بما أن رئيس أمريكا هو الحاكم المعلن لكل بلاد العالم
وبإيده يقوم حرب ويقعدها حسب مزاج سيادته الشخصي
يعني ممكن يقول
البلد دي مش بتعامل الناس كويس ... أضرب يابتنجان
البلد دي عندها سلاح نووي ... أدبح ناسها ياجون
البلد دي دمها خفيف علي قلبي ... أديها دولارز بالهبل وبالعبط
فمن هذا المنطلق
أطالب وبشدة جعل الإنتخابات الأمريكية إنتخابات عالمية
يعني أنا العابدة لله أنتخب وأنت تنتخب وكل من هب ودب ينتخب
مش معقولة واحد ممكن يأثر في لقمة عيشي وفي أمن بلادي وشايف انه من حقه يتدخل في بلدي وأمن بلدي ... جات كسر حُقه
وفي الآخر ماأنتخبش الأنسب من وجهة نظري
لأ بقي .. ذي مالريس لأمريكي ليه رأي في السلاح اللي في بيتي يبقي أنا كمان ليا رأي فيه كله علي بعضه
وذي مالريس الأمريكاني بيستعبط الشعوب وعامل عليها وصاية مع أن شعبه ولا مؤاخذة من أجهل شعوب الأرض
وذي ماهو بيحجر علي رأينا وأختيارنا لحكامنا نُحجر أحنا كمان علي شعبه وننتخب بدالهم ... بلاش ننتخب بدالهم أحنا ناس موومش طماعين ... معاهم كويس
وكل واحد عاوز يرشح نفسه لرئاسة أمريكا ييجي لحد بيتي ويقنعني بجدوله الأنتخابي وخططه لخدمة شعوب الأرض
وأنا أحط رٍجل علي رٍجل وأختار بمزاجي
13 comments:
:) أعجبتنى الصورة التى وضعتيها
الأمريكان يستعبطون الشعوب القابلة للاستعباط
اٍذا كان الأمريكيون جهلاءا فكيف تطوروا هكذا واذا كنا نحن الأذكياء فكيف تدهورنا هكذا؟
ليسوا جهلاءا، هم يعرفون حقوقهم جيدا، ولا تستطيع أى حكومة أمريكية أن تقيد من حريتهم بمقدار واحد على الألف مما يحدث بمصر حيث الشعب "الواعى"، ولكنهم يهتمون بأنفسهم أكثر من اهتمامهم بالشعوب الأخرى ويتعصبون لبلدهم فى مواجهة الآخرين
The_Explorer
===============
الصورة مش بتاعتي لاطشاها من مدونة
حتي نسيت انهي مدونة
ربنا يسامحني
الأمريكان بيعرفوا كويس يمصوا دم شعوب الأرض ويطلعوا علي اكتاف غيرهم ... ماتنساش ان معظم الأمريكان من جنسيات أخري
انا خريجة إرشاد سياحي علي فكرة وتعاملت في خلال دراستي مع جنسيات مختلفة
وأكتر الجنسيات جهلاً بالحضارات الأخري هم الأمريكان
لو الأمريكان عندهم حرية وعلم لا يملكه غيرهم ليه دخلوا حرب العراق خلف إشاعة روجها البعض بوجود سلاح نووي بها
حتي رئيسهم مغفل ... ماتقولش ان الأمريكا هما اللي دخلوا الحرب بكامل إرادتهم ... بلاش العراق جايز بوش فلتة ومتخلف لواحده ... عندك حرب فيتنام كانوا برضه رفضينها ومع ذلك مشيوا فيها للآخر غصباً عن إرادتهم
فين الحرية في تحديد المصير
ده لو الرئيس الأمريكاني بيمشي وري الأستفتاءات كان زمانه لغي الحرب من زماااان
شعبنا مش كله شعب واعي علي فكرة وأبقي كذابة ومابفهمش في اي حاجة لو قلت كدة
ومابقلش اننا لوحدنا نختار رئيس أمريكا عشان احسن شعوب الأرض ...
ماتقدرش تختلف معايا ان الرئيس الامريكي بيتحكم في كل شعوب الارض
يبقي مفروض كل شعوب الارض يتاخد رأيها في حاكمها
ده لو فيه علي سطح الأرض ذرة ديموقراطية
السلام عليكم ورحمة الله وبركاته
ننتخب رئيس امريكا معاهم..!!!!!
طيب لما ننتحب رئيس بلدنا الاول
ولا ايه ؟؟؟
تحياتي
صحيح أيه ده ؟ كل واحد بينتخب فى بلده ليه و لمين ظ احنا كلنا كده بشلة المعلم نروح ننتخب أمريكا لأن ثبت فعلا أن كلمتها هى الى بتمشى فى الاخر
و يا ألف مليون خسارة
تحياتى
على فكرة صورة ابنك أحمد نورت أهل عندليبيات جناح ( انا من تراب )
لو انتى و احمد طبعا ما عنكومش مانع
ههههههههههههههه أما حتة دين نتفة فكرة ,,عندك حق وخمسة فضفة عندها حق برضه مش ننتخب رئيس بلدنا الأول ,ولكن فكرة اننا نشارك فى انتخاب رئيس أمريكا فكرة هايلة وتتزور برضه وتروح النتيجة ان الشعب المصرى انتخب بالاجماع بوش وهو مش مترشح أصلا وتبقى فضيحة واحنا ولا يهمنا حنلاقى رد نقول مثلا اصل عشان الأمية منتشرة بين المصريين معرفوش يفرقوا بين رمز الجمل والنسر الأمريكى ,,بوست هايل وفكرته ملهاش حل ,,وحشتينا يا أم أحمد
خمسة فضفضة
================
تصدقي عندك حق
انا اطالب اننا يكونلينا رأي في رئيس بلدنا الأول
أهو كلام هواحنا خسرانين حاجة
عاليا حليم
=============
لو سمحتي الصورة صورة عمر مش أحمد عشان بس نفسيات الولد
انا حاولت ادخل عليها عشان أشوفها ماأمكنش
مجداوية
===========
ربنا يخليكي يأختي العزيزة انتي اللي
اختفيتي فييين علي الله المانع خير
شفتي
لسة أم أحمد عندها أقتراحات لو أتنفذت هانروح كلنا في داهية
وهانزور علي كبير
هههههههههههه
طب و الله معاكى الف حق..الف ايه..مليوووووووووون حق
صح كدا...تخيلى بقى الانتخابات الامريكية اللى جاية ام محمد و مخيمر و صعيدى و الدلع ديدى فى مواجهة بوش..و الله سبق صحفى
انا دايما بحمد ربنا اننا مش مسئولة ..لانى لو مسئولة و شفت تدخلات الباشا بوش اغبى اخواته بجد كنت قلتله كلمة واحد"انت مال اهلك"و طبعا فى كلمة زى دى تروح فيها شعوب مش رقاب
حسبى الله و نعم الوكيل
انا كمان اوافق بشدة علي هذا الرأي
dina
===========
شفتم بقي الأفكار اللي تودي في داهية
بس احنا لازم نغير من أسمائنا عشان نناسب العصر الجديد
mostafarayan
=====================
اهم حاجة انك توافق التنفيذ حاجة سهلة خاالص
Post a Comment