Wednesday, September 13, 2006

خلو حريمها تمسكها...

خلو حريمها تمسكها...ه
=============
من المعروف في كل بيت بجميع أنحاء العالم إن المرأة هي الأقدر علي ضبط ميزانية المنزل ‘ ولأن الأسرة هي الصورة المصغرة للدولة بأعتبار الدولة أسرة كبيرة حبتين فلماذا لا تمسك وزارة المالية واحدة واعية مدقدقة، مخها نضيف تقدر تحدد البلد عاوزة أيه ، وتقدر ترتب أولوياتها وياحبذا لو تكون أيديها ماسكة شويتين ،بلاش الهبل إللي عمال علي بطال ده وكأن المسؤول عن أمورنا المالية واحد مسطول سطل معتبر مافيش كلام ، وجايز يكون سوء تنسيق بين الجهات المختلفة ، ماأقدرش أحدد بالظبط فين الخلل بس أكيد فيه خلل ماحدش يقدر ينكر ده ...ه

خلونا في الست الوزيرة دلوقت عاوزينها تعمل أيه؟؟؟
مثلاً ما تصرفش فلوس علي رصف شوارع إلا بعد الحفر لمد مواسير المية والغاز والذي منه ماهو مش مال سايب مالوش صاحب لا مؤاخذة دي فلوسنا إللي بنتكلم عليها دلوقت ، شقانا وتعبنا ، وكمان ماتأمرش ببناء أي مبني بدون ماتعمل لجنة فاهمة وواعية تقوم بدراسة مدي أهمية المبني وملائمته للمكان
مش ذي الجراج إللي أتبني في رمسيس وكلفنا ملايين الجنيهات ودلوقت عاوزيين ملايين تانية عشان يهدوه صحيح أصحاب العقول في راحة من زمااااااااان .ه

وكمان ماتبيعش أي من ممتلكات الدولة إلا بعد ماتعمل خطة عمل لإستخدام ثمن هذه الممتلكات ، وكلام في سركم أنا ماأعرفش لحد دلوقت فلوس الخصخصة دي راحت فين ومن حقي الدستوري إني أعرف وألا أقولكم بلاش أحسن خاللي الطابق مستور بلاش فضايح .ه

وممكن كمان تعمل دفتر أولويات تحدد فيه مين أولي أنه يتصرف عليه يعني المواطن المصري الغلبان لازم يتحط علي قائمة هذه الأولويات وتوفر له بقي هواء نضيف، مسكن مناسب ، وأكلة نضيفة غير مسرطنة ماتسببش بلاوي في جتة النفر مننا ، وتوفر مية نقية ماتجيبش للواحد الفشل الكلوي والعياذ بالله ، وتحط في معلومها إن الإنسان أهم بكتير من الحجر حتي لو كان الحجر ده تمثال لملك عظيم مثل رمسيس فمثلاً ليه بدل ماكانوا ينقلوا رمسيس كانوا نقلوا التلوث أسهل ..... مش كدة ولا أيه ؟؟؟

قبل ماأنسي الست دي لازم تبقي واحدة فاضية ماوراهاش لا عيل ولاتيل يعني متفرغة لينا وبس وتكون عندها عربية كدة نص عمر عشان تلف بيها وتشوف البلد ناقصها أيه، ولما تخرج من الوزارة تخرج بدون إمتلاك عربية غيرها وبلاش أمور التربح الوظيفي ماهو لازم تبدأ بنفسها طبعاً ، وربنا يعينها علينا ...ه

قبل ماأنسي البوست ده مكتوب قبل حملة كلنا ليلي ماتبدأ يعني ماحدش ييجي يقوللي سكتناله دخل بحصانه – خليها حصانه عشان خاطري- يعني ماتقولش حملة ليلي بدأت بالفضفضة وقلبت بالإستيلاء علي فلوس الدولة .ه
علي فكرة قبل ماأمشي مدونة كلنا ليلي في الموقع ده للي يحب يزورها
http://laila-eg.blogspot.com


مع تحيات أحلام الست أم أحمد
----------------------------

16 comments:

مفلس افندى الرايق said...

خلو حريمها تمسكها

وان وقعت بقى من ايديها

ساعتها نبقى نضربها؟؟؟

الحياه سهله صدقونى

بالتقارب نفهمها

واللى عنده كلمه لتانى

لازم بصراحه يقولها

ليلى رمز للمرأه

ضيعت ف التضحيه شبابها

واللى يضحى بصدق وحب

اكيد الدنيا تكرمها

الرجل مش عدو المرأه

دى حقيقه ولازم اقولها

الراحل بيحب المرأه

ونفسه يحقق مطالبها



بصوا احنا نعمل قعدة صلح والغلطان يدينى ربع جنيه وانا هاحل عن نفوخكم واروح

wa3d el3yoon said...

سؤال يعنى مافيش راجل ينفع يعمل الموضوع ده؟؟؟؟؟؟؟؟؟؟؟؟؟

sahar said...

مفلس أفندي الرايق
ربنا يروقك يارب كمان وكمان خد مني جنيه بحاله علي فكرة الموضوع ده مكتوب قبل حملة كلنا ليلي وده سياسي بالدرجة الاولي
وعد العيون
لأ ينفع ماينفعش ليه
ولو أننا جربنا رجالة كتير ومافيش فايدة قلنا نغير جايز ربنا يجعل علي أيدينا الشفي

مفلس افندى الرايق said...

طيب تعالى عندى وشوفى الضرب من تحت الطربيزه والحدق يفهم

Diyaa' said...
This comment has been removed by a blog administrator.
Diyaa' said...

هل تعتقدي ان كل واحدة مسكت وزارة عملت حاجة ...زيها زي كل واحد بالضبط ..عارفة ليه ...الضمير أنتحر علي أسوار كرسي الوزارة و ده البند رقم 1 في عقد تعيين الوزير الشفهي ...انسف ضميرك
في حاجة تاني ..بفرض أن في واحدة بنت حلال و طيبة و غلبانة و علي نياتها و كمان علميا متخرش الميه و الرجالة كلهم ميقدروش ينكروا كده ..عارفة هيحصل ايه ..هيا تبني من فوق و هما ينخربوا من تحت يعني الوكيل اللي كان بينهبله ييجي 30 ألف في الشهر غير الأساسي هيزعل و هينخرب فيها
متضمنيش الموضوع هيمشي ازاي و هيسيب أثر شكله ايه ...لكن لما تتحل من جدورها و كله يبقي محترم ( الأغلبية يعني ) أكيد الأخت الوزيرة أو الأخ الوزير هيعرف يشتغل و و مش هيبقي في لا سرقة ولا فهلوة ولا محسوبية ولو أني متأكد ان المحسوبية لو كانت انسان مكانتش هتلاقي أنسب من المرأة متدفقة العواطف اللي ممكن تعين ولاد خالة عمتها لمجرد صلة الرحم

sahar said...

ضياء
ايه ياأستاذي الفاضل انت ليه دايماً تصحيني علي كابوس ده حلم مش اكتر هو الأحلام بفلوس دلوقتي ولا أيه؟

soosa el-mafroosa said...

تحياتي ليكي

بس المشكلة ان مافيش لا واحد ولا واحده ممكن يغيروا حاجه لوحدهم ..للاسف المشكلة في المنظومه كلها و الحاشية و الضماير اللي ماتت من زمان

sahar said...

سوستي العزيزة
يلا اهو حلم والسلام ماهو طبعاً مافيش حاجة بتتحقق لوحدها بس لو فيه قائد كويس يعتمد عليه كان ممكن يتحقق اي حاجة ذي ماحصل في قنا مثلاً بدأنا بالمحافظ فأتعدلت المحافظة وأهلها
ماهو مافيش مخلوق يقدر يعمل اللي بقول عليه لوحده لازم شعب يؤيده بس مش انتي معايا ان اللي حصل في قنا ده معجزة ولا إسكندرية واللي اتعمل فيها علي ايد محجوب مش دول برده من مصر
وقبلاتشي مع خالص تحياتي

مفلس افندى الرايق said...

نزلت بموضوع جديد تعالى شوفيه يمكن تغيرى رايك

Diyaa' said...

ههههههههههههههه....لأ بس مش ممكن يعني نحلم حلم ممكن نحققه عشان نعرف نوصل لمرحلة أمكانية تحقيق أي حلم ؟
يا رب يحقق كل أحلامك
تلميذك

Gid-Do - جدو said...

سحر
ازيك ـ والف شكر على زارتى اكتر من مرة للاطمانان عليا
لقيتك بتسالى ابيتاف

انا ليا رجاء ياإبيتاف ياريت تعرفيني اجيب اكواد البلوجرات اذاي عشان اعمل لسته بيهم من فضلك ساعديني

وانا حسبق ابيتاف فى الرد
Sahar
سحر
ام احمد

a href="http://umahmed.blogspot.com/">Sahar/a
a href="http://umahmed.blogspot.com/">سحر/a
a href="http://umahmed.blogspot.com/">ام احمد/a

التلات عنواين اللى فوق دول بتوعك مرة باسم سحر ومرة باسم ام احمد ومرة سحر بلانجليزى
لو حطيطى العلامة دية
>
بعد حرف اية فى الاخر
والعلامة دية
<

قبل حرف اية فى الاول

راح يتحول العنوان الى لينك
انا شلتها علشان ابين ازاى تعمليها
وعلشان اعرف اوريها ليكى والا حتكون لينل ازرق زى اللى الفوق
هل هو دة اللى انت عاوزاة؟
تحياتى

sahar said...

ميرسي ياجدو ياعسل انا حاولت دلوقت اعمل كدة مش عارفة فيه ايه المدونات اللي بكتبها مابتفتحش دي حاجة صعبة اوي

Gid-Do - جدو said...

سحر

روحى على اللينك دة وشوفى نصيحة اوسة حتعرفك طريقة سهلة لعمل لينك وانا برضة حشرحلك حل تانى بعدين

http://www.blogger.com/comment.g?blogID=33084237&postID=115749110293293638

rony said...

السلام عليكم
والله يااخت سحر انا فعلا معاكى ان حق ان المفروض الستات بقى يمسكوا الوزارت وبالاخص الماليه و الزراعه والاسكان والعدل والداخليه ولا اقولك كل الوزرات بالمره, ومحدش يفهمنى غلط بس يعنى ادينا شفنا الرجاله غرقونا ازاى والستات برضه طيبين وحنينين واهو هانسيل الجيش ليهم علشان احنا الحقيقه مننفعش فيهم بس برضه حكايه ان الوزيره تبقى مقطوعه كده من شجره مش لطيفه وبرضه دى اخرها وزيره مينفعش تقول ان الشعب كله اولادها ...بس ياجماعه اوعى حد يفتكر انى بطالب بحقوق المرأه ولا حاجه لا انا باخد حقى بدراعى بس يعنى انا عامله على الدوله
وبالمناسبه يا ام احمد ...احمد ده ابنك ولا نيك نيم

sahar said...

وعليكم السلام ياأخت روني
ماأحنا جربنا الرجالة مانفعوش نجرب بقي حاجة تانية
بلاش بس تكون متجوزة وياريت مايكونش وراها طابور من المنتفعين عاوزين ياكلوا من الكوسة
أحمد ده اسم ابني الكبير فعلاً ياأخت روني
ونورتينا وماتقطعيش الزيارة
سلامي