكومية
بصي ياسلوي قولي لماما وبابا مايشتروش اي حاجة في اليوم ده حتي لو باكو لبان
مجداوية
==============
اضعف الإيمان مايشتروش حاجة اليومده
مش لازم يغيبوا من الشغل
أهو أي حاجة والسلام نبين بيها أعتراضنا
خايف من الحقيقة
===============
اهل السعودية من أقرب شعوب العالم للتفكير المصري .. فإذا كانوا هما قدروا يغيروا حاجة يبقي لازمنحاول أحنا كمان
وعلي رأيك أحنا هانضرب عن أيه ولا أيه
الحالة عندنا صعبة وكله مولع ناااااااار
بحبك يامصر
================
انا مش بأشتغل ... بس كويس ان فيه حاجة أقدر أشارك بيها في الإضراب ده
اول مره ازورك وتحياتى على مدونتك
المشكله انه فعلا فى ناس ممكن تضرب لكن ناس كتير هتشترى دماغها مع انهم بيعانوا برده ..نفسى فعلا كانت تكون وقفه جامده اوى للاستعباد والذل الى وصلناله الغلاء دلوقتى مبقاش على الفقير ولا محدود الدخل حتى المتيسر حالهم مبقوش عارفين يعيشوا بجد كده حرام لكن هنقول لمين وهمه حراميه لا يفرق حلال ولا حرام
اهو كدا
كلامك صح..اننا نحدد اضراب على الغلاء و ماتشتريش انما انا مبعوتالى على الايميل الناي بتطالب باضراب عن كل حاجة من اول العلاج و انتى نازلة لحد الحمام و فاكرين ان دا اليوم القومى لحل كل المشكال من اول تغيير لحكومة و انتى نازلة للحوادث
يا رب تكون خطوة ايجابية
جامد اوى موضوع السعودية دا..رجالة
العزيزه ام احمد
اولا فى السعوديه كمان اضافه لمعلوماتك وما اضفتيه تمت اقاله وزير التموين بعد ارتفاع اسعار السلع الحبه الصغيره فلو عملنا زى السعوديه كانت الوزراءه بتاعت مصر اتعدمت
على العموم الاضراب ولو لم ياتى بكل نتائجه المره دى بس ان شاء الله هو خطوه مهمه على الطريق
مع انى مضرب عن حاجات كتير
الا ان الموضوع شاددنى جدا جدا
وهاضرب
وهاضرب
الى اللقاء 6 ابريل
استنى
محدش قالى الساعه كام ؟
عندك حق وانا اول المشاركين في الاضراب مش هجيب الشوكلاتاية بتاعة كل يوم ومش هشرب نسكافية ومش هتفسح عشان تعرفو قد اية بتعب
ام احمد
حوشى ابنك احمد
وداريه من العين
ده العين لو صابت حجرايه
تقسمها اتنين
انا مش بتتريق ولا حاجه
بس على رأى خمسه فضفضه
الحكومه ممكن تخاف
بس متختشيش
ومع ذلك انا مشارك فى الاضراب يمكن يحصل معجزه
تحياتى
علاء
الشموع السوداء
==================
العيار اللي مايصيبش يدوش
يعني النهاردة في نية للعصيان بكرة جايز نتحرك ... انا سعيدة ان البلد عاملة حساب للإضراب ده
dina
=================
عشان تطاع يجب ان تأمر بما يستطاع
مش لازمكله يبقي مرة واحدة حاجة حاجة وكله هايتاخد بالراحة
رئيس جمهوريه نفسى
======================
برافو عليهم .. ناس بيعملولهم تاريخ
وموقف ... سعيدة بالمعلومة دي
تحياتي
عبده الرايق
==================
شكلها كدة هاترسي علي ضرب نفسنا وفي الوقت نفسه هانقوول انا اللي جبت ده كله لنفسي
منورني يابو الروقان
مشمش
==========
وجاي علي نفسك كدة ليه .. هاتحرم نفسك من الشوكلاته والنسكافيه ؟ ياعم انت تصوم احسن لك
عايش ولكن
===============
تعرف ان الإضراب بينفع في حالات كتيرة
عموماً لومانفعش المرة دي ينفع المرة الجاية
Post a Comment