Monday, May 26, 2008

هي كانت خوخــــــــــــة بس


أبو أحمد يعشق حاجة أسمها خوخ

أنا عمري ماحبيت الخوخ ده ... أصله بيبهدلني ويقعد ينقط عليا ... وبيبقع في الهدوم وأسألوا عمورة أبني

المهم رفيق عمري أشتري كيلو خوخ .. وأنا بنية صافية غسلته

زمان كانوا قالوا الخوخ والمشمش يتغسلوا بخل وعملتها مرتين تلاتة ولما لاقيت الدار أمان بطلت أغسل الفاكهة بالخل

وقلت ربنا يسترها علينا ويحمينا من عنده

المهم قعد جوزي يتسلي علي الخوخ ... وواحدة تجر واحدة لحد ماخلص الكيلو كله

الليل يهل وتلاقي جوزي ياعيني يصحي من النوم جري علي الحمام وهوفي الحمام أسمع صوته وهو شغال قيء

صعب عليا ده برضه عشرة العمر

وعمري ماشفته في الحالة دي

قلتله تعالي تاخد حقنة في الصيدلية أتاريه بيخاف من الحقن فرفض رفضاً تاماً

وقعد يزعق فيا وكأني طلبت منه يدبح نفسه بالسكينة

والقيء برضه ماخلصش وكان خلاص الراجل أتصفي

قلتله نروح الطواريء نشوف بيجرالك أيه ؟؟ برضه لأ

قعدنا أنا وهو تاني يوم نراجع مع بعض كدة المنيو بتاع اليوم اللي كان عنده فيه تسمم

مالقيناش حاجة

وبعدين أفتكرنا الخوخ

هو الخوخ مافيش حاجة أكلها جوزي أمبارح لوحده غير الخوخ وإلا كان هايبقي تسمم جماعي

لا قدر الله

يرضيكوا كدة ياأخواننا

بقي الواحد ياكل خوخ ويجيله تسمم ... أتاري أيه ؟؟؟ الخوخ اللي بناكله في مصر بيبقي مرشوش مبيدات سامة

والفاكهة النضيفة بتاعتنا بتتصدر لبلاد برة عشان تدخل عملة صعبة للبلد

ياحسرة علينا ياولاد

البني آدم مننا مالوش تمن في بلده
يعني الواحد مننا لازم يفارق بلده عشان يبقاله تمن وياكل اكل نضيف
من اللي بيتصدر لبلاد برة
قدمتها لكم أم أحمد بعد ليلة عذاب طويلة

32 comments:

اهو ده عيبه said...

ازيك يا ام احمد

الواحد بصراحه بيخاف من الخوخ والمشمش والكنتالوب وكل فاكهه مشكوك انها مرشوشه مبيدات

هنعمل ايه حظنا كده يعنى علشان ناكل اكله حلوة نطلع الخليج يعنى

سلامته الف سلامه

Mafrousa said...

أم احمد الخوخ بقاله سنين بيعمل كده
انا الصراحع اتعودت اغسل اى حاجه حتى البطيخ و الكانتلوب
و على ان الحجه الكويسه تتصدر...اه انا معاكى مليون فى الميه
عارفه ده ليه علشان احنا مش بندفع بالعمله الصعبه
حاجه كطمان انتى عارفه ان المحصول المرشوش لا يتم تصديره لانهم ببساطه بره مش بيقبلوه
و على فكره العنب كمان كل حاجه
المصيبه بقى احنا بنستورد اى حاجه حتى المرشوشه بتاعتهم

مـحـمـد مـفـيـد said...

والله الحمد لله ان أم عبد الله معندهاش مدونه كانت كتبت عني والخوخ والبطيخ

كلاكيت تانى وتانى said...

الخوخ والمشمش فاول كل موسم بيعمل الموضوع دة وانا طبيعى عشان الاملاح مبحبش اكلة خالص بس كنتى عنتى شوية لحماتك اهو اصول الضيافة برضة
الف سلامة ع زوجك المحترم وبلاش خروخ تانى
لو شفتى ازاى بيرشوا الخوخ والمانجو والعنب كمان بالذات متاكليش فاكهه ابدااااا
تحياتى

FaceMoon said...

حصل لكل الناس نفس الحكاية
كل حاجة بتترش دلوقتى حتى الخضار
بس يعنى نعمل اية
مافيش حل غير اننا نعمل رجيم بس دة كمان بقى مستحيل
اتكلوا على الله وكلوا بقى هيا دى بلادنا حنغيرها ولا نغيرها

MeDoOoOoOo said...

انا بطلت أكل خوخ أول لأنه غالي ثانيا اني مبحبوش ثالثا انه ضرر اكتر من نفعه في مصر بس .سلامتك ألف سلامه و بجد مدونتك حلوه قوي

rtrcbh said...

السلام عليكم ورحمه الله وبركاته
أسال الله أن يكون بخير الان
حسبى الله ونعم الوكيل فيهم معك حق فكل ماياتى الينا هو أردى ما بالعالم لانهم يعتبروننا شعوبا متخلفه لا تفرق معها فى شىء
المشكله ليست فى اعتبارهم لنا ولكن فى بنى جلدتنا وهم حكوماتنا الرشيدة وكل من هو مسؤل عن مثل هذه الامور فهم يعتبروننا ايضا كذلك .. اليسوا هم منا ؟؟ هل يرضوا أن ياكلوا مايقدمم الينا ؟؟؟
أسال الله العفو والعافية
وطمنى ابو احمد واخبرية أن لايقلق من الحقن فهو مقدر ومكتوب
والمكتوب على الجبين لابد ان تراه العين

رئـــــيسـة حزب الأحلام said...

الف حمد الله على السلامة
وابقى اغسلى الخوخ كويس
انا مابقتش اكل منه لا سنانى بتجزع
بوسيلى العيال

Unknown said...

ما هو ياريت لو على الخوخ وبس لكن كل الفواكه والخضروات مرشوشة بمبيدات سامة
وبعدين من امتى المصرى ليه تمن فى بلده

تقبلى تحياتى

R-H-S said...

انا سمعت انهم مره كانوا رايحين يصدروا حاجه بره فاستنت في المينا قوم ايه باظت وضربت
راحوا مرجعينها تاني واحنا اكلنها
بالهنا والشفا
اصل احنا معدتنا بتاكل الزلط

خواطر رئيس شاب said...

الف سلامة على ابو احمد

يارب يكون بخير

أم أحمد said...

اهو ده عيبه
===================
أومال ناكل ايه بقي مادام كله مرشوش بلا أزرق

أم أحمد said...

واحدة مفروسة
===================
للأسف احنا واقعين في ايد ناس ماعندهاش ضمير كل اللي يهمهم يكسبوا فلوس وخلاص حتي لو علي حساب ارواحنا

أم أحمد said...

مـحـمـد مـفـيـد
----------------------
هو حضرتك ليك سوابق مع الخوخ والبطيخ مع بعض
ربنا يبعد عنك الكيماويات يارب

أم أحمد said...

كلاكيت تانى وتانى
====================
مش هاتصدقي لو قلتلك انه راح اشتري خوخ في اليوم اللي بعد التسمم ده لا وايه من نفس الراجل
هو حط في دماغه ان الغلط عليا
واني قصداها رغم انه هو اللي مقدرش يستني علي الخوخ لحد ماينقع شوية وصفاه واكله بس هو مش مستسيغ الخوخ بالخل بتاع المرة التانية

أم أحمد said...

FaceMoon
==================
تفتكري لو استمرينا في الاكل العجيب ده معدتنا هاتاخد مناعة اكتر من كدة ومش هايحصلنا حاجة تانية

أم أحمد said...

MeDoOoOoOo
================
منورني ياميدو
عامل ايه في الأمتحانات ؟؟؟

أم أحمد said...

د/أبا يحيى وادم
=====================
وحتي لو هما مش بياكلوا من اكلنا ماهو كل واحد ليه قرايب ممكن يوصلهم الاكل الفاسد المسمم اللي بيجيلنا والا حتي الاقارب مابقوش بيسألوا فيهم بإعتبارهم من الرعاع

أم أحمد said...

رئـــــيسـة حزب الأحلام
==========================
رب ضارة نافعة
اهي عشان السنان الواحد بيبطل حاجات غصب عنه بس بيطلع في الاخر لمصلحته

أم أحمد said...

هيثم الدهشان
--------------------
احنا احسن حاجة نبطل الاكل كله ونعمل رجيم قاسي يودي في داهية مادام كدة كدة رايحينها الداهية دي

أم أحمد said...

GeHaD
==============
ماعرفش مين اللي مطلع في دماغاتهم الديرتي ان معدتنا بتاكل الظلط واحنا معدتنا ذيها ذي اي معدة في العالم بتنضر برضه

أم أحمد said...

خواطر رئيس شاب
======================
ربنا يبارك في حضرتك
اسعدني مرورك ايها الرئيس
اخبارالرعية ايه
أكيد عمرك ماهاتعمل في رعيتك كدة وتديهم حاجات بايظة ومسمومة لان رعيتك غالية عندك لكن احنا ريسنا مااحناش غاليين عنده ونساوي عنده حفنة من التراب

Anonymous said...

سحررر
لالالالا
مفيناش من الخم ده
عايزة صورة ليه كبيرة وواضحة
وتملا عينى كدة
يمكن اكسر القاعدة وارسمهولك
متقطعيش برزقك
مع انى مش برسم بورتريهات غير للتعليم
بس انا عايزة صوراااااااا
يالا عشان منمش احلم بالولد
على فكرة باكل خوخ دلوقتى
انا مقرتشى برضو البوست سامحينى
بس قريت الخوخ

دعواتك

مجداوية said...

السلام عليكم

اختى الحبيبة
أولا الحمد لله على سلامة زوجك
وثانيا
أنا مدينة لك باعتذاروأرجو ان تسامحينى عليه قبل أن انهى رحلتى فى عالم التدوين
فأنا أعرف أن صراحتى كثيرا خسرت بسببها وقد تجرح رغم انها كانت لتطبب ولم تكن يوما الا للخير
فأرجو ان تسامحينى ان كانت صراحتى أساءت اليك بأى لمحة وعذرى أننى لا استطيع كتم كلمة أراها من وجهة نظرى حق حتى ولو لم يطلب منى قولها
وقد أخطا وقد أصيب ولكن انما الأعمال بالنيات


أراك على خير أم أحمد وأسمع عنك دائما كل خير
وعميق شكرى وامتنانى لتواصلك معى

والسلام عليكم ورحمة الله

ana ga3an said...

تالت حد اسمع انة جالة تسمم من خوخ او مشمش
الحق اخبي سندوتش المكرونة دة
ليرشوة هو كمان

ana ga3an said...

معلش العتب علي النظر
ازيك كدة و ازاي احمد و ابوة

rovy said...

الف سلامه على زوجك العزيز يا ام احمد
الحقيقه انا متعوده اصبن الفاكهة بالواحده .. وبعدين اششطفهم كويس جدا
اللى عاوز يأكل فاكهه فى بلدنا مع الاسف لازم يتعب جدا .
الحمد لله جت سليمه
ربنا يحميكوا
تحياتى
rovy

أم أحمد said...

شيماء سمير
====================
ماهو انتي لو كنتي قريتي المقال كنتي رميتي الخوخ من أيدك

بصي انا مش عارفة انزل صور لعمورة في المدونة بترفض تنزل للأسف

أم أحمد said...

مجداوية
===============
انا عرفت سبب اعتزالك للتدوين او تخفيك له
قدرك الله علي فعل ماتحبيه ويرضيه

أم أحمد said...

ana ga3an
===================
الموضوع ده كتر أوي
ربنا يحفظنا

أم أحمد said...

rovy
===============
احنا ريحنا وبطلناها
لان جوزي أشتري خوخ تاني من نفس الراجل وبطنه وجعته رغم اني كنت ناقعاه في الخل
يعني مافيش فايدة

Anonymous said...

علي فكرة يا ام احمد يا قمر انت
كان فيه واحد في برنامج تك شو بيسأل ويقول لوزير الزراعة هو انت بتاكل الخوخه اللي قد كدة انا كمان مش بحب الخوخ عشان بيفرقوه في المدافن والعقدة ديه من وانا صغيرة شفتي بقي ساعات العقد بتنفع