هو السكر بس إللي غااااالي ... كله غاااااالي ... ياريت تيجي علي السكر بس ... كانت هاتبقي بسيطةلكن الفول ... وقود البطون المصرية سعره ولع هو كمان
كل حاجة غليت إلا قيمة الإنسان
... أنا بقي من الشعب ولازم أتكلم براحتي ... وماحدش يقوللي تلت التلاتة كاااام؟
هو أنا حيلتي إلا لسان ومدونة صغنونة كدة فوق السطوح باتكلم فيها براحتي
ياحسرة .. لا أنا هاقدر أنزل في مظاهرة ... أودي الولاد فييين يعني ؟؟؟ ... حجة البليد مسح السبورة ... لو سمعتم عن مظاهرة جنبها حضانة أبقوا بلغوني ... وأنا مش هاأروح علي طول ... الجُبن سيد الأخلاق ... أحسن أخدلي روصية كدة ... ولا بونية كدة ... أروح فيها وأنا بسكوتة خااالص وبحب ألزق في الحيط لزق
من كام يوم كان معايا قرشين وقلت أروح البوستة ألقحهم هناك بدال مايتصرفوا في البيت ...
قوووم أييييييييييه ..... ماأروحش غير في يوم صرف المعاشات ... أُممم ... أُممم .. وطابوووووووووووووور طويييييييييييل مالهوش آخر .. والناس واقفة بتتخانق...
يانااااس حرااااام عليكم دي تالت مرة نيييجي وتقولوا مافيش فلوس .. عربية الفلوس لسة ماجاتش ... طب نصرف منين بس يعني نسرق ... حراام عليكم ... الدنيا بقت غلا .. وأحنا بنستلف فلوس آخر الشهر وبنردها أول الشهر .. ربنا يزلكم ذي مازلتونا وخلتونا نمد أيدينا للي يسوي واللي مايسواش
أنا شفت كدة قمت سألت واحدة واقفة في الصف ...
ماعلهش ياحاجة ...هو الطابووور ده بتاع أيه ؟ هي البوستة دي بتدوخ الناس كدة لحد ماتديهم فلوسهم
ردت الست بغُلب يقطع القلب .. لأ .. يابنتي الطابووور ده بتاع المعاشااات .. وفتحت في الحكي والدموع تسبق كلماتها ... أنا جوزي مات و ساب لي أربع عيال وخمسة وسبعين جنيه معاش في الشهر
الصراحة أنا ماصدقتهاش إلا لما قبضت بالفعل وعديت الفلوس في أيديها .. ماهي أصلها لما قبضيتهم قعدت تعدهم قدام الناس كدة عيني عينك من غير خوف ... هما هايسرقوا أيه ياحسرة ؟
... خمسة وسبعين جنيه حتة واحدة الحكومة بتبعزق يارجاااالة
ولازم نُحجر عليها
ياتري الست دي عايشة بيهم إزاي ؟
أكيد الأروبة عندها آلة زمن بتروح تشتري بيها طلباتها من عصر الجنيه الجبس وترجع تاني
...
أنا شفت المناظر دي ونفسي أتسدت عن الدنيا وقعدت علي الجنب أحسبها
لأ ... ياعم ..مش حاسبة دي حسبة برمة أسهل منها
مالهاش حل
غير
أن الناس دي ترفض تاخد المعاش وتسيبه عند الحكومة وهي تصرف عليهم بقي بمعرفتها وأبقوا وروني أن ماكانتش تشحت عليهم ... ولا بلاش أحسن الحكومة دي مالهاش أمان وبتخطف مال النبي
خمسة وسبعين جنيه ؟؟؟؟؟؟؟؟؟؟؟؟؟؟؟؟؟؟؟؟؟؟؟
يعملوا أيه دول في الزمن الأخبر ده ؟
ويشتكوا لمين الناس الغلابة دي
وعلي أيه ؟ الشكوي لغير الله مزلة
فحكومتنا ماتت من زمااان
الله يفحمها ماطرح ماراحت
....
20 comments:
ده مش ذل بس
ده بيع وشرا في الإسم الوحيد الرخيص في الزمن ده
البني آدم عديم الضهر
وده طبعاً زي ما حضراتكم عارفين مختلف تماماً عن البني آدم وارد مارينا وشرم والمعادي والمناطق المتواضعة دي
ومختلف تماماً عن البني آدم جار رئيس الوزرا
أما قاطني قصر العروبة فدول فئة خارجة عن نطاق التصنيف
لسه محددوش لون الدم الموجود بس هو بيقولوا إنه دم شفاف كده ملوش لون ولا طعم ولا ريحة
وتحيا الحيطة العربية المتحدة
اللي حضراتنا ماشيين جنبها ليل ونهار لحد ما هتقع علينا
ومش ضروري نحلي يا أم أحمد
ماله الملح
انا من المعادى
وبرضه مش لاقين ناكل يعنى
الازمة على الكل اكيد حضرتك مارحتيش المعادى
وبعدين الملح مضروب وبايظ للعلم
حبيبتى اتكلمى براحتك وفضفضى براحتك
كل حاجه غليت كيلو العدس ب9 جنيه والحسابة بتحسب
كيلو العدس اللى لو ماما فكرت تعمله وانا روحت فى البيت لاقيته
الاقيته مقبلانى من على السلم تحلف لى ميت يمين حاولت تتصل بيا بس لاقيت تليفونى غير متاح علشان اشترى حاجه وانا مروحة لنفسى
دلوقتى مبقتش بتعبرنى لو عملته
ولما اقولها مش اتصلتى تقولى لى ليه
تقولى انتى بتبطرى على النعمة كولى قبل ما تزول
واحلى سلام للدعم
تحياتى يا جميله
متزعليش نفسك
هى بقت سلطة من زمان محخدش مصدقنى
............
بجد مدونة هايلة جدا حسيت فيها انك حد قريبل منى وحبيتك جدا
ياريت تقبلينى صديقة جديدة ليكى ولمدونتك
ولسه
هو احنا شوفنا حاجه
ام ميدو ازيك
والنبي يختي ما تزعلشي نفسك ولا تقهري روحك
انا كنت زيك كدا من بتوع لزق في الحيطة
لغابه لما ربنا وعدني بشغلانه في مكان شفت فيه العجب
والله كان رجاله بشنبات وربوب اسر بياخدوا مرتب 85 جنيه في الشهر والله زي ما بقولك كدا
امال معاشهم هيكون كام ؟؟ لما مرتبهم 85 جنيه امممممممممممم
الله يكون في عون الجميع
وربنا يرحمنا بعفوة وبرضاه وعيينا على ابتلاءتنا
اسلوبك جميل اوي ولذيذ ما شاء الله في الحكي
تسلم ايديكي وبوثه كبيييييييرة لميدو ولو كان جاهز بالمهر والشبكة يجي يشرب الشاي مع بابا لو سمحتي بلغيه
تحياتي
الحكومة الحالية تدعى أنها تتحدث بالأرقام التى لا تكذب عند ذكر الانجازات، لكنهم يتجنبون دائما رقمين: نسبة التضخم ونسبة البطالة. يقال فى ذلك أن رقما منهما عض وزيرا مرة واحتاج الأمر اٍلى احدى وعشرين حقنة لتجنب المضاعفات ومنذ ذلك الحين والرقمان محبوسان فى مكان مجهول
أقولك 75 جنيه
ممكن يعملوا أيه؟
مش لاقيه إجابه والله
أنا شخصيا لو معايا
هصرفهم فى يومين
يادوبك وياريت يكفوا
Diyaa'
=======
أخي ضياء .. احنا عاوزين سكر كتيييير عشان نحلي مرارة أيامنا
la3lahakhier
================
اللي حصل ده ..في بوستة تجاور منطقة من أرقي مناطق مصر علي فكرة
Desert cat
============
انا باحب العدس اوي وشايفة انه بدأ ياخد وضعه لما غلوه
ده مغزي اوي علي فكرة
بالهنا والشفا عليكي
مروة الزارع
=============
منورة وأشكرك علي كلامك الرقيق وخلاص احنا بقينا أخوات
مـحـمـد مـفـيـد
=================
لسة التقيل جاي وري
قبلة الحياة
===========
المهر ربع جنيه ... انا مهري كان جنيه علي فكرة ... بس عشان الواد صغير حبتين خليها ربع جنيه يحوشها من مصروفه ... أما الشبكة فهديكي شبكتي
شرطي الوحيد ان الشقة عليكي
The_Explorer
==============
أما رقم مش محترم صحيح عنده سعار بقي يعض الوزير بتاعنا الله يعمر بيته
mnoon
========
ده تمن وجبة في كنتاكي ليا وللولاد وأبوهم
أم أحمد
يا عزيزتى أنا عندى أختين اسمهم أم أحمد يعنى كل واحدة مسمية ابنها أم أحمد انتى بقيتى التالتة بس هم اخوات دم وانتى اخت مدونات وكمان زماااااااااااااان كنا بنلعب لعبة اسمها أم أحمد كانت شخصية قادرة وقوية كنا بنطلع فيها كل الكبت اللى بنشوفوا من أهالينا زمان يعنى لما كانوا الأهالى لهم كلمة على عيالهم ..ما علينا ..المدونة رائعة وخفة دمك ملهاش حل وشر الببلية ما يضحك ده شعارى أنا كمان ,,أصحاب المعاشات وآآآه اللى بيموتنى ويقهرنى انى أشوف مسن بيتبهدل وهو المفروض يجنى ثمار شقاه طول حياته بالراحة والاحترام لسنه لكن فى بلدنا احنا بنهينهم وبنصعب عليهم حياتهم أنا بأشوف طوابير المعاشات حاجة تقطع القلب وطبعا دول معندهمش حساب جارى فى أى بنك ممكن يتحول عليه المعاش وده اللى المفروض تعمله الدولة ليهم أو حتى توصلهم المعاشات لبيوتهم ما أكتر العاطلين فى بلدنا ليه ميخلوش دى وظيفة للشباب بس واللهى حاجة تكسف دى مش مرتبات دى بقشيش يا نهار ,,الناس دى فعلا عايشة ازاى ,,اللهم انى اعوذ بك من الهرم والعجز وقهر الرجال
السلام عليكم موضوع جميل يام احمدوبالتوفيق
ازيك يا ام احمد وحشانى جدا
انتى جيتى فى وقتك
كويس انك رحتى البوسته علشان تحطى فلوس
كده اتكشفتى
خلاص
مفروض بقى تسليفينى
50 جند
لغايه الكادر لما يجى
انها المهانه بل انها الاهانه
يا ست ام احمد ياريت تقولى لاحمد لما يكبر ويكون راجل مدون كبير كده انه هيحكمه واحد اسمه مبارك الخالد وانه هيلاقى ساعتها طبق الفول ابو سوس وصل تمنه الى ربع مليون جنيه مصراوى يعنى عشان ميقولكيش انتم جبتونى عشان اتبهدل فى الدنيا دى ليه
اخى الفاضل -- اختى الفاضلة
ادعوكم للتضامن مع دعوة الداعية الاسلامى الكبير ( عمرو خالد )والانضمام
الى ---- ( حملة حما يه ) ------
فى انتظاركم ولاتترددوا نحن فى حاجة اليكم
برجاء التواصل للمساهمة وشكرا لكم مقدما....للمزيد يمكنك زيارة مدونتى
او زيارة موقع عمرو خالد مباشرة
مجداوية
========
أحنا خلاص بقينا أخوات ..
الحكومة تقتطع من المرتبات عشان المعاشات لكن للأسف عشان تذلهم عليها لما تديهاهم معاش بعد كدة
والله حالهم يقطع القلب والملاحظ من معظم مستحقي المعاشات ستات
بجد ربنا يعينهم
رئـــــيسـة حزب الأحلام
======================
شكراً ياقمر
عبده الرايق
=-=---------
شفت الراجل ...يعني أعمل فيك أيه الوحيد اللي خد باله من تلقيح الفلوس في البوستة
من عينيا ... بس اكتب لي شيك الاول
صوت من مصر
===========
ربنا يستر علي ولادنا بجد الحالة في النازل
لكن انت مستكتر علي الراجل يحكم ولادي ماهو هايحكم امال ايه ؟
ده مخلل
حسن توفيق
=========
انا معاكم في الحملة دي
المسألة خطيرة ولازم نتكاتف
أيها المصلحون ضاق بنا العيش ولم تحسنوا عليه القياما
وغدا القوت كالياقوت حتى نوى الفقير الصياما !
Post a Comment